កងកម្លាំងអាហ្វហ្គានីស្ថានកំពុងពុះពារទាំងលំបាកក្នុងការរកទាហានដាក់នៅខ្សែប្រយុទ្ធជួរមុខ ប្រឆាំងនឹងក្រុមបះបោរតាលីបង់ ដែលលេចមុខជាថ្មី។ ការលំបាកនេះ មួយផ្នែកដោយសារតែចំនួនទាហាន «ខ្មោច» ដែលគេមិនដឹងចំនួនពិតប្រាកដ ហើយដែលបើកតែប្រាក់ខែប៉ុន្តែមានឈ្មោះតែនៅលើក្រដាស។
បញ្ហាទាហានខ្មោចដែលកើតមានឡើងទូទាំងប្រទេសនេះ មានលក្ខណៈធ្ងន់ធ្ងរជាពិសេសនៅក្នុងខេត្ត Helmand ភាគខាងត្បូងប្រទេស ដែលនៅទីនោះ ក្រុមតាលីបង់ បានដណ្តើមបានដែនដីមួយផ្នែកធំយកទៅគ្រប់គ្រង ក្នុងរយៈពេល១២ខែ ចាប់តាំងពីសហរដ្ឋអាមេរិកនិងកងកម្លាំងអូតង់បានបញ្ចប់បេសកកម្មប្រយុទ្ធជាផ្លូវការរបស់ពួកគេ ហើយបានប្រែក្លាយកងកម្លាំងរបស់ពួកគេ ទៅខាងផ្នែកហ្វឹកហ្វឺននិងគាំពារវិញនោះ។
លោក Karim Atal ប្រធានក្រុមប្រឹក្សាខេត្ត Helmand មានប្រសាសន៍ថា «នៅតាមប៉ុស្ត៍ត្រួតពិនិត្យនានា វាគួរតែមានទាហាន២០នាក់នៅប្រចាំការទីនោះ ប៉ុន្តែជាក់ស្តែងមានតែ៨ឬ១០នាក់ប៉ុណ្ណោះ»។
លោកបន្តថា «មូលហេតុនេះគឺដោយសារអ្នកខ្លះទទួលបានប្រាក់ខែ ប៉ុន្តែមិនធ្វើការទេ ដោយសារពួកគេជាប់សាច់ញាតិជាមួយនឹងមនុស្សសំខាន់ ដូចជាមេបញ្ជាការយោធាក្នុងតំបន់ជាដើម»។
លោក Atalមានប្រសាសន៍បន្ថែមថា ជួនកាលការកំណត់ថាជា «ខ្មោច» ហ្នឹងគឺក្នុងន័យត្រង់មែន ពោលគឺទាហាននិងប៉ូលិសដែលស្លាប់នៅតែមានឈ្មោះក្នុងបញ្ជីបើកប្រាក់ខែ ហើយមេប៉ូលិសនិងមន្ត្រីយោធាជាអ្នកយកប្រាក់ខែទាំងនោះដាក់ក្នុងហោប៉ៅខ្លួនឯង ដោយមិនបានជំនួសទាហាននិងប៉ូលិសដែលបានស្លាប់ទាំងនោះទេ។
លោក Atal បានប៉ាន់ប្រមាណថា កងកម្លាំងដែលមានតែឈ្មោះក្នុងបញ្ជីប្រមាណ៤០ភាគរយ មិនមានរូបរាងពិតប្រាកដទេ ហើយដោយសារកង្វះកងកម្លាំងជាក់ស្តែងនេះហើយ ទើបធ្វើឲ្យក្រុមតាលីបង់អាចដណ្តើមបានដែនដី៦៥ភាគរយនៃខេត្តHelmand ទាំងមូល ដែលជាខេត្តធំជាងគេបង្អស់របស់ប្រទេសអាហ្វហ្គានីស្ថាន។ បញ្ហាទាហានមានតែឈ្មោះបើកប្រាក់ខែនេះក៏បានជួយឲ្យក្រុមតាលីបង់អាចគំរាមកំហែងដល់រដ្ឋធានី Lashkar Gah នៃខេត្ត Helmand បានផងដែរ។
កងកម្លាំងទាំងឡាយ ដែលបានបម្រើក្នុងជួរកងទ័ពពិតប្រាកដ ត្រូវប្រឈមមុខនឹងគ្រោះថ្នាក់កាន់តែធំធេង ដោយសារតែទាហាន«ខ្មោច» ដែលមានតែឈ្មោះតែមិនឃើញមនុស្សនេះ។
លោក Atal ថ្លែងថា នៅក្នុងរយៈពេលតែ៣ខែប៉ុណ្ណោះប៉ូលិសប្រមាណ៧០០នាក់ត្រូវបានសម្លាប់ ហើយ៥០០នាក់បានរងរបួស។
អតីតស្នងការរងប៉ូលិសខេត្ត លោក Pacha Gul Bakhtiar បានមានប្រសាសន៍ថា «មន្ត្រីប៉ូលិសដែលមានឈ្មោះចុះបញ្ជីមានចំនួន៣១០០០ពាន់នាក់ ប៉ុន្តែចំនួនពិតជាក់ស្តែង មិនបានក្បែរចំនួននេះផង»៕
