សហរដ្ឋអាមេរិកនិងអាល្លឺម៉ង់ បានអំពាវនាវឱ្យមានការអនុញ្ញាតដល់អ្នកសង្កេតការណ៍អន្តរជាតិ ចូលទៅក្នុងតំបន់ Nagorno-Karabakh ខណៈពេលដែលប្រទេសអាស៊ែបៃហ្សង់បាននិយាយនៅថ្ងៃពុធនេះថា ទាហានរបស់ខ្លួនចំនួន១៩២នាក់ ត្រូវបានសម្លាប់នៅក្នុងប្រតិបត្តិការមួយ ដើម្បីដណ្តើមយកតំបន់នេះមកវិញពីក្រុមអ្នកបំបែកខ្លួនជនជាតិភាគតិចអាមេនី។
ក្រសួងការបរទេសសហរដ្ឋអាមេរិកនិយាយថា រដ្ឋមន្ត្រីការបរទេសអាមេរិកលោក Antony Blinken បានជំរុញដល់ប្រធានាធិបតីប្រទេសអាស៊ែបៃហ្សង់ លោក lham Aliyev នៅក្នុងការហៅតាមទូរស័ព្ទមួយ ដើម្បីធានាថា សិទ្ធិរបស់ប្រជាពលរដ្ឋនៅក្នុងតំបន់ Nagorno-Karabakh នឹងត្រូវបានការពារ និងអនុញ្ញាតឱ្យមានផ្នែកមនុស្សធម៌បានចូលទៅដល់តំបន់នោះ។
ខុទ្ទកាល័យរបស់ប្រធានាធិបតី Aliyev បាននិយាយថា លោក Aliyev បានប្រាប់លោក Blinken ថា សកម្មភាពទាំងនេះកំពុងដំណើរការ ដើម្បីធានាសិទ្ធិរបស់ពលរដ្ឋអាមេនី ដែលកំពុងរស់នៅក្នុងតំបន់ Karabakh និងថា កងកម្លាំងអាស៊ែបៃហ្សង់ បើកប្រតិបត្តិការវាយប្រហាររយៈពេល២៤ម៉ោង កាលពីសប្តាហ៍មុន ដោយសំដៅទៅលើទីតាំងយោធាតែប៉ុណ្ណោះ។
រដ្ឋមន្ត្រីការបរទេសអាល្លឺម៉ង់អ្នកស្រី Annalena Baerbock និយាយនៅថ្ងៃពុធនេះថា ការអនុញ្ញាតឱ្យក្រុមអ្នកត្រួតពិនិត្យចូលទៅក្នុងតំបន់នោះ គឺជាភស្តុតាងនៃជំនឿចិត្តដែលថា ប្រទេសអាស៊ែបៃហ្សង់មានលក្ខណៈម៉ឺងម៉ាត់លើការប្តេជ្ញាចិត្តរបស់ខ្លួន ស្តីពីបញ្ហាសន្តិសុខនិងសុខមាលភាពរបស់ពលរដ្ឋក្នុងតំបន់ Nagorno-Karabakh។
អ្នកស្រី Baerbock ក៏បានប្រកាសផងដែរថា ប្រទេសអាល្លឺម៉ង់នឹងផ្តល់ជំនួយមនុស្សធម៌បន្ថែមទ្វេដងតាមរយៈកាកបាទក្រហមអន្តរជាតិ ដោយបង្កើនប្រាក់ជំនួយដល់ជាង៥លានដុល្លារអាមេរិក។
ការវាយប្រហាររបស់កងកម្លាំងអាស៊ែបៃហ្សង់ បានធ្វើឱ្យជនជាតិភាគតិចអាមេនីរាប់ពាន់នាក់ ត្រូវរត់ចេញពីតំបន់ Nagorno-Karabakh ដែលស្ថិតក្នុងទឹកដីរបស់អាស៊ែបៃហ្សង់ ប៉ុន្តែត្រូវបានគ្រប់គ្រងដោយជនជាតិភាគតិចអាមេនីចាប់តាំងពីឆ្នាំ១៩៩៤ មក រហូតដល់ផ្នែកខ្លះនៃតំបន់នេះ ត្រូវបានដណ្តើមយកមកគ្រប់គ្រងឡើងវិញ ដោយប្រទេសអាស៊ែបៃហ្សង់ នៅក្នុងសង្រ្គាមកាលពីឆ្នាំ២០២០ កន្លងទៅ។
មានពលរដ្ឋអាមេនីជាង៤ម៉ឺន៣ពាន់នាក់ បានមកដល់ប្រទេសអាមេនីនៅព្រលឹមថ្ងៃពុធនេះ។
មន្ត្រីក្រុមបំបែកខ្លួននិយាយថា មានមនុស្សជាង២០០នាក់ស្លាប់ និង៤០០នាក់រងរបួសនៅខាងខ្លួន៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។