សេតវិមានកំពុងការពារបទបញ្ជារបស់លោកប្រធានាធិបតី ដូណាល់ ត្រាំ ដែលដាក់កំហិតទៅលើការធ្វើអន្តោប្រវេសន៍ចូលមកកាន់សហរដ្ឋអាមេរិកពីបណ្តាប្រទេសដែលកាន់សាសនាឥស្លាមភាគច្រើនទាំង៧ បើទោះបីជាមានការធ្វើបាតុកម្មតវ៉ាយ៉ាងច្រើននិងមានសេចក្តីបង្គាប់របស់តុលាការសហព័ន្ធមួយឲ្យបញ្ឈប់ចំណាត់ការនោះក៏ដោយ។
តុលាការសហព័ន្ធមួយបានធ្វើអន្តរាគមន៍ បន្ទាប់ពីបទបញ្ជារបស់លោកប្រធានាធិបតីអាមេរិក ដូណាល់ ត្រាំ ដាក់កំហិតទៅលើការធ្វើអន្តោប្រវេសន៍មកកាន់សហរដ្ឋអាមេរិកពីសំណាក់ប្រទេសដែលកាន់សាសនាឥស្លាមភាគច្រើនចំនួន៧ ដែលនាំឲ្យមានការយល់ច្រលំកាន់តែខ្លាំងឡើងទៅជនភៀសខ្លួន អ្នកមានសិទ្ធិរស់នៅអចិន្ត្រៃយ៍ និស្សិត និងកម្មករដែលត្រូវបានឃុំខ្លួននៅតាមអាកាសយានដ្ឋានអាមេរិក ឬត្រូវបានហាមឃាត់មិនឲ្យជិះយន្តហោះមកកាន់សហរដ្ឋអាមេរិក។
កាលពីល្ងាចថ្ងៃសៅរ៍ លោកស្រី Ann Donnelly ចៅក្រមក្នុងបូរីញូយ៉ក បានចេញសេចក្តីបង្គាប់ជាបន្ទាន់មួយ ដែលហាមឃាត់ជាបណ្តោះអាសន្នទៅលើការបញ្ជូនមនុស្សដែលត្រូវបានឃុំខ្លួននៅអាកាសយានដ្ឋានទៅប្រទេសគេវិញ ដែលពួកគេទាំងនោះមានទិដ្ឋាការមានសុពលភាពក្នុងការចូលមកកាន់សហរដ្ឋអាមេរិក។
សេចក្តីបង្គាប់នោះក៏បានហាមឃាត់មិនឲ្យឃុំខ្លួននរណាម្នាក់ដែលមានពាក្យសុំជាជនភៀសខ្លួនដែលត្រូវបានគេអនុម័តនោះដែរ។ លោកស្រី Donnelly បានមានប្រសាសន៍នៅក្នុងសេចក្តីបង្គាប់របស់លោកស្រីថា៖ «បើគ្មានការដកបទបញ្ជាឲ្យបញ្ជូនខ្លួនទេនោះ ច្បាស់ណាស់នឹងមានគ្រោះថ្នាក់យ៉ាងខ្លាំងនិងមិនអាចកែប្រែបានដល់ជនភៀសខ្លួន អ្នកមានទិដ្ឋាការចូលមកកាន់សហរដ្ឋអាមេរិក និងបុគ្គលនានាដែលមកពីបណ្តាប្រទេសដែលមានចែងនៅក្នុងបទបញ្ជារបស់លោកប្រធានាធិបតី»។
កាលពីថ្ងៃអាទិត្យ លោក Boris Epshteyn អ្នកនាំពាក្យរបស់លោកប្រធានាធិបតី ត្រាំ បានថ្លែងប្រាប់អ្នកកាសែតក្នុងផ្នែកមួយនៃកម្មវិធីទូរទស្សន៍ Fox and Friends ថា សេចក្តីបង្គាប់របស់តុលាការមិនអាចហាមឃាត់ដល់បទបញ្ជារបស់ប្រធានាធិបតីបាននោះទេ ទោះជាក្នុងលក្ខខណ្ឌណាក៏ដោយ។
លោក Epshteyn បាននិយាយថា បទបញ្ជានោះគឺដើម្បីធានាថាច្បាប់នាពេលបច្ចុប្បន្ននេះគឺត្រូវបានគេអនុវត្តតាម៕