មានមនុស្សជាច្រើននៅក្នុងបន្ទប់សវនាការរបស់គណៈកម្មាធិការស៊ើបអង្កេតការវាយប្រហារលើវិមានសភា Capitol ៦មករា កាលពីយប់ថ្ងៃទី២១កក្កដាកន្លងទៅនេះ ក្នុងអគារ Cannon នៃរដ្ឋសភាស.រ.អ.។ ពួកអ្នកកាសែតបានប្រជ្រៀតគ្នាជុំវិញតុខាងក្រោយកៅអីសាក្សី។ ចំណេកសមាជិកសភាដែលមិនមែនជាសមាជិកគណៈកម្មាធិការនេះបានអង្គុយនៅជួរទីពីរ។ មានតែសមាជិកនៃគណបក្សប្រជាធិបតេយ្យក្នុងសភាទេ ដែលមានវត្តមាននៅពេលនោះ។
គណៈកម្មាធិការនេះបានបញ្ចាំងវីដេអូដែលបង្ហាញក្រុមកុបករនៅក្នុងរដ្ឋធានី Washington កាលពីថ្ងៃទី៦មករា២០២១ ដែលបានប្រឹងប្រែងចូលក្នុងសាលប្រជុំរដ្ឋសភាដែលនៅទីនោះសម័យប្រជុំរួមនៃសភាស.រ.អ.កំពុងប្រព្រឹត្តទៅដើម្បីប្រកាសលទ្ធផលនៃការបោះឆ្នោតប្រធានាធិបតី ជាផ្លូវការ។
កាម៉េរ៉ានៅថ្ងៃនោះបង្ហាញមេដឹកនាំនៃក្រុមសមាជិករដ្ឋសភាជឿនលឿននិយម គឺអ្នកតំណាងរាស្ត្រ លោកស្រី Pramila Jayapal ដែលភ័យខ្លាចការបះបោរនោះ។ លោកស្រីមានវត្តមានក្នុងសវនាការយប់ថ្ងៃព្រហស្បតិ៍ទី២១កក្កដា ហើយលោកស្រីមានការរំជួលចិត្តបន្ទាប់ពីបានឃើញរូបភាពលោកស្រីនៅអម្លុងការវាយប្រហារនោះ។
នៅក្នុងបទសម្ភាសន៍ជាមួយវីអូអេ លោកស្រី Jayapal បាននិយាយថា«និយាយដោយស្មោះទៅ ពិបាកមើលវីដេអូនេះណាស់ ពីព្រោះយើងទាំងអស់គ្នាបាននៅទីនេះជាមួយគ្នា ហើយភ័យខ្លាចអំពីជីវិតយើង។ តែនៅយប់នេះ ខ្ញុំក៏ខឹងសំបារដែរថាឧក្រិដ្ឋជនក្បត់ជាតិនេះបានឋិតក្នុងសេតវិមាន ហើយបានបណ្តាលឱ្យមានអំពើហិង្សានេះ។ ហើយអំពើហិង្សាមិនទាន់រលត់ទេ។ វានៅមានក្នុងបណ្តាទីក្រុងរបស់យើង។ នៅមានអំពើហិង្សា តែនៅមានមនុស្សដែលជឿថាការបោះឆ្នោតនោះមានការលួចបន្លំ។ ក្នុងនាមជាជនអន្តោប្រវេសន៏ ដែលបានមកប្រទេសអាមេរិកនៅពេលមានអាយុ១៦ឆ្នាំ ខ្ញុំពិបាកជឿថាណាស់ ពីព្រោះខ្ញុំគិតថាប្រទេសនេះជាប្រទេសប្រជាធិបតេយ្យដ៏អស្ចារ្យជាងគេក្នុងពិភពលោក ហើយស្រាប់តែមានរឿងនេះកើតឡើង»។
គណៈកម្មាធិការនេះបានបញ្ចាំងវីដេអូមិនទាន់កាត់តថ្មីមួយអំពីការរៀបចំរបស់លោក Trump នៅថ្ងៃទី៦មករា២០២០១ ដើម្បីថតសុន្ទរកថារបស់លោកនៅក្រោយកុបកម្មនោះ។ កាយវិការរបស់លោកបង្ហាញកំហឹងនៅពេលលោកចរចាជាមួយកូនស្រីលោក គឺអ្នកស្រី Ivanka អំពីអត្ថបទនៃសេចក្តីថ្លែងការណ៍របស់លោកតាមវីដេអូ។ នៅពេលសមអានអត្ថបទនោះ លោកបាននិយាយថា«ខ្ញុំមិនចង់និយាយថាការបោះឆ្នោតចប់ហើយទេ!»
