ស្ត្រីជនជាតិកូរ៉េម្នាក់បានរត់ចេញពីប្រទេសកូរ៉េខាងជើង និងបានកសាងជីវិតថ្មីរបស់ខ្លួនដោយធ្វើជាពិធីការនីទូរទស្សន៍នៅក្នុងប្រទេសកូរ៉េខាងត្បូង ហើយបន្ទាប់មកបាន«ត្រឡប់ទៅកាន់ប្រទេសកូរ៉េខាងជើង» ដែលជាប្រទេសកុម្មុយនិស្តវិញ ក្នុងរយៈពេល ៣ ឆ្នាំក្រោយមក។ ករណីនេះបានធ្វើឲ្យប្រជាពលរដ្ឋកូរ៉េខាងត្បូងមានការងឿងឆ្ងល់ថា ហេតុអ្វីបានជាស្ត្រីរូបនេះត្រឡប់ទៅកាន់ប្រទេសផ្ដាច់ការដែលខ្លួនបានគេចចេញទៅវិញ។
ប៉ូលិសកូរ៉េខាងត្បូង កំពុងព្យាយាមកំណត់មូលហេតុឲ្យច្បាស់ថាតើនាង Lim Ji Hyun ត្រូវគេចាប់ពង្រត់កាលពីខែមេសាកន្លងទៅនេះ ឬយ៉ាងណានោះ នៅពេលនាងធ្វើដំណើរពីទីក្រុងសេអ៊ូលទៅកាន់ប្រទេសចិន ហើយបន្ទាប់មកក៏បានបាត់ខ្លួន។ វីដេអូមួយខ្សែដែលមានបង្ហាញរូបនាង ត្រូវបានផ្សព្វផ្សាយកាលពីខែកក្កដាកន្លងទៅនេះ នៅលើវិបសាយ Uriminzokkiri ដែលជាវិបសាយផ្លូវការ របស់ប្រទេសកូរ៉េខាងជើង។ នៅក្នុងវីដេអូនោះ នាងបាននិយាយថា ជីវិតនៅក្នុងប្រទេសកូរ៉េខាងត្បូង ដែលជាប្រទេសមូលធននិយម ប្រៀបបីដូចជា«ការរស់នៅ នៅក្នុងឋាននរក»។
នាង Lim Ji Hyun ដែលនាពេលបច្ចុប្បន្ននេះបានប្រកាសពីអត្តសញ្ញាណរបស់ខ្លួននៅក្នុងប្រទេសកូរ៉េខាងជើងថាឈ្មោះ Jeon Hye Song បាននិយាយថា៖ «គំនិតខុសឆ្គងមួយ» ដែលគិតថា នាងអាចរកចំណូលបានយ៉ាងច្រើននោះ បានជំរុញឲ្យនាងរត់គេចទៅកាន់ប្រទេសកូរ៉េខាងត្បូង កាលពីខែមករា ឆ្នាំ ២០១៤។ ប៉ុន្តែនាងបាននិយាយនៅក្នុងខ្សែវីដេអូរបស់កូរ៉េខាងជើងនោះថា ធាតុពិតគឺខុសស្រឡះ ហើយនាងត្រូវធ្វើការនៅតាមបារស៊ីផឹក ដើម្បីបានរស់។
ការចេញមុខនៅលើកញ្ចក់ទូរទស្សន៍ និងការមានតួនាទីជាតារានៅក្នុងកម្មវិធីកម្សាន្ត បានធ្វើឲ្យនាង Lim Ji Hyun មានភាពល្បីល្បាញនៅកូរ៉េខាងត្បូង ប៉ុន្តែនៅពេលនេះ នាងនិយាយថា នាងបានរស់នៅក្នុងការឈឺចាប់ទាំងផ្លូវកាយ និងផ្លូវចិត្ត។
តើនាងត្រឡប់ទៅកូរ៉េខាងជើងវិញដោយស្ម័គ្រចិត្តឬយ៉ាងណា?
