Hello VOA៖ កម្ពុជាត្រូវគិតពីជំនាញការងារដែលខ្លួនត្រូវការ មុនបញ្ជូនពលករចេញ
អ្នកការពារសិទ្ធិពលករស្នើឱ្យរដ្ឋាភិបាលគិតគូដល់ការអភិវឌ្ឍធនធានមនុស្សរយៈពេលវែង ដោយសំឡឹងមើលថា មុខជំនាញការងារអ្វីដែលពលករអាចយកមកចូលរួមអភិវឌ្ឍន៍ប្រទេសបាន មុននឹងសម្រេចចិត្តបញ្ជូនពួកគេទៅធ្វើការក្នុងផ្នែកនោះនៅក្រៅប្រទេស។ លោកមឿន តុលា នាយកប្រតិបត្តិនៃអង្គការសង់ត្រាល់ បានបញ្ជាក់ថា ក្នុងពេលបច្ចុប្បន្ននេះរដ្ឋាភិបាលហាក់មិនទាន់យកចិត្តទុកដាក់លើចំណុចនេះនៅឡើយទេ គឺផ្តោតតែលើចំនួនពលករដែលត្រូវបញ្ជូនចេញ ហើយថែមទាំងមិនបានជួយការពារសិទ្ធិពួកគាត់ឱ្យបានដិតដល់ទៀតផង។ លោកស្រីមូរ សុខហួរ អ្នកតំណាងរាស្ត្រគណបក្សសង្គ្រោះជាតិ យល់ស្របថា មានទាំងច្បាប់ជាតិ និងអន្តរជាតិដែលកម្ពុជាគួរតែអនុវត្តសម្រាប់ការពារពលករ ព្រោះស្តង់ដាមានច្បាស់ ប៉ុន្តែការអនុវត្តនៅមានខ្វះចន្លោះនៅឡើយ ដែលធ្វើឱ្យពលករកម្ពុជា ជាពិសេសស្ត្រីត្រូវរងគ្រោះ។ (ម៉ែន គឹមសេង, Hello VOA, វ៉ាស៊ីនតោន/ភ្នំពេញ, ២៦ មករា ២០១៧)
