ខណៈគណបក្សប្រជាជនកម្ពុជាកំពុងតែរៀបចំអ្នកបន្តវេនថ្មីរបស់ខ្លួនឱ្យចូលទៅកាន់តំណែងតាមក្រសួង អ្នកវិភាគ និងអ្នកតាមដានសង្គមជំរុញឱ្យដាក់អ្នកជំនាន់ថ្មី ដែលជាមនុស្សមានសមត្ថភាព មិនមែនជ្រើសរើសតែតាមសែស្រឡាយឡើយ។
កាលពីពេលថ្មីៗនេះ មានការបង្ហោះនៅលើបណ្តាញសង្គមហ្វេសប៊ុកអំពីគណបក្សកាន់អំណាចកំពុងរុះរើគណៈរដ្ឋមន្ត្រីថ្មី ដោយដាក់មនុស្សជំនាន់ថ្មីរបស់ពួកគេ ដែលជាកូនរបស់មន្រ្តីជាន់ខ្ពស់។ នៅក្នុងគម្រោងបញ្ជីគណៈរដ្ឋមន្ត្រីថ្មីនោះ លោក ហ៊ុន ម៉ានី កូនប្រុសរបស់លោកនាយករដ្ឋមន្រ្តី ជារដ្ឋមន្ត្រីក្រសួងមុខងារសាធារណៈ លោក សាយ សំអាល់ បច្ចុប្បន្នជារដ្ឋមន្រ្តីក្រសួងបរិស្ថាន ជារដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ហេង សួរ រដ្ឋមន្ត្រីក្រសួងការងារ លោក ទៀ សីហា កូនប្រុសរបស់លោក ទៀ បាញ់ រដ្ឋមន្រ្តីក្រសួងការពារជាតិ លោក ស សុខា កូនប្រុសរបស់លោក ស ខេង ជារដ្ឋមន្រ្តីក្រសួងមហាផ្ទៃជាដើម។ ចំណែកកាលពីពេលថ្មីៗនេះ កូនប្រុសរបស់លោក ឌិត មុន្ទី គឺ លោក ឌិត ទីណា សមាជិកគណៈអចិន្ត្រៃយ៍គណបក្សប្រជាជនកម្ពុជា ត្រូវបានលោកនាយករដ្ឋមន្រ្តី ហ៊ុន សែន ជ្រើសរើសមកធ្វើជារដ្ឋមន្រ្តីក្រសួងកសិកម្មថ្មី។
អ្នកវិភាគនយោបាយ លោក មាស នី ប្រាប់វីអូអេកាលពីថ្ងៃច័ន្ទថា ការរុះរើគណៈរដ្ឋមន្ត្រីលើកនេះមានលក្ខណៈបក្ខពួក និងគ្រួសារនិយម ខណៈលោកចោទសួរថា តើប្រព័ន្ធដឹកនាំនឹងកាន់តែរឹងមាំ ឬក៏កាន់តែទន់ខ្សោយ។
លោកថ្លែងថា៖ «ជាបទពិសោធន៍ដែលយើងឃើញកន្លងមកហើយ គឺកាលណាប្រព័ន្ធគ្រប់គ្រងរដ្ឋ វាក្រាស់ទៅដោយគ្រួសារ បណ្តាញក្នុងគ្រួសារច្រើនពេកគឺវាអាចធ្វើឱ្យប្រព័ន្ធរដ្ឋហ្នឹង គឺអត់ដើរទេ ហើយមនុស្សលែងស្តាប់ច្បាប់ហើយ ទៅស្តាប់បុគ្គលវិញ»។
លោក មាស នី អះអាងថា បើដាក់អ្នកដឹកនាំថ្មីតាមរយៈសែស្រឡាយ ហើយមិនមានសមត្ថភាពក៏ជាកត្តាធ្វើឱ្យប្រព័ន្ធរដ្ឋចុះខ្សោយ។ លោកបន្ថែមថា បើទោះជាពួកគេមានសមត្ថភាព ប៉ុន្តែវាចាក់ស្មុគទៅដោយគ្រួសារ ក៏ដូចជាបក្ខពួកនិយមនៅក្នុងប្រព័ន្ធដឹកនាំរដ្ឋក៏ជាឧបសគ្គដែរ។