ស្ថិតនៅទីតាំងថ្មីដែលមានភាពស៊ាំរួចមកហើយរបស់នាងនៅកូរ៉េខាងជើង នាង Lim Ji Hyun បានបរិហារប្រទេសកូរ៉េខាងត្បូង និងទូរទស្សន៍ Chosun ដែលបានផលិតកម្មវិធីស្ដីពីអ្នករត់គេចពីប្រទេសកូរ៉េខាងជើងនានា ដែលរូបនាងផ្ទាល់ក៏មានបង្ហាញនៅក្នុងកម្មវិធីនោះផងដែរ។ ទោះជាយ៉ាងនេះក្ដី សាធារណជនកូរ៉េខាងត្បូងនៅតែមានការចាប់អារម្មណ៍ចង់ដឹងអំពីនាងយ៉ាងខ្លាំងដោយមានចម្ងល់ថា តើនាងត្រឡប់ទៅកាន់ប្រទេសកូរ៉េខាងជើងវិញដោយស្ម័គ្រចិត្តឬក៏យ៉ាងណានោះ។
អ្នករត់គេចពីប្រទេសកូរ៉េខាងជើងម្នាក់ទៀត ឈ្មោះ Kim Ji Young ដែលបានបង្ហាញមុខជាមួយនាង Lim Ji Hyun នៅក្នុងកម្មវិធីសម្ដែង Moranbong Club ដែរនោះ មិនគិតដូចនេះនោះទេ។
អ្នកស្រី Kim Ji Young បានប្រាប់ VOA ភាសាកូរ៉េថា អ្នករត់គេចពីកូរ៉េខាងជើងមកកាន់កូរ៉េខាងត្បូងមួយចំនួនកាលពីពេលមុនបានប្រព្រឹត្តបទឧក្រិដ្ឋធ្ងន់ធ្ងរនៅក្នុងប្រទេសកូរ៉េខាងត្បូង ហើយបានសម្រេចចិត្តត្រឡប់ទៅប្រទេសកូរ៉េខាងជើងវិញ ដើម្បីគេចចេញពីការដាក់ទោសទណ្ឌ។ ប៉ុន្តែអ្នកដទៃទៀតស្ទើរតែទាំងអស់ដែលបានរសាត់អណ្ដែតទៅដល់ប្រទេសកូរ៉េខាងជើងវិញ គឺដោយសារការបង្ខិតបង្ខំ។
អ្នកស្រី Kim Ji Young បាននិយាយថា៖ «ការត្រឡប់ទៅកាន់ប្រទេសកូរ៉េខាងជើងវិញ បន្ទាប់ពីបានរស់នៅក្នុងប្រទេសកូរ៉េខាងត្បូងរួចមក គឺមានគ្រោះថ្នាក់ជាងរត់គេចចេញពីប្រទេសកូរ៉េខាងជើងទៅទៀត។ វាប្រៀបដូចជាកាន់ដបសាំងរត់ចូលភ្លើងអញ្ចឹង»។
តារាមួយរូបទៀតនៅក្នុងកម្មវិធីសម្ដែង Moranbong Club ដែលមានឈ្មោះថា Kim Ka Young ដែលបានរត់គេចចេញពីប្រទេសកូរ៉េខាងជើងដែរនោះ ជឿថានាង Lim Ji Hyun ត្រូវគេចាប់ពង្រត់ទៅទីក្រុងព្យុងយ៉ាងវិញ ដោយផ្ទុយពីឆន្ទៈរបស់នាង។
ស្ត្រីឈ្មោះ Lim Ji-Hyun ក្នុងបទសម្ភាសន៍ជាមួយទូរទស្សន៍កូរ៉េខាងជើង កាលពីថ្ងៃទី១៩ កក្កដា ២០១៧។
អ្នកស្រី Kim Ka Young បាននិយាយថា៖ «ហេតុអ្វីបានជានាងទៅវិញដោយខ្លួនឯង? នាងប្រាកដជាត្រូវបានគេចាប់ពង្រត់មិនខាន។ គ្រប់ពាក្យពេចន៍ដែលនាងនិយាយក្នុងបទសម្ភាសន៍នោះ ស្ដាប់ទៅដូចជាមិនមែនតាមធម្មជាតិ គឺដូចប្រឌិតទាំងស្រុង»។
ប្រទេសចិនជាកន្លែងគ្រោះថ្នាក់សម្រាប់អ្នករត់គេចពីកូរ៉េខាងជើង
