ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ខណៈ​ទំនាក់​ទំនង​រកាំ​រកូស អាមេរិក​តែងតាំង​អ្នក​កាទូត​ជាន់ខ្ពស់​នៃ​តំបន់​អាស៊ី​ជា​ឯកអគ្គរដ្ឋ​ទូត​អាមេរិក​នៅ​កម្ពុជា


កាលពីខែធ្នូ ឆ្នាំ២០១៧ លោក W. Patrick Murphy កាលណោះជាឧបការីរងរដ្ឋមន្ត្រីក្រសួងការបរទេសអាមេរិកប្រចាំតំបន់អាស៊ី បានទស្សនកិច្ចប្រទេសកម្ពុជា។ ពេលនោះលោកបានអង្គុយក្បែរលោក William A. Heidt អតីតឯកអគ្គរដ្ឋទូតអាមេរិកប្រចាំកម្ពុជា ដោយថ្លែងទៅកាន់អ្នកសារព័ត៌មាននៅរាជធានីភ្នំពេញ។

ជិត​ពីរឆ្នាំ​មុន លោក W. Patrick Murphy មាន​វត្តមាន​នៅ​គេហដ្ឋាន​របស់​ឯកអគ្គរដ្ឋទូត​អាមេរិក​ប្រចាំ​កម្ពុជា នៅ​រាជធានី​ភ្នំពេញ ដោយ​ថ្លែង​ទៅ​កាន់​អ្នក​សារព័ត៌មាន​ពី​ក្តី​ព្រួយបារម្ភ​របស់​លោក​អំពី​ការ​បង្ក្រាប​ទ្រង់ទ្រាយ​ធំ​របស់​រដ្ឋាភិបាល​កម្ពុជា​លើ​ក្រុម​គណបក្ស​ប្រឆាំង សង្គម​ស៊ីវិល និង​សារព័ត៌មាន​ឯករាជ្យ។

លោក​ Murphy បាន​ថ្លែង​នៅ​គ្រា​នោះ​ថា៖ «នៅពេល​ដែល​អាមេរិក​និយាយ​ថា ខ្លួន​មាន​ក្តី​បារម្ភ​ ខ្លួន​មាន​ករណីយកិច្ច​ក្នុង​ការ​ចាត់​វិធានការ​នៅ​រាល់​ការ​វិល​ថយ​ក្រោយ​នៃ​ដំណើរ​ការ​ប្រជាធិបតេយ្យ​នៅ​កម្ពុជា»។ លោក​ Murphy បាន​លើក​ឡើង​ដូច្នេះ​កាលពី​ខែធ្នូ ឆ្នាំ​២០១៧ ដែល​កាលណោះ​លោក​មាន​តួនាទី​ជា​ឧបការី​រង​រដ្ឋមន្ត្រី​ក្រសួង​ការបរទេស​ទទួល​បន្ទុក​កិច្ចការ​តំបន់​អាស៊ីអាគ្នេយ៍។

នៅ​ក្នុង​ប៉ុន្មាន​សប្តាហ៍​ខាង​មុខ​នេះ កិច្ចការ​របស់​លោក W. Patrick Murphy ក្នុង​នាម​ជា​ឯកអគ្គរដ្ឋ​ទូត​អាមេរិក​ថ្មី​ប្រចាំ​ប្រទេស​កម្ពុជា នឹង​ស្ថិត​នៅក្នុង​ការ​យកចិត្ត​ទុកដាក់​យ៉ាង​ចម្បង​របស់​រដ្ឋាភិបាល​សហរដ្ឋ​អាមេរិក ដើម្បី​ធ្វើ​យ៉ាង​ណា​ឲ្យ​កម្ពុជា​វិលរក​គន្លង​ប្រជាធិបតេយ្យ​វិញ។ ក្រោយ​ពី​មាន​ការ​ពន្យារ​ពេល​ជិត​មួយ​ឆ្នាំ​មក លោក Murphy អ្នក​កាទូត​ជាន់​ខ្ពស់​ម្នាក់​ដែល​មាន​បទពិសោធន៍​ស៊ី​ជម្រៅ​អំពី​តំបន់​អាស៊ី ត្រូវបាន​ព្រឹទ្ធសភា​អាមេរិក​បោះឆ្នោត​ផ្តល់​សេចក្តី​ទុក​ចិត្ត​ឲ្យ​ក្លាយ​ជា​ឯកអគ្គរដ្ឋ​ទូត​អាមេរិក​ប្រចាំ​កម្ពុជា នៅថ្ងៃទី១ ខែ​សីហា​កន្លង​ទៅ ដើម្បី​ជំនួស​លោក William A. Heidt អតីត​ឯកអគ្គរដ្ឋទូត​អាមេរិក​ប្រចាំ​កម្ពុជា​បាន​បញ្ចប់​អាណត្តិ​របស់​លោក​កាលពី​ចុង​ឆ្នាំ ២០១៨។