បើតាមលោក មាស នី កម្ពុជានៅដើរក្រោយឆ្ងាយ បើប្រៀបធៀបនឹងបណ្តាប្រទេសផ្សេងៗក្នុងតំបន់។ ដូច្នេះលោកថា អ្វីដែលរដ្ឋមន្រ្តីថ្មីត្រូវធ្វើគឺខិតខំពង្រឹងសមត្ថភាពកម្ពុជាទាំងផ្នែកសេដ្ឋកិច្ច សង្គម និងនយោបាយដើម្បីបើកផ្លូវឱ្យដើរទាន់គេ។
លោកថ្លែងថា៖ «ប៉ុន្តែបើសិនជាយើងនៅជុំជើងតទៅទៀតនោះ គេចេះតែទៅមុខឆ្ងាយ ហើយយើងមិនបានរត់ឱ្យទាន់គេ។ នេះអ្នកជំនាន់ថ្មីត្រូវតែយល់ បង្ហាញពីសមត្ថភាពទៅដើម្បីនាំកម្ពុជាដើរឱ្យទាន់គេ ទាន់ឯង។ នេះជារឿងសំខាន់សម្រាប់អ្នកដឹកនាំជំនាន់ថ្មី»។
ថ្លែងនៅក្នុងពិធីចែកសញ្ញាបត្រដល់និស្សិត កាលពីថ្ងៃអង្គារ លោក ហ៊ុន សែន ថ្លែងថា ភាពជាអ្នកដឹកនាំ អ្វីដែលសំខាន់ គឺចេះដាក់ចេញគោលនយោបាយ និងដឹកនាំឱ្យបានត្រឹមត្រូវ។
លោក ហ៊ុន សែន ថ្លែងថា៖ «ភាពជាអ្នកដឹកនាំអ្វីដែលសំខាន់ គឺចេះប្រើប្រាស់មន្ត្រី ដែលនៅក្រោមការគ្រប់គ្រងរបស់ខ្លួនឱ្យធ្វើការ។ បញ្ហាវានៅកន្លែងហ្នឹង ដាក់ចេញនូវគោលនយោបាយ និងដឹកនាំឱ្យវាបានត្រឹមត្រូវ តែប៉ុណ្ណឹងទេ។ ខ្ញុំមិនប្រដៅចំពោះអ្នកវិភាគ ឬអ្នកដែលលើកឡើងនោះទេ ក៏ប៉ុន្តែខ្ញុំគួរតែរំឭកថា កុំវាយតម្លៃរហ័សពេក ហើយក៏កុំគិតថា វាទាល់តែអញជាជំនាញកសិកម្ម ទើបសមរម្យ»។
ថ្នាក់ដឹកនាំគណបក្សប្រជាជនកម្ពុជាបានត្រៀមមនុស្សជំនាន់ថ្មីរបស់ខ្លួន ដែលទទួលបានការសិក្សាកម្រិតខ្ពស់ ហើយភាគច្រើនមានថវិកា និងសមត្ថភាពបានទៅសិក្សានៅក្រៅប្រទេសផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់វីអូអេកាលពីថ្ងៃច័ន្ទថា ព័ត៌មានដែលផ្សព្វផ្សាយពីបញ្ជីគណៈរដ្ឋមន្ត្រីថ្មីមិនមែនជាការណ៍ពិតឡើយ។ លោកបន្ថែមថា គណបក្សប្រជាជនកម្ពុជានឹងជ្រើសរើសមន្រ្តីមានសមត្ថភាពមកដឹកនាំក្រសួងស្ថាប័ន ហើយការដាក់មន្រ្តីក្មេងមិនបង្កជាជម្លោះនៅក្នុងគណបក្សឡើយ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា ប្រាប់វីអូអេថា លោកសាទរចំពោះការដែលគណបក្សកាន់អំណាចកំពុងរៀបចំក្រុមរដ្ឋមន្រ្តី ដែលលោកចង់ឃើញគំនិតប្លែកថ្មីក្នុងការដឹកនាំរបស់ពួកគេ។
លោកថ្លែងថា៖ «ក៏ប៉ុន្តែអ្វីដែលខ្ញុំទន្ទឹងរង់ចាំពាក់ព័ន្ធទស្សនៈ គំនិតរបស់អ្នកដឹកនាំថ្មីវាប្លែក វាភ្លឺថ្លា វាប្រសើរជាងអ្នកជំនាន់មុន។ អាហ្នឹងជាការរង់ចាំរបស់ខ្ញុំថា តើគាត់គិតចេញនៅពេលណា ឬក៏បង្ហាញនៅពេលណា។ យើងមិនទាន់ហ៊ានថា ទេ។ ប៉ុន្តែអ្វីដែលយើងមើលវាអត់ឃើញ មានតែរង់ចាំហើយ»។
បើតាមលោក ឯម សុវណ្ណារ៉ា ការដាក់មន្រ្តីដឹកនាំថ្មីរបស់គណបក្សប្រជាជនកម្ពុជា ដោយការដកអ្នកចាស់ចេញ មិនជាបញ្ហាឡើយ ប៉ុន្តែអ្វីដែលសំខាន់ឱ្យតែអ្នកដឹកនាំថ្មីជាអ្នកមានសមត្ថភាព និងអាចបម្រើផលប្រយោជន៍ប្រជាជនបាន ជាពិសេសនៅតែទទួលបានការគាំទ្រពីប្រជាពលរដ្ឋ។ លោកបន្ថែមថា រដ្ឋមន្ត្រីក្មេងៗជាចរន្តមួយថ្មី ដោយសារតែ បើដូរនាយករដ្ឋមន្ត្រី ប៉ុន្តែមិនមានការដូររដ្ឋមន្ត្រីចាស់ នោះនឹងពិបាកក្នុងការគ្រប់គ្រង។
អ្នកស្រាវជ្រាវនៅវិទ្យាស្ថានខ្មែរសម្រាប់សហប្រតិបត្តិការនិងសន្តិភាព លោក វណ្ណ ប៊ុនណា យល់ថា អ្នកដឹកនាំឈាមថ្មីរបស់គណបក្សប្រជាជនកម្ពុជានឹងមិនមានគំនិតផ្លាស់ប្តូរអ្វីថ្មីច្រើនឡើយ ខណៈថា ប្រព័ន្ធដឹកនាំរបស់អ្នកចាស់បានចងព័ទ្ធពួកគេរួចទៅហើយ។ ដូច្នេះ លោកថា វាពិបាកសម្រាប់អ្នកជំនាន់ថ្មីផ្លាស់ប្តូរ។
លោកថ្លែងថា៖ «អ៊ីចឹងជារួម ខ្ញុំទោះបីជាមានការផ្លាស់ប្តូរឱ្យយុវជន ក្មេងៗជាឈាមស្រករថ្មីរបស់គណបក្សប្រជាជនក្នុងការបន្តដឹកនាំអាណត្តិក្រោយយ៉ាងណាក៏ដោយ ក៏យើងពិបាកក្នុងការវាយតម្លៃថា មានការផ្លាស់ប្តូររបៀបរបបក្នុងការដឹកនាំធំដុំណាស់ ដោយសារប្រព័ន្ធដែលគាត់ធ្វើការសព្វថ្ងៃគឺកើតចេញដោយសារមនុស្សជំនាន់ចាស់របស់គណបក្សប្រជាជន ដែលវាមានភាពស្មុគស្មាញ និងមនុស្សគិតតែរឿងផលប្រយោជន៍ច្រើន ទាក់ទងផលប្រយោជន៍បក្ខពួក ផលប្រយោជន៍នយោបាយច្រើន។ ដូច្នេះក៏ពិបាកក្នុងការចៀសផុតពីចំណុចអស់ទាំងនេះណាស់»។
គួរបញ្ជាក់ថា ព័ត៌មានអំពីគណបក្សកាន់អំណាចត្រៀមរៀបចំដាក់មនុស្សជំនាន់ក្រោយឱ្យចូលទៅកាន់តំណែងតាមក្រសួងផ្សេងៗនោះ បានលេចឮក្រោយពីមហាសន្និបាតវិសាមញ្ញគណបក្សប្រជាជនកម្ពុជាបានសម្រេចជ្រើសរើសលោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ជាបេក្ខជននាយករដ្ឋមន្ត្រី។ លោកនាយករដ្ឋមន្រ្តី ហ៊ុន សែន ធ្លាប់បានបញ្ជាក់ថា ថ្នាក់ដឹកនាំថ្មីត្រូវតែមនុស្សជំនាន់ថ្មី ដែលមានវ័យមិនលើសពីលោក ហ៊ុន ម៉ាណែតឡើយ៕
