Hello VOA ៖ បេក្ខជនអាមេរិកាំងដើមកំណើតខ្មែរ២នាក់ថា អស់លោកឈរឈ្មោះបោះឆ្នោតដើម្បីបម្រើពលរដ្ឋមិនថាខ្មែរ អាមេរិកាំងឬសាសន៍ណាទេ
លោក មាស សែម និង លោក អ៊ុង រិទ្ធី ដែលឈរឈ្មោះជាបេក្ខជនតំណាងរាស្ត្រនៅសង្កាត់ Middlesex ទី១៨ រួមទាំងទីក្រុង Lowell ថ្លែងថា អស់លោកចង់បម្រើផលប្រយោជន៍ពលរដ្ឋទាំងអស់មិនថាជាជាតិសាសន៍ណាទេ ហើយថែមទាំងចង់ជួយជំរុញឲ្យប្រទេសកម្ពុជាមានការរីកចម្រើនក្នុងលទ្ធិប្រជាធិបតេយ្យផងដែរ។ លោកទាំងពីរ កំពុងប្រណាំងប្រជែងគ្នាដើម្បីយកតំណែងតំណាងរាស្ត្រពីលោកតំណាងរាស្ត្រ មុំ រ៉ាឌី ដែលកាន់តំណែងជិត២អាណត្តិមកហើយ។ ទីក្រុង Lowell មានពលរដ្ឋខ្មែររស់នៅច្រើនជាងគេទី២ក្នុងសហរដ្ឋអាមេរិក បន្ទាប់ពីទីក្រុង Long Beach រដ្ឋ California។ លោកទាំងពីរបានអំពាវនាវនៅក្នុងកម្មវិធី Hello VOA មួយថ្ងៃមុនការបោះឆ្នោតបឋមក្នុងរដ្ឋ Massachusetts ថា សូមឲ្យពលរដ្ឋធ្វើការសម្រេចចិត្តតាមការយល់ដឹងរបស់ពួកគេ ហើយបោះឆ្នោតជូនបេក្ខជនដែលពួកគេយល់ថានឹងបម្រើពួកគេ៕ (លោក ប៉ូច រាសី Hello VOA រដ្ឋធានី វ៉ាស៊ីនតោន ៣ កញ្ញា ២០១៨)