លោក​ Murphy នឹង​ត្រូវ​ធ្វើការ​ជាមួយ​រដ្ឋាភិបាល​កម្ពុជា ដែល​សព្វថ្ងៃ​កំពុង​តែ​មាន​ទំនាក់ទំនងយ៉ាង​ជិតស្និទ្ធ​ជាមួយ​រដ្ឋាភិបាល​ចិន ដែល​បាន​បណ្តាក់​ទុន​នៅ​កម្ពុជា​គិតជា​ទឹកប្រាក់​រាប់ពាន់​លាន​ដុល្លារ​អាមេរិក​ ហើយ​ដែល​បាន​ការពារ​ប្រទេស​កម្ពុជា​ពី​ការ​ធ្លាក់​ចុះ​នៃ​ស្ថានភាព​សិទ្ធិមនុស្ស​ក្នុង​ប្រទេស។ បច្ចុប្បន្ន​ភាព​នៃ​ស្ថានភាព​នយោបាយ​របស់​កម្ពុជា​គឺ​ថា សកម្មជន​គណបក្ស​ប្រឆាំង​នៅ​តែ​បន្ត​រង​ការ​បង្ក្រាប និង​ធ្វើ​ទុក្ខបុកម្នេញ ក្រុម​សកម្មជន​សិទ្ធិមនុស្ស​តាម​មូលដ្ឋាន​ត្រូវបាន​បន្ត​ហាមឃាត់​មិន​ឲ្យ​ធ្វើ​សកម្មភាព​នានា ហើយ​សេរីភាព​ក្នុង​ការ​បញ្ចេញ​មតិ​នៅតែត្រូវបាន​រឹតត្បិត។

ក៏ប៉ុន្តែ អ្នក​ជំនាញ​មើល​ឃើញ​ថា ការ​តែងតាំង​លោក Murphy ដែល​ជា​អ្នក​កាទូត​ជាន់​ខ្ពស់​របស់​អាមេរិក​ម្នាក់ មក​កាន់​តំណែង​នៅ​កម្ពុជា អាច​ជា​សញ្ញា​មួយ​ទៅ​កាន់​រដ្ឋាភិបាល​កម្ពុជា​ថា សហរដ្ឋ​អាមេរិក​កំពុង​ផ្លាស់ប្តូរ​ឥរិយាបថ​របស់​ខ្លួន​ចំពោះ​កម្ពុជា។ នេះ​បើ​តាម​ការ​លើក​ឡើង​របស់​លោក Sebastian Strangio អ្នក​និពន្ធ​សៀវភៅ «ប្រទេស​កម្ពុជា​របស់​លោក ហ៊ុន សែន» និង​អ្នក​ជំនាញ​ខាង​នយោបាយ​ក្នុង​តំបន់​អាស៊ី​អាគ្នេយ៍។

លោក​ Sebastian Strangio បាន​ប្រាប់ VOA ថា៖ «ខ្ញុំ​គិតថា នេះ​គឺជា​សញ្ញា​ដ៏​ល្អ​មួយ។ លោក [Murphy] គឺជា​អ្នក​កាទូត​ជាន់​ខ្ពស់​ដ៏​ជំនាញ​ម្នាក់ ហើយ​ការ​ចាត់​តាំង​លោក​នេះ អាច​ទំនង​ជា​បង្ហាញ​ថា កម្ពុជា​កំពុង​តែ​ក្លាយ​ជា​ប្រទេស​ដ៏​មាន​សារៈសំខាន់​មួយ​សម្រាប់​សហរដ្ឋ​អាមេរិក»។

រូបឯកសារ៖ លោក W. Patrick Murphy ជាភារធារីនៃស្ថានទូតអាមេរិកប្រចាំប្រទេសថៃ (ឆ្វេង) ជួបជាមួយលោក Don Pramudwi ឧបរដ្ឋមន្ត្រីក្រសួងការបរទេសថៃ នៅក្នុងកិច្ចប្រជុំមួយនៅក្រសួងការបរទេសថៃ ទីក្រុងបាំងកក ប្រទេសថៃ ថ្ងៃទី២៨ ខែមករា ឆ្នាំ២០១៥។
រូបឯកសារ៖ លោក W. Patrick Murphy ជាភារធារីនៃស្ថានទូតអាមេរិកប្រចាំប្រទេសថៃ (ឆ្វេង) ជួបជាមួយលោក Don Pramudwi ឧបរដ្ឋមន្ត្រីក្រសួងការបរទេសថៃ នៅក្នុងកិច្ចប្រជុំមួយនៅក្រសួងការបរទេសថៃ ទីក្រុងបាំងកក ប្រទេសថៃ ថ្ងៃទី២៨ ខែមករា ឆ្នាំ២០១៥។