លោក Mitch McConnell មេដឹកនាំគណបក្សប្រឆាំងក្នុងព្រឹទ្ធសភា ដែលកាលពីថ្ងៃទី៦មករា២០២១បានហៅទូរសព្ទទៅលោក Trump ហើយសុំឱ្យលោកជួយនោះ ក៏បានហៅទូរសព្ទទៅសមាជិកគ្រួសារលោក Trump ដែរនៅថ្ងៃនោះ ដោយបានពណ៌នាស្ថានការណ៍នៅកន្លែងថា«អាក្រក់ណាស់»។
លោកអនុប្រធានាធិបតី Mike Pence ដែលមានកងការពារសន្តិសុខនៅជាមួយលោក បាននៅជិតពួកកុបករដែលស្រែកបន្ទរថា«ព្យួរក Mike Pence»។ សាក្សីម្នាក់ដែលគណៈកម្មាធិការនេះមិនបានបង្ហាញអត្តសញ្ញាណ បាននិយាយថាពួកអ្នកការពារសន្តិសុខឱ្យលោកអនុប្រធានាធិបតីភ័យខ្លាចអំពីជីវិតពួកគេហើយបានហៅទូរសព្ទលាគ្រួសារពួកគេ។
តាំងពីថ្ងៃទី៩មិថុនាមកដល់ពេលនេះ គណៈកម្មាធិការ ៦មករាបានធ្វើសវនាការ៨លើកហើយ។ នៅក្នុងសវនាការ៧លើកដំបូង ពួកសមាជិកនៃគណៈកម្មាធិការនេះបានបង្ហាញការរកឃើញរបស់ពួកគេអំពីការប៉ុនប៉ងរបស់លោក Trump និងក្រុមអ្នកគាំទ្រលោកក្នុងការប្រែក្រឡះលទ្ធផលការបោះឆ្នោតប្រធានាធិបតីកាលពីឆ្នាំ២០២០។
សវនាការនីមួយៗបានបង្ហាញជ្រុងផ្សេងៗគ្នានៃការរកឃើញរបស់ពួកគេ។ ប្រធានបទមានរួមបញ្ចូលការទាក់ទិននិងការប្រុងប្រៀបរបស់ពួកស្តាំជ្រុលក្នុងកុបកម្មនោះ ការចោទប្រកាន់របស់លោក Trump ថាមានការបន្លំសន្លឹកឆ្នោតជាច្រើនក្នុងរដ្ឋ Georgia ទោះជាគ្មានឯកសារបង្ហាញពីការគៃបន្លំក៏ដោយ អាកប្បកិរិយារបស់ពួកមន្ត្រីសេតវិមានមួយចំនួនចំពោះការអះអាងអំពីជ័យជំនះដែលត្រូវលួចនិងការប៉ុនប៉ងបង្ខំលោក Pence ឱ្យច្រានចោលលទ្ធផលនៃការបោះឆ្នោតរបស់គណៈអ្នកបោះឆ្នោត។
ការឆ្លើយជាកសិណសាក្សីផ្ទាល់ខ្លួន ដូចជាសេចក្តីថ្លែងការណ៍របស់ពួកប៉ូលីសវិមានសភា Capitol ដែលបានប្រឈមជាមួយក្រុមកុបករ ពួកអ្នកជួយរៀបចំការបោះឆ្នោតដែលត្រូវបានយាយីបន្ទាប់ពីលោក Trump បានចោទអំពីការបន្លំសន្លឹកឆ្នោត អ្នកគាំទ្រ Trump ម្នាក់ដែលបានចូលរួមក្នុងបាតុកម្មកាលពីថ្ងៃទី៦មករា២០២១ ហើយបានដើរទៅកាន់វិមានសភា Capitol និងក្រុមសាក្សី បានផ្តល់ព័ត៌មានបន្ថែមក្នុងសវនាការនីមួយៗ។
