Hello VOA៖ អ្នកវិភាគថាក្នុងអាណត្តិគ្មានសំឡេងប្រឆាំង ពលរដ្ឋបានដើរតួជំរុញកំណែទម្រង់អភិបាលកិច្ច
នៅក្នុងរយៈពេលមួយឆ្នាំនៃអាណត្តិទី៦របស់រដ្ឋាភិបាលកម្ពុជា ដែលកើតចេញពីការបោះឆ្នោតដ៏ចម្រូងចម្រាស់នៅឆ្នាំ២០១៨ ហើយដែលលែងមានសំឡេងគណបក្សប្រឆាំង ប្រជាពលរដ្ឋបានស្វាហាប់និងត្រូវដើរតួជាពិសេសតាមមធ្យោបាយហ្វេសប៊ុក ដើម្បីទាមទារឲ្យមានការកែប្រែខាងកិច្ចការអភិបាលកិច្ចក្នុងវិស័យជាច្រើន។ លោក ឱក សេរីសោភក្តិ៍ អ្នកឯកទេស ខាងផ្នែកអភិបាលកិច្ចបានបញ្ជាក់ក្នុងកម្មវិធី Hello VOA កាលពីថ្ងៃចន្ទថា ករណីការលាលែងពីតំណែងរបស់អតីតអភិបាលខេត្តព្រះសីហនុ ក្រោយមានការបាក់អគារ៧ជាន់ខុសច្បាប់របស់ចិនស្លាប់មនុស្ស ជាឧទាហរណ៍នៃការរួមចំណែករបស់ពលរដ្ឋក្នុងសមិទ្ធផលខាងអភិបាលកិច្ចនៃរដ្ឋាភិបាលថ្មី។ លោកថា ប្រសិទ្ធភាពនៃការទាមទាររបស់ពលរដ្ឋដោយមិនមានគណបក្សប្រឆាំង គឺអាស្រ័យដោយការទាមទារនេះមានចំពោះបញ្ហាជីវភាពជាក់ស្តែងដែលមិនអាចត្រូវគេចោទថាមានចរឹតនយោបាយទេ។ លោកបានអំពាវនាវឲ្យរដ្ឋាភិបាលពិចារណាបង្កើតការិយាល័យកណ្តាលមួយសម្រាប់ទទួលមតិពលរដ្ឋតាមបណ្តាញសង្គម។ (សឹង សុផាត, Hello VOA អភិបាលកិច្ចល្អ, ភ្នំពេញ, ២៦ សីហា ២០១៩)