បទពិសោធន៍​កាទូត​ស៊ីជម្រៅ

ឯកអគ្គរដ្ឋ​ទូត​អាមេរិក​ថ្មី​ប្រចាំ​កម្ពុជា​រូបនេះ​មាន​បទពិសោធន៍​ស៊ីជម្រៅ​ខ្លាំង​អំពី​កាទូត​ក្នុង​តំបន់​អាស៊ី។ កើត​នៅ​ទីក្រុង Brattleboro នៃ​រដ្ឋ Vermont សហរដ្ឋ​អាមេរិក លោក W. Patrick Murphy បាន​ចាប់ផ្តើម​ប្រឡូក​ក្នុង​វិស័យ​កាទូត​នៅ​អាស៊ី​តាំងពី​ឆ្នាំ ១៩៩២ នៅ​គ្រា​ដែល​ប្រទេស​កម្ពុជា​កំពុង​តែ​ឆ្លង​អន្តរកាល​ពី​ប្រទេស​កុម្មុយនិស្ត​ទៅ​ជាប្រទេស​ប្រកាន់​យក​លទ្ធិ​ប្រជាធិបតេយ្យ ដោយ​ទទួល​បាន​ការ​គាំទ្រ​ពី​អង្គការ​សហប្រជាជាតិ​ឬ​ហៅថា​ UNTAC។

ក្នុង​រយៈពេល​ជាង​២៦ឆ្នាំ​ដោយ​បាន​បម្រើ​ការងារ​កាទូត​ឲ្យ​រដ្ឋាភិបាល​អាមេរិក លោក Murphy បាន​កាន់តំណែង​ធំៗ​ជាច្រើន​នៅ​ក្រសួង​ការបរទេស​អាមេរិក ក្នុង​នោះ​រួមមាន​ឧបការី​រង​ចម្បង​រដ្ឋមន្ត្រី​ការ​បរទេស​អាមេរិក និង​ឧបការី​រង​រដ្ឋមន្ត្រី​ក្រសួង​ការបរទេស​ប្រចាំ​ការិយាល័យ​កិច្ចការ​អាស៊ី​ខាង​កើត​និង​អាស៊ីប៉ាស៊ីហ្វិក។

នៅ​តំបន់​អាស៊ី​អាគ្នេយ៍ លោក Murphy បាន​បំពេញ​តួនាទី​ជា​ភារធារី​នៃ​ស្ថានទូត​អាមេរិក​ប្រចាំ​ប្រទេស​ថៃ ក្នុង​អំឡុង​ពេល​យោធា​ថៃ​បាន​ឡើង​កាន់កាប់​អំណាច​ក្នុង​ប្រទេស​ពី​ឆ្នាំ​២០១៣ ដល់​ឆ្នាំ​២០១៦។ មុន​កាន់​តំណែង​នេះ លោក​គឺជា​អ្នក​តំណាង​ស្តីទី​ពិសេស​និង​ជា​អ្នក​សម្របសម្រួល​បេសកកម្ម​ផ្សះផ្សារ​និង​កែ​ទម្រង់​នយោបាយ​នៅ​ប្រទេស​មីយ៉ាន់ម៉ា ពីឆ្នាំ​២០១២ ដល់​ឆ្នាំ​២០១៣ ដោយបាន​ធ្វើការ​យ៉ាង​ជិតស្និទ្ធ​ជាមួយ​អតីតឯកអគ្គរដ្ឋ​ទូត​អាមេរិក​ប្រចាំ​មីយ៉ាន់ម៉ា គឺ​លោក Derek Mitchell។

ដោយ​មាន​បទពិសោធន៍​ការងារ​ជាមួយ​លោក​ Murphy នៅ​ប្រទេស​មីយ៉ាន់ម៉ា លោក Derek Mitchell បាន​លើកឡើង​ថា ឯកអគ្គរដ្ឋ​ទូត​អាមេរិក​ថ្មី​ប្រចាំ​កម្ពុជា មាន​លក្ខណៈ​សម្បត្តិ​ល្អ​បំផុត​ក្នុងការ​ពង្រឹង​ទំនាក់ទំនង​រវាង​អាមេរិក​និង​កម្ពុជា ដែល​កំពុង​តែ​មាន​ភាព​រកាំរកូស។

អតីត​ឯកអគ្គរដ្ឋ​ទូត​អាមេរិក​នៅ​ភូមា​រូបនេះ បាន​ប្រាប់ VOA តាម​សារ​អេឡិចត្រូនិក ឬ​អ៊ីមែល​ជា​ភាសា​អង់គ្លេស​ដែល​ត្រូវបាន​បក​ប្រែ​ជា​ភាសា​ខ្មែរ​ថា៖