ពួកសមាជិកនិងក្រុមបុគ្គលិកនៃគណៈកម្មាធិការស៊ើបអង្កេត៦មករា បានសម្ភាសន៍មនុស្សជាង១ពាន់នាក់ ដោយមិនឱ្យអ្នកក្រៅចូលរួម។ អ្នកទាំងនោះមានរួមមនុស្សដែលលោក Trump ទុកចិត្ត ដូចជាអតីតមេធាវីរបស់លោក គឺលោក Giuliani និងលោក Sidney Powell ឧត្តមសេនិយចូលនិវត្តន៍ Michael Flynn ទីប្រឹក្សាច្បាប់សេតវិមានលោក Pat Cipollone និង លោក Eric Herschmann អ្នកជំនួយការម្នាក់របស់នាយខុទ្ទកាល័យសេតវិមានគឺអ្នកស្រី Cassidy Hutchinson សមាជិកគ្រួសារលោក Trump មានរួមអ្នកស្រី Ivanka Trump និងលោក Jared Kushner ព្រមទាំងសមាជិកខ្លះនៃគណៈរដ្ឋមន្ត្រី មានរួមលោក William Barr អតីតរដ្ឋមន្ត្រីក្រសួងយុត្តិធម៌ និងលោកឧត្តមសេនិយ Mark Milley ប្រធាននាយសេនាធិការចម្រុះកងយោធពលស.រ.អ.។
សមាជិកសភានៃគណបក្សសាធារណរដ្ឋពីរនាក់បានយល់ព្រមបម្រើការក្នុងគណៈកម្មាធិការនេះដែលមានសមាជិក៩នាក់។ ពួកគេត្រូវបានតែងតាំងដោយលោកស្រី Nancy Pelosi ប្រធានរដ្ឋសភាដែលជាសមាជិកនៃគណបក្សប្រជាធិបតេយ្យ មិនមែនត្រូវតែងតាំងដោយពួកមេដឹកនាំគណបក្សពួកគេឡើយ។
លោកស្រី Cheney សមាជិករដ្ឋសភានៃគណបក្សសាធារណរដ្ឋមកពីរដ្ឋ Wyoming បាននិយាយទៅកាន់ក្រុមសមាជិកគណបក្សលោកស្រីនៅក្នុងសវនាការទីមួយថា៖
«ខ្ញុំសូមប្រាប់សហសេវិករបស់ខ្ញុំមកពីគណបក្សសាធារណរដ្ឋដែលកំពុងការពារជនមិនអាចការពារបាន គឺថានឹងមានថ្ងៃមួយលោក Donald Trump នឹងទៅបាត់ តែការខូចកេរ្តិ៍ឈ្មោះរបស់លោកអ្នកនឹងមានតទៅទៀត»។
លោក McCarthy ដែលជាអ្នកគាំទ្រលោក Trump ម្នាក់ បានប្រកែកច្រើនដងមិនព្រមសហការជាមួយគណៈកម្មាធិការនេះទេ។
លោក Jason Jay Smart ជាអ្នកពិគ្រោះយោបល់នយោបាយអាមេរិកាំងម្នាក់ដែលបានផ្តល់យោបល់អំពីការធ្វើយុទ្ធនាការឃោសនាបោះឆ្នោតអន្តរជាតិនិងយុទ្ធនាការឃោសនាបោះឆ្នោតរបស់គណបក្សសាធារណរដ្ឋ។ លោកថាលោកយល់ថាការមាន ការស៊ើបអង្កេតអំពីការវាយប្រហារកាលពីថ្ងៃទី៦មករា២០២១និងពេលវេលានៃការធ្វើសវនាការរបស់គណៈកម្មធិការនេះជា«យុទ្ធនាការនយោបាយមួយសម្រាប់ធ្វើឱ្យឃើញថាលោក Trump អាក្រក់»។
