Hello VOA៖ ពលករចំណាកស្រុកប្តេជ្ញាមកបោះឆ្នោតទោះជាមិនមានអន្តរាគមន៍ពីរដ្ឋាភិបាល
តំណាងពលករចំណាកស្រុកនៅក្នុងប្រទេសថៃបញ្ជាក់ថា ពលករដែលបានចុះឈ្មោះបោះឆ្នោតរួចហើយបានប្តេជ្ញាចិត្តថានឹងទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃអាទិត្យសប្តាហ៍នេះ បើទោះបីជាមិនមានការសម្រួលពីរាជរដ្ឋាភិបាលកម្ពុជាក៏ដោយ។ លោក លី រតនៈរស្មី និងលោក ទិត្យ ផល្លា បានបញ្ជាក់ក្នុងកម្មវិធី Hello VOA នៅថ្ងៃពុធនេះថា ពលករត្រៀមនឹងចំណាយថវិកាផ្ទាល់ខ្លួន និងប្រឈមមុខនឹងការលំបាកនៅច្រកព្រំដែនខាងភាគីកម្ពុជា ដែលតែងតែលំបាកជាងខាងភាគីថៃ។ ក្នុងពេលជាមួយគ្នានេះដែរ លោកស្រី មូរ សុខហួរ អនុប្រធានគណបក្សសង្គ្រោះជាតិក៏បានសម្តែងនូវការ«សោកស្តាយ» ដែលមិនមានអន្តរាគមន៍ពីរាជរដ្ឋាភិបាលកម្ពុជា បើទោះបីជាមានការស្នើសុំពីគណបក្ស និងសកម្មជនសិទ្ធិពលករក្នុងពេលកន្លងមកក៏ដោយ។ លោកស្រីបានលើកទឹកចិត្តពលករឱ្យខិតខំប្រើប្រាស់នូវសិទ្ធិរបស់ពួកគេតាមរយៈការលះបង់ពេលវេលា ដើម្បីមកបោះឆ្នោតនៅថ្ងៃទី៤ ខែមិថុនាខាងមុខនេះ។ (ម៉ែន គឹមសេង, Hello VOA, វ៉ាស៊ីនតោន/ភ្នំពេញ/ប្រទេសថៃ, ៣១ ឧសភា ២០១៧)