«ខ្ញុំ​ពិត​ជា​រីករាយ​ ដែល​លោក [Murphy] នឹង​ដឹកនាំ​ស្ថានទូត​អាមេរិក​របស់​យើង​នៅ​កម្ពុជា ក្នុង​ដំណាក់​កាល​ដែល​ទំនាក់​ទំនង​ទ្វេរភាគី​របស់​យើង​ជាមួយ​កម្ពុជា​កំពុង​តែ​ជួប​ការ​លំបាក​ខ្លាំង និង​ដើម្បី​កសាង​លទ្ធិ​ប្រជាធិបតេយ្យ​នៅ​ក្នុង​ប្រទេស​នេះ»។

សព្វថ្ងៃ​នេះ លោក Mitchell គឺជា​ប្រធាន​វិទ្យាស្ថានជាតិ​ដើម្បី​លទ្ធិប្រជាធិបតេយ្យ​ ដែល​ទីស្នាក់ការ​របស់​វិទ្យាស្ថាន​នេះ​នៅ​កម្ពុជា​ត្រូវបាន​រដ្ឋាភិបាល​កម្ពុជា​បណ្តេញ​ចេញ​ពី​ប្រទេស​កាលពី​ឆ្នាំ​២០១៧ ក្នុង​អំឡុង​ពេល​ដែល​រដ្ឋាភិបាល​កម្ពុជា​បាន​ចាប់ផ្តើម​បង្ក្រាប​លើ​ក្រុម​គណបក្ស​ប្រឆាំង​និង​អ្នក​រិះគន់​រដ្ឋាភិបាល មុន​ការ​បោះឆ្នោត​ថ្នាក់​ជាតិ​ឆ្នាំ ២០១៨។

លោក​ Kurt Campbell អតីត​អ្នក​ជំនាញ​កាទូត​ជាន់​ខ្ពស់​របស់​អាមេរិក​ម្នាក់​ និង​ជា​អតីត​ឧបការី​រង​រដ្ឋមន្ត្រី​ក្រសួង​ការ​បរទេស​ទទួល​បន្ទុក​កិច្ចការ​អាស៊ី​ខាង​កើត​និង​អាស៊ី​ប៉ាស៊ីហ្វិក​ ពី​ឆ្នាំ​២០០៩​ដល់​ឆ្នាំ​២០១៣ បាន​ប្រាប់​ VOA តាម​សារ​អេឡិចត្រូនិក​ឬ​អ៊ីមែល​ថា លោក​ Murphy «មាន​បទ​ពិសោធន៍​ជ្រៅជ្រះ​ខាង​កាទូត‍»​ នៅ​តំបន់​អាស៊ី។

លោក​ Campbell ដែល​សព្វថ្ងៃ​ជា​នាយក​ប្រតិបត្តិ​នៃក្រុមហ៊ុន The Asia Group បាន​ប្រាប់ VOA តាម​សារ​អេឡិចត្រូនិក ឬ​អ៊ីមែល​ជា​ភាសា​អង់គ្លេស​ដែល​ត្រូវបាន​បក​ប្រែ​ជា​ភាសា​ខ្មែរ​ថា៖

«លោក​ Patrick Murphy គឺជា​អ្នក​ជំនាញ​ខាង​តំបន់​អាស៊ីនិង​អាស៊ី​អាគ្នេយ៍​ដ៏​សំខាន់​មួយ​រូប​របស់​អាមេរិក»។

ទោះ​បីជា​លោក​មាន​បទពិសោធន៍​ស៊ីជម្រៅ​លើ​តំបន់​អាស៊ី​ក្តី លោក Murphy អាច​នឹង​ប្រឈម​កិច្ចការ​កាទូត​របស់​លោក ដោយសារ​ការ​កើន​ឡើង​នៃ​ឥទ្ធិពល​ដ៏​ខ្លាំង​ក្លា​របស់​ចិន​នៅ​ក្នុង​ប្រទេស​កម្ពុជា។

កាលពី​ចុង​ខែ​កក្កដា កាសែត​ The Wall Street Journal បាន​រាយការណ៍​ថា រដ្ឋាភិបាល​កម្ពុជា​បាន​ចុះ​ហត្ថលេខា​សម្ងាត់​ជាមួយ​ចិន ដោយ​អនុញ្ញាត​ឲ្យ​ចិន​ដាក់​មូលដ្ឋាន​ទ័ព​ជើង​ទឹក​នៅ​តំបន់​រាម ខេត្ត​ព្រះសីហនុ។ ប្រទេស​ចិន​បាន​ក្លាយ​ជា​ទីផ្សារ​ធំ​បំផុត​របស់​កម្ពុជា​ក្នុង​ការ​នាំ​ចេញ​អង្ករ ហើយ​ក្រៅ​ពី​នេះ ចិន​បាន​បង្កើន​ការ​វិនិយោគទុន​ខាង​ហេដ្ឋារចនា​សម្ព័ន្ធ​ជា​បន្តបន្ទាប់​នៅ​កម្ពុជា និង​ការ​ផ្តល់​សព្វាវុធ​យោធា​ដល់​កង​យោធាកម្ពុជា។

