ស្ថានទូតសហរដ្ឋអាមេរិកប្រចាំកម្ពុជានៅសុក្រនេះ បានបង្ហាញការសោកស្ដាយចំពោះការកាត់ទោសសកម្មជនការងារ លោករ៉ាត់ រត្នមុនី ឲ្យជាប់ក្នុងពន្ធនាគាររយៈពេលពីរឆ្នាំ ចំពោះការជួយរបស់លោកក្នុងការផលិតភាពយន្តឯកសារអំពីការជួញដូរផ្លូវភេទស្ត្រី និងកុមារនៅកម្ពុជា ដែលត្រូវបានដឹកនាំផលិតដោយបណ្តាញព័ត៌មានរដ្ឋរុស្ស៊ី Russia Today ឬ (RT)។
ក្នុងសារអេឡិចត្រូនិក ឬអ៊ីមែលរបស់ស្ថានទូតសហរដ្ឋអាមេរិកដែល VOA បានទទួលកាលពីថ្ងៃសុក្រ ស្ថានទូតបានសរសេរក្នុងន័យដើមថា៖ «សហរដ្ឋអាមេរិកគាំទ្រសេរីភាពក្នុងការបញ្ចេញមតិនៅទូទាំងពិភពលោក ដោយចាត់ទុកវាជាផ្នែកសំខាន់មួយនៃអភិបាលកិច្ចតាមលទ្ធិប្រជាធិបតេយ្យ។ យើងសូមអំពាវនាវឲ្យរដ្ឋាភិបាលកម្ពុជាអនុញ្ញាតឲ្យមនុស្សគ្រប់រូបអនុវត្តដោយសេរីនូវសិទ្ធិនេះ ដែលត្រូវបានការពារនៅក្រោមច្បាប់អន្តរជាតិ និងរដ្ឋធម្មនុញ្ញកម្ពុជា ដោយគ្មានរងការគំរាមកំហែងសងសឹក»។
ស្ថានទូតបានបន្ថែមថា សេរីភាពក្នុងការបញ្ចេញមតិក៏មានសារៈសំខាន់ចាំបាច់ផងដែរ ដល់ការចងក្រងឯកសារ និងលើកកម្ពស់ការយល់ដឹងទៅលើបញ្ហាជួញដូរមនុស្សរបស់ប្រទេសកម្ពុជា។
លោករ៉ាត់ រត្នមុនី វ័យ៤៧ឆ្នាំ ដែលជាអ្នកបកប្រែ ត្រូវបានតុលាការក្រុងភ្នំពេញកាត់ទោសពីបទ «ញុះញង់ឲ្យមានការរើសអើង» ពាក់ព័ន្ធទៅនឹងការចេញផ្សាយកុនឯកសាររឿង «ម្ដាយខ្ញុំលក់ខ្ញុំ» របស់បណ្ដាញទូរទស្សន៍រដ្ឋរុស្ស៊ី RT។
ការកាត់ទោសលោក រ៉ាត់ រត្នមុនី បានរងការរិះគន់យ៉ាងខ្លាំងពីក្រុមអង្គការសិទ្ធិមនុស្សអន្តរជាតិ ដែលបានចាត់ទុកលោក មុនី ថា គ្រាន់តែជាអ្នកបកប្រែមួយរូបឲ្យបណ្ដាញព័ត៌មាន RT ដែលមិនគួរណាត្រូវបានចាប់ខ្លួន និងគួរតែត្រូវបានដោះលែងដោយគ្មានលក្ខខណ្ឌ៕
