ទោះណាជាប្រជាពលរដ្ឋអាមេរិកាំងបានសម្រាកក្នុងទិវារំឭកដល់វិញ្ញាណក្ខន្ធយុទ្ធជនក្នុងសប្តាហ៍នេះក៏ដោយ ការផ្តោតយកចិត្តទុកដាក់ខ្លាំងទៅលើការប្រកួតប្រជែងដើម្បីតំណែងប្រធានាធិបតីក៏នៅតែមាន ហើយការបត់បែននៃការប្រកួតប្រជែងសឹងតែរៀងរាល់នេះ ធ្វើឲ្យមានភាពច្របូកច្របល់ដល់គតិបណ្ឌិតជាធម្មតា ដែលការទាំងអស់នេះហើយធ្វើឲ្យទីបញ្ចប់នៃរដូវឃោសនាបោះឆ្នោតបឋមមានភាពវីវក់ខុសធម្មតា។
កាលពីខែមករា លោក Donald Trump ជាបេក្ខជនម្នាក់ក្នុងបណ្តាពួកបេក្ខជនជាង១២នាក់ខាងគណបក្សសាធារណរដ្ឋដែលគ្មាននរណាម្នាក់ជាបេក្ខជនដែលមានការគាំទ្រច្រើនដាច់ណាត់នៅឡើយទេ ចំណែកឯលោកស្រី Hillary Clinton ជាបេក្ខជននាំមុខគេនៅលើគូប្រជែងតែពីរនាក់ខាងគណបក្សប្រជាធិបតេយ្យ។
កាលពីសប្តាហ៍មុន លោក Trump ប្រាកដជាទទួលការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋ។
លោក Trump ថ្លែងថា៖ «យើងបានទទួលការតែងតាំងដោយមានចំនួនគាំទ្រច្រើនដែលលោកអ្នកមិនអាចជឿបាន»។
ចំណែកលោកស្រី Clinton កំពុងតែធ្វើការឃោសនាខ្លាំងដើម្បីបញ្ចៀសកុំឱ្យមានបរាជ័យនាំឱ្យអាមាសនៅពេលបិទការបោះឆ្នោតបឋម។ លោកស្រី «អរគុណ San Francisco»!
បញ្ហាកាន់អាក្រក់ថែមទៀតនោះគឺថា៖ របាយការណ៍កាលពីសប្តាហ៍មុនរបស់អគ្គាធិការចែងថាការប្រើប្រាស់ email របស់លោកស្រីក្នុងឋានៈជារដ្ឋមន្ត្រីការបរទេសបានរំលោភលើគោលនយោបាយរបស់ក្រសួង ហើយការណ៍នេះបានធ្វើឱ្យលោកស្រី clinton ឋិតក្នុងស្ថានភាពការពារខ្លួន។
លោកស្រីបន្តថា៖ «ការប្រើប្រាស់ email ឯកជនជាការអនុវត្តន៍មួយដោយពួករដ្ឋមន្ត្រីការបរទេសឯទៀតៗ។ហើយបទបញ្ញ័ត្តិមិនបានត្រូវបំភ្លឺឱ្យបានច្បាស់លាស់ទេរហូតដល់នៅក្រោយពេលខ្ញុំចេញពីតំណែង។ហើយដូចជាខ្ញុំបាននិយាយច្រើនដងមកហើយថា ប្រសិនបើខ្ញុំអាចធ្វើឡើងវិញ ខ្ញុំនឹងធ្វើដោយខុសប្លែកពីមុន»។
លោក Trump ក៏បានថ្លែងថា៖ «ខ្ញុំបានសង្កេតមើល Hillary ដូចដែលខ្ញុំនិយាយថា Hillary ទុច្ចរិត។ គាត់ជាមនុស្សទុច្ចរិត។ គាត់និយាយកុហក។គាត់និយាយកុហកច្រើនណាស់។ វាជាការមិនល្អទេ...Hillary ជាមហន្តរាយមួយ។គាត់ធ្វើការវិនិច្ឆ័យមិនល្អ»។
បេក្ខជនប្រធានាធិបតីគណបក្សសារធារណរដ្ឋលោក Donald Trump ថ្លែងពីការឈ្នះ ការបោះឆ្នោតបឋមនៅរដ្ឋ Connecticut រដ្ឋ Delaware រដ្ឋ Marlyland រដ្ឋ Pennsylvania និងរដ្ឋ Rhode Island នៅអគារ Trump Tower ក្នុងបូរី New York ស.រ.អា កាលពីថ្ងៃទី២៦ ខែមេសា ឆ្នាំ២០១៦។ EPA/JUSTIN LANE
លោក Trump បានយល់ព្រមធ្វើការជជែកដេញដោលគ្នាមួយជាមួយលោក Bernie Sanders ដែលជាអ្នកប្រកួតប្រជែងជាមួយលោកស្រី Clinton តែបន្ទាប់មកលោកមិនព្រមទៅវិញ។
លោក Bernie បានមានប្រសាសន៍ថា៖ «អ្វីដែលខ្ញុំសង្ឃឹមថានឹងកើតមានគឺថា ជាការពិតជាក់ស្តែង ខ្ញុំនឹងឈរឈ្មោះប្រឆាំងនឹង Trump ក្នុងឋានៈជាបេក្ខជនប្រធានាធិបតីស.រ.អ.ខាងគណបក្សប្រជាធិបតេយ្យ។ហើយប្រសិនបើខ្ញុំឈរឈ្មោះ យើងនឹងយកជ័យជំនះលើគាត់។ យើងនឹងមានជ័យជំនះខ្លាំង»។
ការយកជ័យជំនះលើលោក Trump ជាគំនិតមួយដែលលោក Sanders និងលោកស្រី Clinton បានយល់ស្របគ្នា។ លោកស្រីថ្លែងថា៖ «គ្មានឱកាសណាល្អជាងនេះទេ។ យើងមិនអាចអនុញ្ញាតឱ្យ Donald Trump មកជិតសេតវិមានបានជាដាច់ខាត»។
ក៏ប៉ុន្តែនៅពេលដែលលោកស្រី Clinton និងលោក Sanders នៅតែប្រកួតប្រជែងគ្នា គណបក្សប្រជាធិបតេយ្យមិនទាន់បានរួបរួមគ្នានៅពីក្រោយបេក្ខជនណាម្នាក់នៅឡើយទេ។នៅពេលជាមួយគ្នានេះពួកសមាជិកគណបក្សសាធារណរដ្ឋបានបង្ហាញសញ្ញាថាពួកគេរួបរួមគ្នានៅពេលក្រោយលោក Trump ដែលនាំឱ្យមានការស្ទង់មតិកាលពីពេលថ្មីៗនេះថាលោក Trump មានការគាំទ្រប្រកិតៗគ្នាជាមួយលោកស្រី Clinton ឬលើសលោកស្រីបន្តិច។
លោក Trump និយាយថា៖ «ខ្ញុំនាំមុខនៅក្នុងការស្ទង់មតិ។យើងកំពុងនាំមុខនៅក្នុងការស្ទង់មតិសឹងតែទាំងអស់។ តើលោកអ្នកជឿការណ៍នេះទេ? វាជាការអស្ចារ្យ»។
រដូវបោះឆ្នោតបឋមចប់នៅថ្ងៃអង្គារសប្តាហ៍ក្រោយ នៅពេលដែលរដ្ឋធំបំផុតក្នុងស.រ.អ.គឺរដ្ឋCalifornia និងរដ្ឋមួយចំនួនទៀតបោះឆ្នោតរួចហើយ។
ប្រែសម្រួលដោយ ឈឹម សុមេធ