លោក អ៊ៀ សុផល សាស្ត្រាចារ្យ​ខាង​កាទូត និង​កិច្ចការ​ពិភពលោក​ប្រចាំ​សាកល​វិទ្យាល័យ​ Occidental College នៅ​រដ្ឋ​កាលីហ្វ័រញ៉ា សហរដ្ឋ​អាមេរិក យល់ថា ទំនាក់​ទំនង​ដ៏​ស្អិត​រមួត​រវាង​កម្ពុជា​និង​ចិន​នា​ពេល​បច្ចុប្បន្ន​នេះ នឹង​ធ្វើ​ឲ្យ​លោក Murphy ជួប​ការ​លំបាក​ក្នុង​ការ​ប្រាស្រ័យ​ទាក់ទង​ជាមួយ​រដ្ឋាភិបាល​កម្ពុជា ដែល​បាន​«មុជ​ខ្លួន​កាន់​តែ​ជ្រៅ​ក្នុង​ការ​បម្រើ​ផល​ប្រយោជន៍​របស់​ចិន»។

លោក​បាន​ប្រាប់ VOA តាម​សារអេឡិចត្រូនិក ឬ​អ៊ីមែល​ជា​ភាសា​អង់គ្លេស​ដែល​ត្រូវបាន​បក​ប្រែ​ជា​ភាសា​ខ្មែរ​ថា៖

«ចិន​កំពុង​តែ​គាំទ្រ​រដ្ឋាភិបាល​កម្ពុជា​ខ្លាំង ហើយ​វាពិត​ជា​លំបាក​ក្នុងការ​ចរចា​រឿង​អ្វី​មួយ​រដ្ឋាភិបាល​កម្ពុជា​ចង់​បាន ដែល​ចិន​មិន​អាច​ផ្តល់​ឲ្យ​កម្ពុជា​បាន។ រដ្ឋាភិបាល​កម្ពុជា​មិនចង់​បាន​សិទ្ធិ​មនុស្ស និង​លទ្ធិប្រជាធិបតេយ្យ​ទេ។ រដ្ឋាភិបាល​កម្ពុជា​ចង់បាន​តែ​សិទ្ធិមនុស្ស​ក្លែងក្លាយ និង​លទ្ធិប្រជាធិបតេយ្យ​ក្លែងក្លាយ​តែ​ប៉ុណ្ណោះ»។

រូបឯកសារ៖ លោកនាយករដ្ឋមន្ត្រី ហ៊ុន សែន ចាប់ដៃជាមួយលោក ស៊ី ជីនពីង ប្រធានាធិបតីចិន នៅក្នុងជំនួបរវាងរដ្ឋាភិបាលកម្ពុជា-ចិន នៅទីក្រុងប៉េកាំង កាលពីថ្ងៃទី២៩ ខែមេសា ឆ្នាំ២០១៩។ (Madoka Ikegami/Pool via REUTERS)
រូបឯកសារ៖ លោកនាយករដ្ឋមន្ត្រី ហ៊ុន សែន ចាប់ដៃជាមួយលោក ស៊ី ជីនពីង ប្រធានាធិបតីចិន នៅក្នុងជំនួបរវាងរដ្ឋាភិបាលកម្ពុជា-ចិន នៅទីក្រុងប៉េកាំង កាលពីថ្ងៃទី២៩ ខែមេសា ឆ្នាំ២០១៩។ (Madoka Ikegami/Pool via REUTERS)

«អ្នក​ការពារ​លទ្ធិ​ប្រជាធិបតេយ្យ»

ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ រដ្ឋសភា​អាមេរិក​បាន​ដាក់​សម្ពាធ​កាន់​តែ​ច្រើន​ឡើង​លើ​រដ្ឋាភិបាល​កម្ពុជា ក្រោម​ការ​ដឹកនាំ​របស់​គណបក្ស​ប្រជាជន​កម្ពុជា​របស់​លោក​នាយករដ្ឋ​មន្ត្រី ហ៊ុន សែន ដោយ​បាន​ស្នើ​ជា​សេចក្តី​ព្រាង​ច្បាប់​មួយ​ចំនួន​ក្នុង​គោល​បំណង​ដាក់​ទណ្ឌកម្ម​លើ​កម្ពុជា។

