អ្នកវិភាគមើលឃើញថាបញ្ហាពលករចំណាកស្រុកកម្ពុជាដែលមានជាងមួយលាននាក់នាពេលបច្ចុប្បន្ននេះអាចនឹងជាកត្តាគំរាមមួយដល់សេដ្ឋកិច្ចនិងនយោបាយកម្ពុជាក្នុងពេលខាងមុខជាពិសេសអ្នកដែលទៅធ្វើការនៅប្រទេសថៃដែលអាចងាយរងគ្រោះដោយសារបញ្ហានយោបាយផ្ទៃក្នុងនៅទីនោះ។
លោក អ៊ូ វីរៈ ប្រធាននិងជាស្ថាបនិកនៃវេទិកាអនាគតដែលសិក្សាលើគោលនយោបាយនានាបានបញ្ជាក់ក្នុងកម្មវិធីហេឡូវីអូអេប្រចាំខែកាលពីថ្ងៃច័ន្ទថា ក្នុងករណីដែលប្រទេសថៃមានវិបត្តិផ្ទៃក្នុងពួកគេនឹងខិតខំព្យាយាមបង្វែរបញ្ហាផ្ទៃក្នុងមកផ្តោតលើបញ្ហាពលករចំណាកស្រុកកម្ពុជានិងបញ្ហាព្រំដែនជាមួយកម្ពុជា។ ករណីនេះអាចនឹងកើតឡើងនៅពេលដែលមានការផ្ទេររាជ្យបល្ល័ង្គដោយសារតែព្រះរាជសុខភាពរបស់ព្រះមហាក្សត្រថៃកាន់តែទ្រុឌទ្រោមខ្លាំងដែលមើលទៅអាចនឹងមានការប្រែប្រួលក្នុងឆ្នាំ២០១៥នេះឬឆ្នាំក្រោយ។
លោក អ៊ូ វីរៈ បានបញ្ជាក់ថា៖ «ក្នុងករណីដែលប៉ះពាល់ក្នុងប្រទេសថៃ អ្វីដែលយើងព្រួយបារម្ភមែនទែនគឺសេដ្ឋកិច្ចហើយទីពីរគឺការហូរចូលប្រជាពលរដ្ឋ១លាននាក់ដែលជាមូលដ្ឋានធ្វើឱ្យច្របូកច្របល់ក្នុងប្រទេសកម្ពុជា។ ពួកគាត់អាចប្រឈមមុខនឹងការអត់ឃ្លាន អត់បាយដោយសារគ្មានសេវាកម្មបណ្តោះអាសន្នជួយពួកគាត់»។
មូលហេតុសំខាន់ដែលនាំឱ្យពលករកម្ពុជាធ្វើចំណាកស្រុកក្នុងប្រទេសនិងក្រៅប្រទេសគឺដោយសារកត្តាសេដ្ឋកិច្ចនិងភាពទាក់ទាញរបស់ទីកន្លែងដែលគេត្រូវទៅធ្វើការដោយមិនថាឡើយក្នុងស្រុកឬក្រៅស្រុកទេ។ នេះបើតាមការបញ្ជាក់របស់លោក អ៊ូ វីរៈ។
អង្គការឃ្លាំមើលនានាឱ្យដឹងថា មានពលករចំណាកស្រុកកម្ពុជាប្រហែលមួយលាននាក់កំពុងធ្វើការនៅក្នុងប្រទេសថៃទាំងស្របច្បាប់និងមិនស្របច្បាប់។ ពលករទាំងនេះផ្ញើថវិកាដែលរកបានមកឱ្យក្រុមគ្រួសារនៅក្នុងប្រទេសមានរហូតដល់៥០០លានដុល្លារជារៀងរាល់ឆ្នាំ។
ពលករចំណាកស្រុកកម្ពុជាដែលទៅធ្វើការនៅប្រទេសថៃ កូរ៉េខាងត្បូង ម៉ាឡេស៊ីនិងប្រទេសដទៃទៀតបានផ្ញើប្រាក់មកក្រុមគ្រួសារវិញយ៉ាងហោចណាស់ចំនួន១០០០លានដុល្លារក្នុងមួយឆ្នាំៗ។ នេះបើតាមការបញ្ជាក់របស់ក្រសួងការងារ។
