លោកប្រធានាធិបតី Bashar al-Assad នៃប្រទេសស៊ីរី បាននិយាយថា រដ្ឋាភិបាលរបស់លោក បានទទួលព័ត៌មានអំពីការវាយប្រហារតាមអាកាសដឹកនាំដោយសហរដ្ឋអាមេរិកប្រឆាំងនឹងក្រុមសកម្មប្រយុទ្ធរដ្ឋអ៊ីស្លាមនៅក្នុងប្រទេសស៊ីរី។ ក៏ប៉ុន្តែលោកបានបញ្ជាក់ថា គ្មានកិច្ចសហប្រតិបត្តិការផ្ទាល់ទេ។
លោក Assad បានប្រាប់ទូរទស្សន៍ BBC ក្នុងរដ្ឋធានីដាម៉ាសថា មានការផ្លាស់ប្តូរសាររវាងគ្នាទៅវិញទៅមកតាមរយៈភាគីទី៣ដូចជាប្រទេសអ៊ីរ៉ាក់ ក៏ប៉ុន្តែសារទាំងនោះ មិនបានរួមបញ្ចូលព័ត៌មានកលយុទ្ធទេ។
លោកប្រធានាធិបតីបាននិយាយថា ស៊ីរីនឹងមិនចូលរួមក្រុមចម្រុះដែលដឹកនាំដោយសហរដ្ឋអាមេរិកទេ។
លោក Assadបាននិយាយថា« ទេ! យើងប្រាកដជាមិនអាច យើងមិនមានឆន្ទៈ ហើយយើងមិនចង់ ដោយសារតែមូលហេតុសាមញ្ញមួយ គឺថា យើងមិនអាចក្លាយជាសម្ព័ន្ធមិត្តជាមួយប្រទេសដែលគាំទ្រភេរវកម្មនោះទេ»។
រដ្ឋាភិបាលស៊ីរី បានពណ៌នាជាយូរយារណាស់មកហើយថា កងកម្លាំងប្រឆាំងលោកប្រធានាធិបតី Assad ជាភេរវជនរួមជាមួយក្រុមនានាដូចជា ក្រុមរដ្ឋអ៊ីស្លាមនិងក្រុម Nusra Front ដែលមានចំណងទាក់ទងជាមួយក្រុមអាល់ កៃដា ។លោកប្រធានាធិបតី Assad បាននិយាយថា ប្រទេសស្ទើរតែទាំងអស់នៅក្នុងក្រុមចម្រុះគាំទ្រភេរវកម្ម។
លោក ក៏បានបញ្ជាក់ដែរថា កងទ័ពស៊ីរី មិនបានប្រើប្រាស់គ្រាប់បែកធ្វើពីធុងសាំង ឬអាវុធមិនរើសផ្សេងទៀតក្នុងអំឡុងពេលនៃសង្គ្រាមស៊ីវិលជិត៤ឆ្នាំ ដោយលោកនិយាយថា កងកម្លាំងស៊ីរី មាន «គ្រាប់បែក កាំជ្រួចមីស៊ីលនិងគ្រាប់កាំភ្លើង» ក៏ប៉ុន្តែ មិនមែនគ្រាប់បែកធ្វើពីធុងសាំងទេ។
លោក Assadក៏បានលើកឡើងផងដែរថា នេះជារឿងរបស់កូនក្មេង ដែលនិយាយម្តងហើយម្តងទៀតនៅក្នុងប្រទេសលោកខាងលិច។
អង្គការសិទ្ធិមនុស្ស Amnesty International Human Rights Watch និងគណៈកម្មការដែលរាយការណ៍ពីស្ថានភាពសិទ្ធិមនុស្សក្នុងប្រទេសស៊ីរី បានចោទប្រកាន់កងទ័ពស៊ីរីពីការវាយប្រហារតំបន់ដែលមានមនុស្សរស់នៅដោយប្រើគ្រាប់បែកធ្វើពីធុងសាំង៕