លោក Smart បានថ្លែងថា«ហេតុដូចម្តេចបានជាការចោទប្រកាន់នេះខុសប្លែក ហេតុដូចម្តេចបានជាវាកើតមាននៅពេលនេះ។ នេះជាសំណួរមួយ។ វាមិនមែនជារឿងចៃដន្យទេ ដែលពីរឆ្នាំក្រោយព្រឹត្តិការណ៍៦មករា២០២១ ស្រាប់តែមានការស៊ើបអង្កេតនៅពេលនេះ ជាពិសេសនៅមុនការបោះឆ្នោតពាក់កណ្តាលអាណត្តិ ដែលនឹងធ្វើឡើងបីខែទៀត»។
លោក Smart បាននិយាយថា«បើលោកអ្នកពិនិត្យមើលការចោទប្រកាន់លោកTrump ក្នុងព្រឹទ្ធសភា ការណ៍នេះមិនបានប៉ះពាល់ដល់លោក Trump យូរទេ។ ក្នុងរយៈពេលខ្លី វានឹងនាំឱ្យមានការប៉ះពាល់។ ហើយការណ៍នេះក៏នឹងមិននាំឱ្យមានការប្រែប្រួលក្នុងចំណោមក្រុមអ្នកគាំទ្រលោកផ្កាប់មុខដែលនឹងមិនផ្លាស់ប្តូរមតិពួកគេដោយសារការស៊ើបអង្កេតនេះទេ។ តែពួកអ្នកមិនទាន់សម្រេចចិត្តប្រហែលជានឹងមានមតិអវិជ្ជមានអំពីលោក Trump សម្រាប់ពេលនេះ»។
លោកស្រី Jennifer Mercieca សាស្ត្រាចារ្យជំនួយនៅសាកលវិទ្យាល័យ A&M ក្នុងរដ្ឋ Texas ដែលបង្រៀនវិជ្ជារដ្ឋាភិបាល បានធ្វើការស្រាវជ្រាវអំពីវោហារសាស្ត្រសាធារណៈនិងវប្បធម៌នយោបាយអាមេរិកាំង។
លោកស្រីបាននិយាយថាគណៈកម្មាធិការនេះបានបង្ហាញករណីខ្លាំងមួយអំពីមុខនាទីរបស់លោក Trump ក្នុងការបះបោរនោះ។ លោកស្រីបានថ្លែងថាជាការសំខាន់់ដែលគណៈកម្មាធិការ៦មករា សុំសក្ខីកម្មពីពួកសមាជិកអតីតរដ្ឋបាលលោក Trump និងពីពួកមនុស្សក្នុងចលនាស្តាំជ្រុល ដូចជាក្រុម Oath Keepers ជាដើម។
លោកស្រីបាននិយាយថា«ខ្ញុំយល់ថា ទោះជាលោកអ្នកមិនទុកចិត្តហេតុផលនៃពួកសមាជិកគណៈកម្មាធិការនេះក៏ដោយ ក៏គណៈកម្មាធិការ៦មករាបានផ្តល់ភស្តុតាងមកពីពួកសាធារណរដ្ឋដែលបានធ្វើការជាមួយលោក Trump ក្នុងរដ្ឋបាលរបស់លោកដែរ។ អ្នកទាំងនោះដែលបានផ្តល់សក្ខីកម្មជូនគណៈកម្មាធិការនេះ យ៉ាងល្អប្រសើរ នៅពេលសុវត្ថិភាពពួកគេនិងគ្រួសាររបស់ពួកគេរងការប្រថុយប្រថាន។ ពួកគេមិនបានចំណេញអ្វីពីការផ្តល់សក្ខីកម្មទាំងនេះទេ ដែលមានន័យថាពួកគេជាអ្នកនិយាយការពិត»៕
ប្រែសម្រួលដោយលោក ឈឹម សុមេធ