បើយោងតាមអ្នករត់គេចពីប្រទេសកូរ៉េខាងជើងម្នាក់ទៀតឈ្មោះ Kim Kwang Jin ដែលនាពេលបច្ចុប្បន្ននេះ ជាអ្នកស្រាវជ្រាវនៅវិទ្យាស្ថានដើម្បីយុទ្ធសាស្ត្រសន្តិសុខជាតិ (INSS) ដែលឧបត្ថម្ភដោយរដ្ឋាភិបាលនៅទីក្រុងសេអ៊ូល បានឲ្យដឹងថា «ពួកអ្នកវិលចូលប្រទេសកូរ៉េខាងជើងវិញដោយមិនស្ម័គ្របែបនេះ» ពីប្រទេសចិន គឺមិនមែនជារឿងប្លែកនោះទេ។
លោក Kim Kwang Jin បានប្រាប់ VOA ថា៖ «មានករណីជាច្រើនផ្សេងទៀតដែលអ្នករត់គេចពីប្រទេសកូរ៉េខាងជើង ត្រូវបានចាប់ពង្រត់នៅប្រទេសចិន នៅពេលដែលពួកគេព្យាយាមផ្ញើលុយទៅឲ្យគ្រួសាររបស់ពួកគេនៅក្នុងប្រទេសកូរ៉េខាងជើង»។
ប្រជាពលរដ្ឋកូរ៉េខាងជើងរាប់ពាន់នាក់បានស្វែងរកសិទ្ធិជ្រកកោននៅក្នុងប្រទេសកូរ៉េខាងត្បូង ក្នុងរយៈពេលមួយទសវត្សរ៍កន្លងមកនេះ ហើយនាពេលបច្ចុប្បន្ននេះ មានអតីតប្រជាពលរដ្ឋកូរ៉េខាងជើងជាង ៣ ម៉ឺន ៨ រយនាក់ កំពុងរស់នៅក្នុងប្រទេសកូរ៉េខាងត្បូង។ ចាប់តាំងពីឆ្នាំ ២០១២ មក មានករណីអ្នករត់គេចពីកូរ៉េខាងជើងចំនួន ២៥ ករណី ដែលបានវិលត្រឡប់ទៅកាន់ប្រទេសកូរ៉េខាងជើងវិញ។ ក្នុងនោះមាន ៥ នាក់បានដូរចិត្ត ហើយរត់ត្រឡប់មកកាន់ប្រទេសកូរ៉េខាងត្បូងវិញម្ដងទៀត។ នេះបើយោងតាមការបញ្ជាក់របស់ក្រសួងបង្រួបបង្រួមកូរ៉េទាំងពីររបស់ប្រទេសកូរ៉េខាងត្បូង។
ក្រសួងបង្រួបបង្រួមកូរ៉េទាំងពីរ ដែលបានវិភាគទៅលើសារព័ត៌មានរបស់កូរ៉េខាងជើង និងបានផ្អែកលើប្រភពផ្សេងៗទៀត បានបញ្ជាក់ថា ក្រសួងមិនអាចកំណត់ចំនួនអ្នកដែលត្រូវបានបង្ខំឲ្យត្រឡប់ទៅកាន់ប្រទេសកូរ៉េខាងជើងវិញ ថាមានប៉ុន្មាននាក់នោះទេ បន្ទាប់ពីពួកគេបានរត់គេចមកកាន់ប្រទេសកូរ៉េខាងត្បូងមក។
អ្នករត់គេចមកកាន់កូរ៉េខាងត្បូងមួយចំនួនជាអ្នកស៊ើបការណ៍សម្ងាត់
លោក Greg Scarlatoiu នាយកប្រតិបត្តិនៃគណៈកម្មការដើម្បីសិទ្ធិមនុស្សនៅក្នុងប្រទេសកូរ៉េខាងជើង បាននិយាយថា មានហេតុផលជាច្រើនដែលធ្វើឲ្យអ្នករត់គេចពីកូរ៉េខាងជើងសម្រេចចិត្តត្រឡប់ទៅវិញ។
រូបឯកសារ៖ រូបគំនូរនិយាយពីការសម្លាប់នៅមុខមហាជននៅកូរ៉េខាងជើង។
លោក Greg Scarlatoiu បានពន្យល់ថា អ្នកខ្លះព្យាយាមជួយសមាជិកគ្រួសាររបស់ពួកគេនៅក្នុងប្រទេសកូរ៉េខាងជើង ប៉ុន្តែពួកគេត្រូវបានចាប់ខ្លួននៅពេលនោះ។ អ្នកខ្លះទៀត បានក្លាយជាអ្នកជឿលើសាសនា ពេលពួកគេនៅក្នុងប្រទេសកូរ៉េខាងត្បូង ហើយបានត្រឡប់ទៅកាន់ប្រទេសកូរ៉េខាងជើងវិញ ដើម្បីបញ្ចុះបញ្ចូលប្រជាពលរដ្ឋកូរ៉េខាងជើងឲ្យប្ដូរសាសនា ប៉ុន្តែត្រូវបានគេចាប់ដាក់ឃុំ។
