ចៅក្រមសាលាឧទ្ធរណ៍នៅព្រឹកថ្ងៃសុក្រនេះប្រកាសច្រានចោលបណ្តឹងជំទាស់របស់លោករ៉ាត់ រត្នមុនី ដែលត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារពីរឆ្នាំ កាលពីខែមិថុនាកន្លងទៅ បន្ទាប់ពីលោកជួយបកប្រែឲ្យអ្នកយកព័ត៌មានរបស់បណ្តាញព័ត៌មានរដ្ឋរុស្ស៊ី RT (Russia Today) ក្នុងការផលិតខ្សែភាពយន្តឯកសារ «ម្ដាយខ្ញុំលក់ខ្ញុំ»។
លោក ទូច ថារិទ្ធ មន្ត្រីនាំពាក្យសាលាឧទ្ធរណ៍ប្រាប់ VOA ថា ប្រធានអង្គជំនុំជម្រះលោកចៅក្រម ប្លង់ សំណាង បានសម្រេចតម្កល់សាលក្រមរបស់សាលាដំបូងរាជធានីភ្នំពេញ ដែលកាត់ទោសលោក រ៉ាត់ រត្នមុនីឲ្យជាប់ពន្ធនាគាររយៈពេលពីរឆ្នាំ ទុកជាបានការ។
លោកបញ្ជាក់ថា៖ «មូលហេតុគាត់យោងនៅក្នុងសាលដីកាហ្នឹង គាត់បានសរសេរហើយ ដោយសារតែសម្អាងហេតុ និងភស្តុតាងដែលសាលាដំបូងរាជធានីភ្នំពេញ ដែលចៅក្រមស៊ើបសួរគាត់បានសម្រេចនេះ គឺស្របតាមលក្ខណៈច្បាប់អស់ហើយ»។
កាលពីថ្ងៃទី២៦ ខែមិថុនា ឆ្នាំ២០១៩ សាលាដំបូងរាជធានីភ្នំពេញបានផ្តន្ទាទោសលោក រ៉ាត់ រត្នមុនី ឲ្យជាប់ពន្ធនាគាររយៈពេលពីរឆ្នាំ ពីបទ «ញុះញង់ឲ្យមានការរើសអើង» ពាក់ព័ន្ធនឹងការចេញផ្សាយខ្សែភាពយន្តឯកសារ «ម្ដាយខ្ញុំលក់ខ្ញុំ» ដែលផលិតដោយសារព័ត៌មានរដ្ឋរុស្ស៊ី RT។ តុលាការក៏បានបង្គាប់ឲ្យលោកបង់ប្រាក់ជំងឺចិត្តចំនួន ៧០លានរៀល ឬស្មើនឹងប្រមាណ១៧,៥០០ដុល្លារអាមេរិក ដល់ដើមបណ្តឹងរដ្ឋប្បវេណីចំនួនពីរនាក់ ដែលជាតួសម្តែងក្នុងភាពយន្តឯកសារ «ម្តាយខ្ញុំលក់ខ្ញុំ» នេះ។
លោក ឡោ ជុនធី មេធាវីមួយរូបរបស់លោក រ៉ាត់ រត្នមុនី និយាយថា ការសម្រេចរបស់សាលាឧទ្ធណ៍មានភាពអយុត្តិធម៌ និងមិនសមហេតុផលនោះទេ។ លោកបន្តថា ក្នុងលិខិតរបស់សារព័ត៌មាន RT អះអាងថា កូនក្តីរបស់លោកគ្រាន់តែជាអ្នកបកប្រែ មិនមែនជាអ្នកដឹកនាំផលិតវីដេអូនោះទេ។