កាលពី​ថ្ងៃទី១៥ ខែ​កក្កដា រដ្ឋសភា​អាមេរិក​បាន​អនុម័ត​សេចក្តី​ព្រាង​ច្បាប់​ស្តីពី​លទ្ធិ​ប្រជាធិបតេយ្យ​នៅ​កម្ពុជា ឆ្នាំ ២០១៩ (Cambodia Democracy Act 2019) ដែល​ដាក់​ទណ្ឌកម្ម​លើ​មន្ត្រី​ជាន់​ខ្ពស់​កម្ពុជា ទាមទារ​ឲ្យ​មាន​ការ​ដោះលែង​លោក កឹម សុខា មេដឹកនាំ​គណបក្ស​សង្គ្រោះ​ជាតិ​ដែល​ត្រូវបាន​តុលាការ​កំពូល​កម្ពុជា​រំលាយ​កាលពី​ចុង​ឆ្នាំ ២០១៧ និង​ទាមទារ​ឲ្យ​កម្ពុជា​វិល​រក​គន្លង​លទ្ធិ​ប្រជាធិបតេយ្យ​ឡើងវិញ។ កាលពី​ខែ​មិថុនា ឆ្នាំ​២០១៧ តាមរយៈ​ច្បាប់ Magnitsky Act ក្រសួង​ហិរញ្ញវត្ថុ​អាមេរិក​ក៏​បាន​ដាក់​ទណ្ឌកម្ម​លើ​លោក ហ៊ីង ប៊ុនហៀង មេ​បញ្ជាការ​កង​អង្គរក្ស​របស់​លោក​នាយក​រដ្ឋមន្ត្រី ហ៊ុន សែន ដែល​បាន​រំលោភ​សិទ្ធិ​មនុស្ស​ធ្ងន់ធ្ងរ​នៅ​កម្ពុជា។

នៅ​ក្នុង​អំឡុង​សវនាការ​តែងតាំង​តំណែង​ថ្មី​របស់​លោក កាលពី​ខែ​ធ្នូ ឆ្នាំ ២០១៨ លោក​ Murphy បាន​ថ្លែង​ថា លោក​ប្តេជ្ញា​ធ្វើការ​លើក​កម្ពស់​សិទ្ធិ​មនុស្ស និង​លទ្ធិ​ប្រជាធិបតេយ្យ​នៅ​កម្ពុជា និង​ធ្វើការ​យ៉ាង​ជិតស្និទ្ធ​ជាមួយ​រដ្ឋសភា​អាមេរិក ដើម្បី​ជំរុញ​ឲ្យ​កម្ពុជា​គាំទ្រ​គោលនយោបាយ​ចម្បង​របស់​អាមេរិក។

លោក Murphy បាន​ថ្លែង​ថា៖ «បើ​ត្រូវបាន​តែងតាំង ខ្ញុំ​នឹង​ធ្វើ​ការ​យ៉ាង​ជិតស្និទ្ធ​ជាមួយ​រដ្ឋសភា ដើម្បី​ពង្រីក​ផល​ប្រយោជន៍​របស់​អាមេរិក​នៅ​កម្ពុជា ដោយ​លើក​កម្ពស់​កម្ពុជា​លទ្ធិប្រជាធិបតេយ្យ សិទ្ធិមនុស្ស និង​សិទ្ធិ​សេរីភាព​មូលដ្ឋាន ដោយ​ផ្តោត​លើ​ការ​គាំទ្រ​របស់​ប្រជាពលរដ្ឋ​កម្ពុជា​ដែល​បាន​ផ្តល់​ឲ្យ​សហរដ្ឋ​អាមេរិក»។

លោក​ក៏បាន​លើកឡើង​ថា លោក​ក៏​នឹង​ជំរុញ​ឲ្យ​មាន​ការ​ផ្សះផ្សារ​ខាង​នយោបាយ​រវាង​គណបក្ស​កាន់​អំណាច​និង​គណបក្ស​ប្រឆាំង​នៅ​កម្ពុជា។

យ៉ាងណាមិញ ថ្មីៗ​នេះ​រដ្ឋាភិបាល​កម្ពុជា​មិន​បាន​បង្ហាញ​ឲ្យ​ឃើញ​ពី​គោល​ជំហរ​របស់​ខ្លួន​ក្នុងការ​ធ្វើ​ឲ្យ​ស្ថានភាព​នយោបាយ និង​សិទ្ធិមនុស្ស​នៅ​កម្ពុជា​មាន​ភាព​ប្រសើរ​ឡើង​វិញ​ឡើយ។​ លោក​ កឹម សុខា នៅតែ​ជាប់​ឃុំ​ខ្លួន​នៅ​គេហដ្ឋាន រាល់​ការ​ជួបជុំ និង​ការ​តវ៉ា​នានា ត្រូវបាន​បង្ក្រាប​ដោយ​មន្ត្រី​ប៉ូលិស ហើយ​ក៏​មាន​ការ​ចាប់​ខ្លួន​មនុស្ស​ជា​បន្តបន្ទាប់​ដែល​បាន​រិះគន់​លោក​នាយក​រដ្ឋមន្ត្រី ហ៊ុន សែន និង​រដ្ឋាភិបាល​របស់​លោក។