លោក Greg Scarlatoiu បានបន្ថែមថា នៅមានអ្នកផ្សេងទៀតដែលជាភ្នាក់ងារកូរ៉េខាងជើង ដែលបានទៅកូរ៉េខាងត្បូងក្នុងចេតនាប្រមូលព័ត៌មាន ហើយក៏ត្រឡប់ទៅកាន់ប្រទេសកូរ៉េខាងជើងវិញ។
អ្នកធ្វើការផ្នែកសិទ្ធិមនុស្សរូបនេះបាននិយាយបន្តទៀតថា អ្នករត់គេចចេញពីកូរ៉េខាងជើងមួយចំនួនគឺជា «អ្នកដែលមានជីវភាពលំបាកខ្លាំង ហើយរស់នៅដាច់ឆ្ងាយពីគេឯង»។ សម្រាប់អ្នកទាំងនោះ បញ្ហារបស់ពួកគេ «មានសភាពលំបាកធ្ងន់ធ្ងរខ្លាំងពេក ដែលធ្វើឲ្យពួកគេមានជម្រើសតែមួយគត់គឺត្រឡប់ទៅកាន់ប្រទេសកូរ៉េខាងជើងវិញ»។ លោក Greg Scarlatoiu បានប្រាប់ VOA ថា លោកជឿថា នាង Lim Ji Hyun ស្ថិតក្នុងស្ថានភាពបែបនេះ។
អ្នករត់គេចពីកូរ៉េខាងជើងភាគច្រើនបានជួបប្រទះនឹងការលំបាក នៅពេលព្យាយាមសម្របខ្លួនទៅនឹងសង្គមមួយដែលមានភាពខុសប្លែកខ្លាំងពីស្ថានភាពរឹតត្បិតយ៉ាងតឹងតែងនៅកូរ៉េខាងជើង។
ពលរដ្ឋកូរ៉េខាងជើងប្រឈមនឹងឧបសគ្គសង្គម
លោក Kim Kwang Jin មកពីវិទ្យាស្ថានដើម្បីយុទ្ធសាស្ត្រសន្តិសុខជាតិ (INSS) បានប្រាប់ VOA ថា៖ «អ្នករត់គេចពីកូរ៉េខាងជើង ជួបការលំបាកក្នុងការសម្របខ្លួនចូលទៅក្នុងសង្គមកូរ៉េខាងត្បូង និងប្រឈមនឹងការលំបាកដែលកើតចេញភាពខុសគ្នាខ្លាំងក្លាខាងផ្នែកវប្បធម៌ និងកម្រិតនៃការអប់រំ។ ខ្ញុំអាចប្រាប់អ្នកបានថា មានករណីជាច្រើនទាក់ទងនឹងការសម្លុតរករឿងនៅតាមសាលារៀន ហើយបញ្ហានេះពិតជាប៉ះពាល់យ៉ាងខ្លាំងដល់អ្នករត់គេចពីប្រទេសកូរ៉េខាងជើងដែលព្យាយាមសម្របខ្លួនចូលក្នុងសង្គមកូរ៉េខាងត្បូង»។
ការរកចំណូលដើម្បីជីវភាពរស់នៅអាចជាបញ្ហាចម្បងមួយទៀត។ ការរកការងារណាដែលមានភាពឋិតថេរជាប់លាប់មិនមែនជារឿងងាយស្រួលទេសម្រាប់អ្នករត់គេចពីប្រទេសកូរ៉េខាងជើង ដែលមានកម្រិតអប់រំដែលគេមិនអាចទទួលយកបាននៅក្នុងប្រទេសកូរ៉េខាងត្បូង។ នេះបើតាមការបញ្ជាក់របស់លោក Kim Sung Kyung សាស្ត្រាចារ្យមួយរូបនៅសាកលវិទ្យាល័យសិក្សាពីកូរ៉េខាងជើង (University of North Korea Studies)។
លោក Joseph Kim ដែលជាអ្នកភៀសខ្លួនជនជាតិកូរ៉េខាងជើងម្នាក់ដែលបច្ចុប្បន្ននេះកំពុងរស់នៅក្នុងសហរដ្ឋអាមេរិក បាននិយាយថា អ្នករត់គេចពីកូរ៉េខាងជើងមួយចំនួនអាចមានអារម្មណ៍ថាពួកគេត្រូវតែត្រឡប់ទៅកូរ៉េខាងជើងវិញ ដោយសាររបបគ្រប់គ្រងកូរ៉េខាងជើងគំរាមកំហែងដាក់ទោសទណ្ឌដល់ក្រុមគ្រួសាររបស់ពួកគេ។
