កិច្ចប្រឹងប្រែងជម្លៀសអ្នកសារព័ត៌មានអាហ្វហ្គានីស្ថានចេញពីប្រទេសនេះកំពុងបង្កើនល្បឿនទៅមុខ ស្របពេលមានសេចក្តីរាយការណ៍ថា ក្រុមសកម្មប្រយុទ្ធតាលីបង់បានចូលឆែកឆេរលំនៅដ្ឋានរបស់បុគ្គលិកសារព័ត៌មានមួយចំនួន។
អង្គការការពារសិទ្ធិសារព័ត៌មានមួយចំនួននិយាយថា ក្នុងសប្តាហ៍កន្លងទៅ ក្រុមតាលីបង់បានចូលឆែកឆេរផ្ទះអ្នកសារព័ត៌មានយ៉ាងតិចចំនួន៥នាក់។
កាលពីថ្ងៃសុក្រ ក្រុមប្រដាប់អាវុធតាលីបង់មួយចំនួនបានចូលទៅឆែកផ្ទះរបស់លោក Zalmai Lotfi ប្រធានទូរទស្សន៍ Enikass និងបានយកសម្ភារៈការិយាល័យមួយចំនួន និងរថយន្តរបស់លោកផងដែរ។
អ្នកសារព័ត៌មានរូបនេះបានរត់គេចខ្លួនដោយបារម្ភអំពីសុវត្ថិភាព ហើយស្ថានីយបានបញ្ឈប់ការផ្សាយ។ នេះបើតាមសហព័ន្ធអ្នកសារព័ត៌មានអន្តរជាតិ (IFJ)។
លំនៅដ្ឋានរបស់អ្នកសារព័ត៌មានមួយចំនួន ដែលធ្វើការឲ្យប្រព័ន្ធផ្សព្វផ្សាយអាល្លឺម៉ង់ Deutsche Welle និងអ្នករាយការណ៍ព័ត៌មានគ្មានអង្គភាពមួយរូបត្រូវគេឆែករកក្នុងរយៈពេលប៉ុន្មានថ្ងៃថ្មីៗនេះ ហើយសាច់ញាតិរបស់អ្នកសារព័ត៌មានម្នាក់ត្រូវបានសម្លាប់។ នេះបើយោងទៅលើប្រព័ន្ធផ្សព្វផ្សាយ Deutsche Welle និងអង្គការការពារសិទ្ធិសារព័ត៌មាន។
ក្នុងទីក្រុងកាប៊ុល វីអូអេបានបញ្ជាក់ថា មានអ្នកសារព័ត៌មានយ៉ាងតិច២នាក់ត្រូវបានក្រុមតាលីបង់ធ្វើបាប។ ក្នុងករណីទាំងពីរនេះ អ្នកសារព័ត៌មានត្រូវបានសាកសួរអំពីព័ត៌មានដែលពួកគេបានសរសេររិះគន់ក្រុមតាលីបង់ មុនពេលក្រុមនេះដណ្តើមកាន់កាន់ទីក្រុងកាប៊ុល។
ក្នុងករណីទូរទស្សន៍ Enikass ប្រព័ន្ធផ្សព្វផ្សាយឯករាជ្យមួយនេះបានផ្លាស់ប្តូរការិយាល័យធ្វើការរបស់ខ្លួនពីក្រុង Jalalabad ក្នុងខេត្ត Nangarhar ទៅទីក្រុងកាប៊ុល ដើម្បីការពារសុវត្ថិភាពបុគ្គលិករបស់ខ្លួន។ នេះបើតាមការបញ្ជាក់របស់សហព័ន្ធអ្នកសារព័ត៌មានអន្តរជាតិ។ ខ្មាន់កាំភ្លើងបានបាញ់សម្លាប់បុគ្គលិករបស់ទូរទស្សន៍នេះចំនួន៤នាក់ដែលជាស្ត្រីភេទ ចាប់តាំងពីខែធ្នូកន្លងទៅ៕