បន្ថែម​លើ​នេះ លោក​នាយករដ្ឋ​មន្ត្រី ហ៊ុន សែន ក៏​បាន​ព្រមាន​សហរដ្ឋ​អាមេរិក​ថា រាល់​ការ​ដាក់​ទណ្ឌកម្ម​ណាមួយ​មក​លើ​កម្ពុជា មាន​ន័យ​ថា សហរដ្ឋ​អាមេរិក​សម្រេច​កាត់ផ្តាច់​ទំនាក់​ទំនង​ជាមួយ​កម្ពុជា។​

លោក​ ហ៊ុន សែន​ ធ្លាប់​បាន​លើក​ឡើង​ថា៖ «ដាក់​ ទៀ បាញ់​ ស្មើ​នឹង​ផ្តាច់​ទំនាក់​ទំនង​យោធា ដាក់ ស ខេង ស្មើ​នឹង​ផ្តាច់​ទំនាក់​ទំនង​ខាង​នគរបាល ដាក់​ប្រាក់ សុខុន ស្មើ​នឹង​ផ្តាច់​ទំនាក់​ទំនង​ខាង​ទូត​ ដាក់​ទៅ​លើ អូន ព័ន្ធមុនីរ័ត្ន​ ស្មើ​នឹង​ផ្តាច់​ទំនាក់ទំនង​ផ្នែក​សេដ្ឋកិច្ច»។

លោក​ Andrew Mertha សាស្ត្រាចារ្យ​ខាង​ការ​សិក្សា​អំពី​ប្រទេសចិន​និង​តំបន់អាស៊ី ប្រចាំ​ដេប៉ាតេម៉ង់​ការ​សិក្សា​អន្តរជាតិ​នៃ​សាកល​វិទ្យាល័យ Johns Hopkins នៅ​រដ្ឋធានី​វ៉ាស៊ីនតោន យល់​ថា គោល​ជំហរ​ការពារ​លទ្ធិ​ប្រជាធិបតេយ្យ​របស់​លោក Murphy ទំនង​ជា​ធ្វើ​ឲ្យ​លោក​អាច​ប៉ះទង្គិច​គ្នា​ជាមួយ​លោក​នាយក​រដ្ឋមន្ត្រី ហ៊ុន សែន ដែល​បាន​កាន់អំណាច​តាំង​ពីឆ្នាំ ១៩៨៥។ ក៏ប៉ុន្តែ លោក​ក៏​យល់ថា​ ការ​ប៉ះទង្គិច​គ្នា​នេះ​អាច​បង្កើត​ជា​ឱកាស​ក្នុង​ការ​ស្វែងយល់​ពី​គ្នា​ទៅវិញ​ទៅមក។

លោក​សាស្ត្រាចារ្យ​ Mertha បាន​ប្រាប់​ VOA តាម​សារអេឡិចត្រូនិក ឬ​អ៊ីមែល​ជា​ភាសា​អង់គ្លេស​ដែល​ត្រូវបាន​បក​ប្រែ​ជា​ភាសា​ខ្មែរ​ថា៖

«ការណ៍​ដែល​លោក [Murphy] គឺជា​អ្នក​ការពារ​លទ្ធិ​ប្រជាធិបតេយ្យ មាន​ន័យ​ថា លោក​អាច​នឹង​ប៉ះ​ទង្គិចគ្នា​ជាមួយ​លោក​ ហ៊ុន សែន ប៉ុន្តែ​ការណ៍​នេះ​មិនមែន​មាន​ន័យ​ថា​ជា​រឿង​មិន​ល្អ​នោះ​ទេ។ លោក​ ហ៊ុន សែន​ ជា​មនុស្ស​គោរព​ភាព​ខ្លាំង​របស់​បុគ្គល។ បន្ថែម​លើ​នេះ លោក​ឯកអគ្គរដ្ឋ​ទូត Murphy មាន​ទំនាក់ទំនង​ផ្ទាល់​ជាមួយ​ក្រុម​សមាជិក​រដ្ឋសភា​អាមេរិក​ដែល​យកចិត្ត​ដាក់​លើ​ស្ថានភាព​នៅ​កម្ពុជា ដូច្នេះ​គោលជំហរ​របស់​លោក Murphy នឹង​មាន​ប្រសិទ្ធភាព»។

រូបឯកសារ៖ លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ចូលរួមពិធីគម្រប់ខួប៦៨ឆ្នាំនៃការបង្កើតបក្ស នៅរាជធានីភ្នំពេញ​ កាលពីថ្ងៃទី២៨ ខែមិថុនា ឆ្នាំ២០១៩។
រូបឯកសារ៖ លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ចូលរួមពិធីគម្រប់ខួប៦៨ឆ្នាំនៃការបង្កើតបក្ស នៅរាជធានីភ្នំពេញ​ កាលពីថ្ងៃទី២៨ ខែមិថុនា ឆ្នាំ២០១៩។