អ្នករត់គេចពីកូរ៉េខាងជើងម្នាក់ បង្ហាញរូបថតអ្នករត់គេចខ្លួន៩នាក់ផ្សេងទៀត ដែលត្រូវបញ្ជូនទៅស្រុកវិញពីប្រទេសឡាវ ក្នុងពេលធ្វើបាតុកម្មមួយទៅទីក្រុងសេអ៊ូល ប្រទេសកូរ៉េខាងត្បូង។
ភាគច្រើននៃអ្នករត់គេចពីកូរ៉េខាងជើង និងអ្នកជំនាញអំពីបញ្ហាកូរ៉េខាងជើង បាននិយាយថា រដ្ឋាភិបាលកូរ៉េខាងត្បូងអាចធ្វើបានច្រើនជាងនេះ ដើម្បីបន្ធូរបន្ថយដល់អារម្មណ៍បែកបាក់ដែលអ្នករត់គេចពីកូរ៉េខាងជើងកំពុងមានក្នុងខ្លួន។ ពួកគេបានស្នើថា អ្នករត់គេចពីកូរ៉េខាងជើងដែលត្រូវបានត្រួតពិនិត្យដោយហ្មត់ចត់ដោយទីភ្នាក់ងារជាតិស៊ើបការណ៍សម្ងាត់ អាចស្នាក់នៅបានរយៈពេលវែងជាង ១២ សប្ដាហ៍ នៅមជ្ឈមណ្ឌល Hanawon ដែលទទួលបានការឧបត្ថម្ភពីរដ្ឋាភិបាលកូរ៉េខាងត្បូង។ សំណើមួយទៀត គឺជាការផ្ដល់នូវវគ្គបណ្ដុះបណ្ដាលវិជ្ជាជីវៈឲ្យបានច្រើននិងកាន់តែល្អប្រសើរជាងមុន។
លោក Cho Han-bum អ្នកវិភាគនៅវិទ្យាស្ថានជាតិបង្រួបបង្រួមកូរ៉េទាំងពីរ (Korea Institute for National Unification) ដែលជាអង្គការស្រាវជ្រាវគោលនយោបាយមួយឧបត្ថម្ភដោយរដ្ឋាភិបាលកូរ៉េខាងត្បូង បាននិយាយថា៖ «បន្ថែមទៅលើការផ្ដល់ថវិកាសម្រាប់ការតាំងទីស្នាក់អាស្រ័យ រដ្ឋាភិបាលគួរតែមានការប្រឹងប្រែងបន្ថែមទៀតទៅលើការបង្កើតកម្មវិធីជួយអ្នករត់គេចពីកូរ៉េខាងជើងឲ្យសិក្សាពីជំនាញវិជ្ជាជីវៈផ្សេងៗ ដើម្បីជួយទ្រទ្រង់ជីវភាពរស់នៅរបស់ពួកគេផ្ទាល់»។ រដ្ឋាភិបាលទីក្រុងសេអ៊ូលបានផ្ដល់ថវិកាជាមធ្យមចំនួន ៥ លានវ៉ុន ឬស្មើនឹង ៤ ពាន់ ២ រយដុល្លារអាមេរិក ដើម្បីជួយផ្នែកតាំងទីលំនៅថ្មីសម្រាប់អ្នករត់គេចពីកូរ៉េខាងជើង។
ប្រជាពលរដ្ឋកូរ៉េខាងត្បូងមួយចំនួន ឬសូម្បីតែអតីតអ្នករត់គេចពីកូរ៉េខាងជើងដូចជានាង Kim Hyun-jung ជាដើម តែងគិតថា ប្រជាពលរដ្ឋកូរ៉េខាងជើងគួរតែព្យាយាមឲ្យខ្លាំងដើម្បីសម្របខ្លួនចូលទៅក្នុងសង្គមកូរ៉េខាងត្បូង។
នាង Kim Hyun-jung បាននិយាយថា៖ «ការទៅរកនរណាម្នាក់ឲ្យជួយ មិនមែនជារឿងដែលពួកគេត្រូវគិតថាជាការអាម៉ាស់នោះទេ។ ខ្ញុំគិតថា គ្មានអ្នកណាម្នាក់បិទភ្នែកមើលមិនឃើញទុក្ខវេទនារបស់អ្នករត់គេចពីកូរ៉េខាងជើងនោះទេ ប្រសិនបើអ្នកទាំងនោះសុំឲ្យជួយនោះ»៕
ប្រែសម្រួលដោយ សើ សាយ្យាណា