ប្រទេសអាមេនីនិងអាស៊ែបៃហ្សង់ បានឯកភាពគ្នាប្រកាសនូវបទឈប់បាញ់ថ្មីមួយកាលពីថ្ងៃអង្គារម្សិលមិញ បន្ទាប់ពីការប្រយុទ្ធគ្នាអស់រយៈពេល៦សប្តាហ៍ក្នុងតំបន់ជម្លោះទឹកដី Nagorno-Karabakh ដែលបានសម្លាប់មនុស្សយ៉ាងតិច១.៣០០នាក់។
ប្រទេសរុស្សី បានលើកឡើងនៅថ្ងៃអង្គារថា ក្រោមកិច្ចព្រមព្រៀងនេះ រុស្សីបានដាក់ពង្រាយកងកម្លាំងថែរក្សាសន្តិភាពជិត២.០០០នាក់នៅក្នុងតំបន់ជម្លោះនោះ សម្រាប់រយៈពេល៥ឆ្នាំ។
បទឈប់បាញ់ក្នុងពេលកន្លងមក បានទទួលបរាជ័យជាបន្តបន្ទាប់ ប៉ុន្តែកិច្ចព្រមព្រៀងចុងក្រោយបំផុតនេះបានធ្វើឡើង ក្រោយកងកម្លាំងអាស៊ែបៃហ្សង់ ដណ្តើមបានទីតាំងជាច្រើនកន្លែងក្នុងតំបន់ជម្លោះ ដែលក្នុងនោះ គេក៏បានអះអាងផងដែរថា ដណ្តើមបាននូវទីប្រជុំជនយុទ្ធសាស្ត្រ Shusha កាលពីថ្ងៃអាទិត្យដែរ។
កិច្ចព្រមព្រៀងបទឈប់បាញ់ថ្មីនេះ បានអនុញ្ញាតឲ្យអាស៊ែបៃហ្សង់ អាចរក្សាការគ្រប់គ្រងតំបន់នានាដែលខ្លួនវាយដណ្តើមយកបាន ពីការប្រយុទ្ធគ្នាចាប់តាំងពីចុងខែកញ្ញាមក។
តំបន់ជម្លោះទឹកដី Nagorno-Karabakh ត្រូវបានអន្តរជាតិទទួលស្គាល់ថា ជាផ្នែកមួយរបស់ប្រទេសអាស៊ៃបៃហ្សង់ ប៉ុន្តែតំបន់នេះ ជាក់ស្តែងត្រូវគ្រប់គ្រងដោយជនជាតិអាមេនី ដែលរស់នៅទីនោះក្នុងចំនួនភាគច្រើន៕