កម្ពុជា​ស្វាគមន៍​លោក Murphy

នៅ​កម្ពុជា​វិញ សមាជិក​រដ្ឋាភិបាល​បាន​ស្វាគមន៍​ការ​តែងតាំង​លោក W. Patrick Murphy ជា​ឯកអគ្គរដ្ឋ​ទូត​អាមេរិក​ថ្មី​ប្រចាំ​កម្ពុជា ហើយ​ថា នេះ​គឺជា​ឱកាស​ក្នុងការ​ធ្វើ​ឲ្យ​ទំនាក់​ទំនង​រវាង​អាមេរិក​និង​កម្ពុជា​មាន​ភាព​ប្រសើរ​ឡើង។

លោក សុខ ឥសាន សមាជិក​ព្រឹទ្ធសភា​ និង​ជា​អ្នក​នាំ​ពាក្យ​ឲ្យ​គណបក្ស​កាន់​អំណាច បាន​ប្រាប់ VOA ថា៖

«ខ្ញុំ​ជឿជាក់ ពីព្រោះ​ទី១ លោក​មាន​បទ​ពិសោធន៍​ខាង​កាទូត អញ្ចឹង​ទេ ការ​ធ្វើ​អី​គឺ​យើង​ដឹង​ហើយថា​ មាន​បទពិសោធន៍ ការ​មាន​ចំណេះ​ដឹង​អំពី​ការងារ​កាទូត​ហើយ គឺ​ធ្វើ​អី​វា​ស្រប​តាម​តួនាទី ភារកិច្ច​របស់​ឯកអគ្គរដ្ឋ​ទូត»។

លោក​ ផៃ ស៊ីផាន អ្នក​នាំពាក្យ​ទីស្តីការ​គណៈ​រដ្ឋមន្ត្រី បាន​លើក​ឡើង​ថា ការ​ចាត់​តាំង​អ្នក​កាទូត​ជាន់​ខ្ពស់​អាមេរិក​ម្នាក់​ឲ្យ​មក​កាន់​តំណែង​ជា​ឯកអគ្គរដ្ឋទូត​អាមេរិក​នៅ​កម្ពុជា ​នេះ បង្ហាញ​ថា សហរដ្ឋ​អាមេរិក​ទទួល​ស្គាល់​តម្លៃ​របស់​កម្ពុជា នៅ​ក្នុង​តំបន់​អាស៊ី​អាគ្នេយ៍។

លោក​បាន​ប្រាប់ VOA ថា៖

«ជា​តម្លៃ​មួយ​ដែល​គេ​ឲ្យ​តម្លៃ​មក​កម្ពុជា។ ហើយ​ដូច​ជា​ប្រទេស​មួយ​ចំនួន​ដែល​គេ​យក​ទូត​គេ​ចេញ​ពី​សហរដ្ឋ​អាមេរិក​ឲ្យ​មក​ធ្វើ​ការ​នៅ​កម្ពុជា​ហ្នឹង កម្ពុជា​បាន​ដើរ​តួនាទី​ជា​វេទិកា​អន្តរជាតិ​មួយ ដែល​មាន​ឥទ្ធិពល​នៅ​ក្នុង​តំបន់​ផង។ អាស្រ័យ​ដោយ​បទពិសោធន៍​របស់​លោក Murphy ហើយ​លោក​មក​ធ្វើ​កិច្ចការ​នៅ​ប្រទេស​កម្ពុជា បាន​សេចក្តី​ថា វា​ជា​មជ្ឈមណ្ឌល​នៃ​អំណាច​កាទូត​ផង»។

ទោះ​ជា​មាន​ការ​បង្ហាញ​ពាក្យ​ពេចន៍​វិជ្ជមាន​ពី​រដ្ឋាភិបាល​កម្ពុជា​ក្តី លោក អ៊ៀ សុផល យល់ថា រដ្ឋាភិបាល​កម្ពុជា​មិន​ទំនង​ជា​ចង់​ស្តារ​ទំនាក់​ទំនង​ជាមួយ​អាមេរិក ឬ​ក៏​ផ្តល់​សម្បទាន​ដល់​អាមេរិក​នោះ​ទេ។

លោក​ អ៊ៀ សុផល បាន​ប្រាប់ VOA តាម​សារអេឡិចត្រូនិក ឬ​អ៊ីមែល​ជា​ភាសា​អង់គ្លេស​ដែល​ត្រូវបាន​បក​ប្រែ​ជា​ភាសា​ខ្មែរ​ថា៖

«គ្មាន​អ្វីថ្មី​កើត​ចេញ​ពី​រដ្ឋាភិបាល​កម្ពុជា​ទេ គឺ​មាន​តែ​យុទ្ធសាស្ត្រ​ដដែល​ គឺ​ដូច​ស្រា​ចាស់​ដដែលៗតែ​ក្នុង​ដប​ថ្មី​តែ​ប៉ុណ្ណោះ»៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG