Hello VOA៖ ការថែរក្សាវប្បធម៌ខ្មែរនៅសហរដ្ឋអាមេរិក ប្រៀបដូចការរក្សាដួងព្រលឹងរបស់ខ្មែរ
អ្នកស្រលាញ់សិល្បៈនិងវប្បធម៌ខ្មែរក្នុងសហរដ្ឋអាមេរិក លើកឡើងថា ការថែរក្សាវប្បធម៌ខ្មែរក្នុងប្រទេសនេះ មានសារៈសំខាន់សម្រាប់រក្សាអត្តសញ្ញាណរបស់ជនជាតិខ្មែរ។ កញ្ញា ដួង ទេពវិសាល អ្នករាំម្នាក់ក្នុងក្រុមរបាំនៃសមាគមរក្សាមត៌កខ្មែរនៅសហរដ្ឋអាមេរិក ក្នុងរដ្ឋម៉ារីលែន មានប្រសាសន៍ក្នុងកម្មវិធី Hello VOA កាលពីថ្ងៃចន្ទ ទី៨ ខែមេសា ឆ្នាំ២០១៩ ថា៖ «នៅស្រុកអាមេរិកនេះ ត្រូវតែរក្សាវប្បធម៌ខ្មែរឱ្យបានល្អ។ បើមិនអញ្ចឹង យូរៗទៅខ្ញុំខ្លាចតែវប្បធម៌យើង កាន់តែរលាយទៅនៅសហរដ្ឋអាមេរិក»។ លោក កន សង្ហាក់ បុគ្គលិកនៃសហគមន៍ខ្មែរក្នុងក្រុងឡុងប៊ិច នៃរដ្ឋកាលីហ្វ័រញ៉ា បន្ថែមថា ៖ «យើងមិនអាចកាត់ផ្តាច់ពីឈាមជ័រជាខ្មែរបានទេ។ អញ្ចឹងហើយបានជាខ្ញុំគិតថា អានេះគឺជាកត្តាសំខាន់ណាស់ ដែលយើងត្រូវតែរក្សាអ្វីដែលជាអត្តសញ្ញាណ អ្វីដែលជាដួងព្រលឹងរបស់យើង»។ (លោកសាយ មុន្នី, Hello VOA, វ៉ាស៊ីនតោន, ៨ មេសា ២០១៩)
