នៅថ្ងៃព្រហស្បតិ៍នេះ អាជ្ញាធរបានបណ្តេញជនជាតិចិនចេញពីកម្ពុជាចំនួនជាង២០០នាក់បន្ថែមទៀត ដែលការប្រព្រឹត្តបទល្មើសឆបោក គំរាមកំហែង និងជម្រិតទារប្រាក់តាមប្រព័ន្ធទូរគមនាគមន៍ (VOIP)។ នេះបើតាមអ្នកនាំពាក្យអគ្គនាយកដ្ឋានអន្តោប្រវេសន៍។
លោកកែវ វ៉ាន់ថន អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃប្រាប់ VOA នាព្រឹកថ្ងៃព្រហស្បតិ៍នេះថា អាជ្ញាធរកម្ពុជាបានបណ្តេញជនជាតិចិនទាំងជាង២០០នាក់ តាមអាកាសយានដ្ឋានអន្តរជាតិភ្នំពេញត្រឡប់ទៅកាន់ប្រទេសចិនវិញ ក្រោយពីត្រូវបានចាប់ខ្លួននៅខេត្តតាកែវ ពាក់ព័ន្ធនឹងការប្រព្រឹត្តបទល្មើសបច្ចេកវិទ្យា។ លោកបន្ថែមថា ក្នុងរយៈពេល១០ខែ ឆ្នាំ២០១៨ អាជ្ញាធរកម្ពុជាបានបណ្តេញជនបរទេសចំនួនជិត១៥០០០នាក់ (១៤.៩៦៥នាក់) ចេញពីកម្ពុជា ដែលភាគច្រើនជាជនជាតិចិន មានចំនួនជាង៤០០នាក់នៃជនបរទេសចំនួន៩១សញ្ជាតិ។
លោក កែវ វ៉ាន់ថន បន្ថែមថា ជនបរទេសដែលប្រព្រឹត្តបទល្មើសនិងត្រូវបានបណ្តេញចេញនោះ នឹងត្រូវបានហាមឃាត់មិនឲ្យត្រឡប់មកកម្ពុជាវិញ ក្នុងអំឡុងពេលកំណត់មួយ។
លោកបញ្ជាក់ថា៖
«តែកាលណាបញ្ជូនចេញហ្នឹង គេហាមអត់ឲ្យចូលហើយ ប៉ុន្តែមានរយៈពេលកំណត់។ ឥឡូវដឹងប៉ុណ្ណឹងសិនចុះ! បើតាមប្រកាសក្រសួងមហាផ្ទៃ តែកាលណាមានបទល្មើសអ៊ីចឹង គេបណ្តេញចេញ។ បណ្តេញចេញគឺហាមមិនឲ្យចូលហើយ!»
កាលពីថ្ងៃទី២៦ ខែវិច្ឆិកា ឆ្នាំ២០១៨ សមត្ថកិច្ចកម្ពុជាសហការជាមួយសមត្ថកិច្ចចិន បានចុះបង្រ្កាបទីតាំងចំនួន៤កន្លែងផ្សេងគ្នា ក្នុងខេត្តតាកែវ ដោយឃាត់ខ្លួនជនជាតិចិនចំនួន២៣៥នាក់ ក្នុងនោះស្រី៣៦នាក់ ពាក់ព័ន្ធនឹងការប្រើប្រាស់ប្រព័ន្ធអ៊ីនធឺណិតនៅកម្ពុជា ដើម្បីប្រព្រឹត្តបទល្មើសឆបោក និងចាប់ជម្រិតជនជាតិចិនដូចគ្នា ដែលរស់នៅប្រទេសចិន។
កម្ពុជាបានក្លាយជាកន្លែងប្រព្រឹត្តបទល្មើសតាមប្រព័ន្ធបច្ចេកវិទ្យានេះ ចាប់តាំងពីឆ្នាំ២០១១។ រហូតមកដល់ពេលនេះ អាជ្ញាធរកម្ពុជា បានបញ្ជូនជនជាតិចិន ដែលពាក់ព័ន្ធនឹងបទល្មើសនេះ ប្រមាណជាជិត២០០០នាក់ត្រឡប់ទៅប្រទេសចិនវិញ។
ពាក់ព័ន្ធនឹងករណីនេះ លោកសន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា ជំរុញឲ្យសមត្ថកិច្ចកម្ពុជាប្តូរយុទ្ធសាស្រ្តក្នុងការអនុវត្តលើជនជាតិចិន ដែលយកកម្ពុជាធ្វើជាទីតាំងប្រព្រឹត្តបទល្មើសបច្ចេកវិទ្យា ជាជាងគ្រាន់តែចាប់បញ្ជូនត្រឡប់ទៅប្រទេសកំណើតរបស់ពួកគេវិញ។
ជនជាតិចិនដែលជាចំណូលថ្មីមួយចំនួនលើទឹកដីកម្ពុជាត្រូវបានគេរាយការណ៍ថា បាននិងកំពុងបង្កបទល្មើសជាច្រើន ដែលមួយចំនួនធំនៃបទល្មើសធ្ងន់ គឺពាក់ព័ន្ធនឹងការចាប់បង្ខាំងជនជាតិចិនគ្នាឯង ការធ្វើទារុណកម្ម និងបទល្មើសជម្រិតទារប្រាក់តាមអ៊ីនធឺណិតជាដើម។
របាយការណ៍ក្រសួងទេសចរណ៍ ដែលចេញផ្សាយកាលពីថ្ងៃទី១៤ ខែសីហា បញ្ជាក់ថា ក្នុងរយៈពេល៦ខែ ដើមឆ្នាំ២០១៨នេះ ភ្ញៀវទេសចរជនជាតិចិនមកកម្សាន្តនៅកម្ពុជាកើនឡើងជិត៧៦ភាគរយ ស្មើនឹងជាង៩សែននាក់ (៩៣១.៧៦៣) បើប្រៀបធៀបកាលពីឆ្នាំ២០១៧។ កម្ពុជារំពឹងថា នឹងទទួលអ្នកទេសចរចិនជាង២លាននាក់ នៅឆ្នាំ២០២០។
លោក សុខ ផល រដ្ឋលេខាធិការក្រសួងមហាផ្ទៃ កាលពីខែកញ្ញានេះ បានលើកឡើងថា នៅចុងឆមាសទី២ ឆ្នាំ២០១៨នេះ ជនជាតិចិននៅកម្ពុជាកើនឡើងដល់ជាង២០ម៉ឺននាក់ ដោយចំនួននេះ មិនបូកបញ្ចូលជាមួយអ្នកការទូត អ្នកទេសចរណ៍ និងអង្គការសង្គមស៊ីវិល។ ក្នុងចំណោមជនជាតិចិនទាំង២០ម៉ឺននាក់នេះ មានជាង៧៨០០០នាក់ កំពុងរស់នៅខេត្តព្រះសីហនុ ដែលក្នុងនោះមានត្រឹមតែជាង២ម៉ឺននាក់ប៉ុណ្ណោះ មានប័ណ្ណការងារត្រឹមត្រូវ។ នេះបើយោងតាមគេហទំព័រអគ្គស្នងការនគរបាលជាតិ ផ្សាយកាលពីថ្ងៃទី១៣ ខែកញ្ញា ឆ្នាំ២០១៨៕