លោក ហេង សួរ អ្នកនាំពាក្យក្រសួងការងារបានបញ្ជាក់ពីវិធានការបង្កាក្នុងពេលអនាគតថា៖
«ដើម្បីទប់ស្កាត់នូវបញ្ហានេះគឺថាយើងត្រូវបង្កើតឱកាសការងារនៅក្នុងប្រទេសកម្ពុជាផ្សព្វផ្សាយឱកាសការងារ ហើយទីពីរខិតខំធ្វើយ៉ាងម៉េចលើកទឹកចិត្តឱ្យបងប្អូនប្រជាពលរដ្ឋរបស់យើងជ្រើសរើសធ្វើចំណាកស្រុកដោយស្របច្បាប់ដើម្បីត្រូវបានការពារដោយច្បាប់នៃប្រទេសទាំងពីរ»។
កាលពីខែមិថុនានិងកក្កដាឆ្នាំ២០១៤ប្រទេសថៃបានបញ្ជូនពលករចំណាកស្រុកកម្ពុជាដែលលួចទៅធ្វើការដោយមិនមានក្រដាសស្នាមត្រឹមត្រូវចំនួនជាង២សែននាក់ត្រឡប់មកវិញនៅពេលដែលប្រទេសនេះមានវិបត្តិផ្ទៃក្នុងដោយក្រុមយោធាបានធ្វើរដ្ឋប្រហារទម្លាក់នាយករដ្ឋមន្ត្រីស្របច្បាប់ យីងឡាក់ ស៊ីណាវ៉ាត់។
លោក អ៊ូ វីរៈ ក៏បានព្រមានផងដែរថា កត្តាមីក្រូឥណទានក៏អាចជាឧបសគ្គថ្មីមួយទៀតសម្រាប់កម្ពុជាផងដែរប្រសិនបើមិនមានការគ្រប់គ្រងឱ្យបានត្រឹមត្រូវព្រោះវានឹងធ្វើឱ្យប្រជាពលរដ្ឋបាត់បង់ដីធ្លីហើយកាន់តែជំរុញឱ្យមានសម្ទុះនៃចំណាកស្រុកមកកាន់ទីក្រុងនិងទៅក្រៅប្រទេសកាន់តែច្រើនឡើង។
លោកយល់ថាកម្ពុជាគួរតែផ្តោតលើការកែទម្រង់វិស័យកសិកម្មជនបទសម្រាប់រយៈពេលខ្លីឬបណ្តោះអាសន្នដើម្បីដោះស្រាយបញ្ហាអត់ឃ្លានហើយផ្តោតលើបញ្ហាឧស្សាហកម្មក្នុងរយៈពេលវែង។
លោកបានបន្ថែមថា៖
«ប្រទេសកម្ពុជាគ្មានជម្រើសអ្វីក្រៅតែពីរៀបចំក្នុងរយៈពេល១០ទៅ២០ឆ្នាំទៀតគឺជំរុញខ្លាំងមែនទែនក្នុងពេលឥឡូវនេះទៅគឺផ្នែកឧស្សាហកម្មដើម្បីស្រូបយកកម្លាំងប្រជាពលរដ្ឋផងដែរ»។
លោក អ៊ូ វីរៈ មានសុទិដ្ឋិនិយមថា ពលករខ្មែរដែលបានទៅធ្វើការនៅប្រទេសកូរ៉េអាចនឹងនាំមកវិញនូវជំនាញដែលគេបានធ្វើនៅទីនោះមកចូលរួមក្នុងការអភិវឌ្ឍផ្នែកសេដ្ឋកិច្ចបានប្រសិនបើមានការកែទម្រង់ទាន់ពេលព្រោះពួកគេមានឱកាសធ្វើការផ្នែករោងចក្រឧស្សាហកម្មធំៗ សំណង់ និងកសិកម្ម៕