លោកថ្លែងថា៖ «ខ្ញុំយល់ឃើញថា វាអត់សូវសមហេតុផល។ យើងបានតវ៉ាក្នុងសវនាការកន្លងទៅ គឺថាគាត់អត់មានតួនាទីក្នុងការផលិតខ្សែវីដេអូហ្នឹងទេ គាត់គ្រាន់តែជាអ្នកចូលរួម គ្រាន់តែអ្នកស៊ីឈ្នួលគេ»។
មេធាវីរូបនេះបន្ថែមថា លោកនឹងពិភាក្សាជាមួយកូនក្តីរបស់លោក ថានឹងត្រូវប្តឹងទៅតុលាការកំពូលជាបន្តទៀត ឬយ៉ាងណា។
មុនការកាត់ទោសលោក រ៉ាត់ រ័ត្នមុន្នី កាលពីចុងខែមិថុនានេះ អ្នកស្រី Ekaterina Yakovleva ប្រធានផ្នែកផលិតភាពយន្តឯកសាររបស់បណ្តាញព័ត៌មាន RT បានសរសេរលិខិតមួយទៅលោក កែ វិចិត្រ ឯកអគ្គរាជទូតកម្ពុជាប្រចាំក្រុងម៉ូស្គូ ប្រទេសរុស្ស៊ី ដោយបានបញ្ជាក់ជាថ្មីថា លោក មុនី ពិតជាអ្នកបកប្រែ និងសម្របសម្រួលការទំនាក់ទំនងឲ្យបណ្តាញព័ត៌មាន RT ប្រាកដមែន។
អ្នកស្រី ឡុង គឹមហ៊ាង ភរិយារបស់លោក រ៉ាត់ រត្នមុនី និងជាអតីតមន្ត្រីការពារសិទ្ធិលំនៅឋានដែលកំពុងភៀសខ្លួននៅក្រៅប្រទេសជាមួយកូនប្រុស ប្រាប់ VOA ថាអ្នកស្រីមានការខកចិត្តយ៉ាងខ្លាំងចំពោះការសម្រេចរបស់សាលាឧទ្ធរណ៍៖
«ថ្ងៃនេះគ្រួសារខ្ញុំ ប្តីខ្ញុំ រងទុក្ខអយុត្តិធម៌ ដោយសារតែប្រព័ន្ធតុលាការកម្ពុជា សម្រេចដោយអយុត្តិធម៌មកលើប្តីរបស់ខ្ញុំ។ ខ្ញុំពិតជាអស់សង្ឃឹម ខកចិត្តនឹងតុលាការកម្ពុជាខ្លាំងណាស់ ហើយពិតជាមិនរំពឹងទេថាមានយុត្តិធម៌សម្រាប់គ្រួសារខ្ញុំ ប្តីរបស់ខ្ញុំ»។
ភាពយន្តឯកសារ «ម្តាយខ្ញុំលក់ខ្ញុំ» ជាវីដេអូឯកសាររៀបរាប់ពីម្តាយម្នាក់ ដែលមានជីវភាពក្រីក្រ និងរុំព័ទ្ធដោយបំណុល ហើយសុខចិត្តលក់កូនស្រីរបស់ខ្លួនឲ្យជនបរទេសដើម្បីយកប្រាក់មកផ្គត់ផ្គង់ជីវភាពគ្រួសារ។
បន្ទាប់ពីវីដេអូនោះត្រូវបានផ្សព្វផ្សាយ រដ្ឋាភិបាលកម្ពុជាមានការខឹងសម្បារ ហើយបានចោទប្រកាន់ថាលោក រ៉ាត់ រត្នមុនី និងទូរទស្សន៍រុស្ស៊ីនោះ បានបង្កើតសាច់រឿង និងបានសូកលុយជនរងគ្រោះក្នុងវីដេអូ ឲ្យសម្តែងដើម្បីបង្ខូចកិត្តិយសរបស់រដ្ឋាភិបាល។ យ៉ាងណាក្តី រដ្ឋាភិបាលកម្ពុជាមិនបានចាត់វិធានការផ្លូវច្បាប់ណាមួយប្រឆាំងនឹងទូរទស្សន៍បរទេសនោះទេ ប៉ុន្តែបានចាប់ឃុំខ្លួនលោក រ៉ាត់ រត្នមុនី ដែលជាអ្នកបកប្រែតែប៉ុណ្ណោះ។
