ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

Hello VOA៖ អ្នក​ឯកទេស​ថា​មេឃុំ​ថ្មី​ត្រូវ​ផ្តោត​លើ​សេវាកម្ម​ ធ្វើ​ការ​រួមគ្នា​ និង​តម្លាភាព​


ទាញ​យក​ពី​តំណភ្ជាប់​ដើម

អ្នកឯកទេស​លើកឡើង​ថា ​មេឃុំ-ចៅ​សង្កាត់​ថ្មី​ត្រូវ​តែ​ខិតខំ​ផ្តល់​សេវា​ជូន​ពលរដ្ឋ​ដោយ​កុំ​យក​បញ្ហា​នយោបាយ​មក​ខ្ទាស់​ជើង​គ្នា ហើយ​​ការ​ដឹកនាំ​គ្រប់គ្រង​ត្រូវ​មាន​តម្លាភាព​គ្រប់​ជំហាន​ទាំង​អស់។ លោក ​ឱក សេរីសោភក្តិ៍​ អ្នក​ឯកទេស​ខាង​ផ្នែក​អភិបាលកិច្ច​ល្អ​បាន​លើក​ឡើង​ថា​ ពលរដ្ឋ​បាន​បោះឆ្នោត​ដើម្បី​ឱ្យ​ថ្នាក់​ដឹកនាំ​ឃុំ​សង្កាត់​ធ្វើការ​ជាមួយ​គ្នា​ផ្តល់​សេវា​ល្អ​ប្រសើរ​ដល់​ពួកគាត់​ដែល​មាន​ដូច​ជា​សេវា​រដ្ឋបាល សុខាភិបាល​និង​អប់រំ​ជាដើម។​ រី​ឯ​ការ​ដឹកនាំ​ទាំង​លើ​ការ​គ្រប់គ្រង​ថវិកា​សម្រាប់​យក​មក​អភិវឌ្ឍន៍​មូលដ្ឋាន​គឺ​ត្រូវ​មាន​តម្លាភាព។ ក្នុង​ករណី​មាន​កង្វះ​ខាត​ថវិកា​ឬ​បច្ចេកទេស​អ្វី​ គឺ​ត្រូវ​ឱ្យ​ពលរដ្ឋ​ដឹង​ភ្លាមៗ​បើ​មិន​ដូច្នេះ​ទេ​ ពលរដ្ឋ​នឹង​មាន​ការ​អាក់អន់​ចិត្ត​ ហើយ​នឹង​ធ្វើ​ការ​សម្រេច​ជា​ថ្មី​នៅ​ឆ្នាំ​២០១៨​ដែល​ជា​ការ​បោះឆ្នោត​ជាតិ។ ការ​បោះឆ្នោត​ក្រុមប្រឹក្សា​ឃុំសង្កាត់​បាន​ធ្វើ​ឡើង​កាល​ពី​ថ្ងៃ​ទី​៤​ខែ​មិថុនា ​ហើយ​លទ្ធផល​ផ្លូវការ​បង្ហាញ​ថា ​គណបក្ស​ប្រជាជន​កម្ពុជា​ទទួល​បាន​សំឡេង​គាំទ្រ​ជាង​៣,៥លាន ​ហើយ​គណបក្ស​សង្គ្រោះ​ជាតិ​ទទួល​បាន​ជាង​៣លាន​សំឡេង។ នេះ​ជា​លទ្ធផល​ប្រកៀក​ប្រកិត​​គ្នា​រវាង​គណបក្ស​នយោបាយ​ធំៗ​ទាំងពីរ។ លោក​សោភក្តិ៍​មើល​ឃើញ​ថា ​ការណ៍​នេះ​​បង្ហាញ​នូវ​តុល្យភាព​អំណាច​ ហើយ​វា​ផ្តល់​ផល​ចំណេញ​ដល់​ពលរដ្ឋ​ ព្រោះ​គណបក្ស​កាន់​អំណាច​ត្រូវ​រង​សម្ពាធ​ពី​គណបក្ស​ប្រឆាំង​គ្រប់​ពេល​ដើម្បី​ឱ្យ​ផ្តល់​សេវា​ល្អ​ប្រសើរ​ដល់​ពលរដ្ឋ ​បើ​មិន​ដូច្នេះ​ទេ​គឺ​នឹង​ចាញ់​ឆ្នោត។ ​​ គណបក្ស​ប្រជាជន​កម្ពុជា​គ្រប់គ្រង​ឃុំ​សង្កាត់​ចំនួន​១.១៥៦ រី​ឯ​គណបក្ស​សង្គ្រោះ​ជាតិ​គ្រប់គ្រង​លើ​ឃុំ​សង្កាត់​ចំនួន​​៤៨៩៕ (ម៉ែន គឹមសេង, Hello VOA, វ៉ាស៊ីនតោន/ភ្នំពេញ, ២៦ មិថុនា ២០១៧)

កម្មវិធី​នីមួយៗ

មើល​វីដេអូ​ទាំង​អស់
XS
SM
MD
LG