សាលាឧទ្ធរណ៍សហព័ន្ធកាលពីយប់ថ្ងៃពុធបានលើកថ្ងៃបង្ហាញខ្លួនចំពោះមុខមហាគណៈវិនិច្ឆ័យ របស់អតីតអនុប្រធានាធិបតីលោក Mike Pence កាន់តែជិតដើម្បីស៊ើបអង្កេតទៅលើកិច្ចប្រឹងប្រែងក្នុងការកែប្រែលទ្ធផលនៃការបោះឆ្នោតជ្រើសរើសប្រធានាធិបតីកាលពីឆ្នាំ២០២០ ដោយច្រានចោលសំណើរបស់មេធាវីលោក Trump ដើម្បីរារាំងការធ្វើសក្ខីកម្មនេះ។
ពេលវេលានៅមិនទាន់ច្បាស់នៅឡើយទេថាថ្ងៃណាលោក Pence ប្រហែលត្រូវបង្ហាញខ្លួននៅចំពោះមុខមហាគណៈវិនិច្ឆ័យ ដែលជាច្រើនខែមកហើយបានធ្វើការស៊ើបអង្កេតទៅលើព្រឹត្តិការណ៍នៅមុនថ្ងៃទី៦ ខែមករា ឆ្នាំ២០២១ ដែលមានការបះបោរនៅវិមានសភាសហរដ្ឋអាមេរិកនិងកិច្ចប្រឹងប្រែងរបស់លោក Trump និងក្រុមសម្ព័ន្ធមិត្តដើម្បីកែប្រែលទ្ធផលឆ្នោត។ ប៉ុន្តែសក្ខីកម្មរបស់លោក Pence ដែលនឹងធ្វើឡើងខណៈពេលលោកកាន់តែខិតជិតដល់ការចូលប្រកួតតំណែងប្រធានាធិបតីឆ្នាំ២០២៤ អាចជាចំណុចសំខាន់នៃការស៊ើបអង្កេត ហើយទំនងអាចនឹងផ្តល់ឱ្យក្រុមរដ្ឋអាជ្ញានូវបុគ្គលសំខាន់ដំបូង ខណៈពួកគេបន្តការសាកសួរ។
ដីការបញ្ជាពីអង្គចៅក្រម៣រូបនៃសាលាឧទ្ធរណ៍អាមេរិកមិនត្រូវបានបង្ហាញ ហើយគ្មានភាគីណាមួយត្រូវបានលើកឡើងនៅក្នុងកំណត់ត្រាអនឡាញរបស់តុលាការនោះទេ។ ប៉ុន្តែបណ្តឹងឧទ្ធរណ៍ក្នុងសំណុំរឿងបិទជិតនេះត្រូវបានធ្វើឡើង ត្រឹមប៉ុន្មានថ្ងៃប៉ុណ្ណោះ បន្ទាប់ពីចៅក្រមតុលាការជាន់ទាបបានបញ្ជាឱ្យលោក Pence ធ្វើសក្ខីកម្មទោះមានការជំទាស់ពីក្រុមរបស់លោក Trump ក្តី។
មេធាវីមួយរូបរបស់លោក Pence និងអ្នកនាំពាក្យម្នាក់របស់លោក Trump មិនទាន់ឆ្លើយតបនឹងអ៊ីម៉ែលស្នើសុំការអត្ថាធិប្បាយនៅឡើយទេ ហើយអ្នកនាំពាក្យម្នាក់របស់រដ្ឋអាជ្ញាពិសេសនៃក្រសួងយុត្តិធម៌ដែលដឹកនាំការស៊ើបអង្កេតនេះបានបដិសេធមិនធ្វើអត្ថាធិប្បាយ៕