លោក អំ សំអាត នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (Licadho)លើកឡើងថា ការសម្រេចទោសលើលោក រ៉ាត់ រ័ត្នមុនី គឺមិនសមហេតុផលហើយវាធ្វើឲ្យប៉ះពាល់ដល់សកម្មភាពការងាររបស់អង្គការសង្គមស៊ីវិល និងសារព័ត៌មាននៅកម្ពុជា។
មន្ត្រីសិទ្ធិមនុស្សរូបនេះបញ្ជាក់ថា៖ «ខ្ញុំគិតថា វាមិនមានមូលដ្ឋានគ្រប់គ្រាន់ទេក្នុងការសម្រេចទោសលើគាត់ វាជារឿងមួយអយុត្តិធម៌ណាស់សម្រាប់គាត់ហ្នឹង។ បញ្ហាទីពីរយើងដឹងហើយថា ការសម្រេចក្តីនេះប៉ះពាល់ដល់សកម្មភាពរបស់សង្គមស៊ីវិល ព្រោះគាត់ធ្វើការពាក់ព័ន្ធនឹងសកម្មភាពសង្គមស៊ីវិលនេះដែរ ហើយក្នុងនាមចង់ជួយប្រយោជន៍សង្គម»។
លោក អំ សំអាត បន្ថែមថា រដ្ឋាភិបាលកម្ពុជាគួរព្យាយាមទប់ស្កាត់ និងបង្ក្រាបបទល្មើសជួញដូរមនុស្ស ជាជាងចាប់ខ្លួនអ្នកផ្សាយវីដេអូបង្ហាញអំពីបញ្ហានេះ។
កាលពីឆ្នាំ២០១៧ លោក រ៉ាត់ រត្នមុនី ដែលជាសកម្មជនសិទ្ធិពលករ ត្រូវបានបណ្តាញព័ត៌មាន RT ជួលឲ្យជួយការងារផលិតភាពយន្តឯកសារ «ម្តាយខ្ញុំលក់ខ្ញុំ»។
ក្រោយពីវីដេអូឯកសារ«ម្តាយខ្ញុំលក់ខ្ញុំ»នេះត្រូវបានផ្សព្វផ្សាយនៅខែកញ្ញា ឆ្នាំ២០១៨ រដ្ឋាភិបាលកម្ពុជាបានចោទថា ភាពយន្តឯកសារនោះគឺជាការប្រឌិតក្នុងគោលបំណងធ្វើឲ្យខូចកិត្តិយសរបស់កម្ពុជា។ ដោយមានការភ័យខ្លាចពីការធ្វើទុក្ខបុកម្នេញពីសំណាក់រដ្ឋាភិបាលកម្ពុជា លោក រ៉ាត់ រត្នមុនី និងគ្រួសារ បានគេចទៅប្រទេសថៃ ដើម្បីស្វែងរកសុំសិទ្ធិជ្រកកោន។
លោកត្រូវបានរដ្ឋាភិបាលថៃចាប់ខ្លួន និងបញ្ជូនមកកម្ពុជាវិញ កាលពីខែធ្នូ ឆ្នាំ២០១៨ ទៅតាមការស្នើសុំរបស់រដ្ឋាភិបាលកម្ពុជា។
ការចាប់ខ្លួន និងកាត់ទោសលោក រ៉ាត់ រត្នមុនី បានរងការរិះគន់យ៉ាងខ្លាំងពីក្រុមអង្គការសិទ្ធិមនុស្ស។ ហើយក្រុមអង្គការការពារសិទ្ធិមនុស្សក៏បានទាមទារឲ្យដោះលែងលោកដោយឥតលក្ខខណ្ឌ៕
