កាលពីថ្ងៃពុធម្សិលមិញ អតីតប្រធានាធិបតីសហរដ្ឋអាមេរិកលោក Donald Trump បានបដិសេធមិនឆ្លើយតបចំពោះសំណួរនៅក្នុងការស៊ើបអង្កេតរដ្ឋប្បវេណី លើប្រតិបត្តិការអាជីវកម្មរបស់ក្រុមគ្រួសារលោក។
លោក Trump បានប្រកាន់ជំហរបែបតតាំងប្រឆាំងនឹងការស៊ើបអង្កេតដែលកំពុងធ្វើឡើងដោយអគ្គរដ្ឋអាជ្ញារដ្ឋ New York អ្នកស្រី Letitia James លើករណីថា តើលោកមានបានបំប៉ោងតម្លៃអចលនទ្រព្យរបស់លោកដូចជាសណ្ឋាគារ ទីលានវាយកូនគោល និងអចលនទ្រព្យដទៃទៀតដើម្បីទទួលបានកម្ចីដែលមានលក្ខខណ្ឌប្រសើរ ហើយស្របពេលនោះដែរបន្ទាបតម្លៃប៉ាន់ស្មាននៃអចលនទ្រព្យរបស់លោកដើម្បីបានការសម្រាលពន្ធឬក៏យ៉ាងណានោះ។
លោក Trump បានបញ្ជាក់នៅក្នុងសេចក្ដីថ្លែងការណ៍មួយថា៖ «ខ្ញុំបដិសេធមិនឆ្លើយតបទៅនឹងសំណួរនៅក្រោមសិទ្ធិនិងបុព្វសិទ្ធិដែលពលរដ្ឋគ្រប់រូបមាននៅក្រោមរដ្ឋធម្មនុញ្ញរបស់សហរដ្ឋអាមេរិក»។
នៅក្នុងសេចក្ដីថ្លែងការណ៍នោះ លោក Trump បានរិះគន់អ្នកស្រី James ថាជា «រដ្ឋអាជ្ញាដែលធ្វើអ្វីតាមតែអំពើចិត្តរបស់ខ្លួន» ដើម្បីតាមសងសឹកលោក។
បន្ទាប់ពីមេធាវីម្នាក់របស់អ្នកស្រីអគ្គរដ្ឋអាជ្ញា James បានសួរសំណួរអស់រយៈពេលជាច្រើនម៉ោងមក លោក Trump បានបដិសេធមិនឆ្លើយតបចំពោះសំណួរលើសពី ៤០០ និងបានឆ្លើយម្ដងហើយម្ដងទៀតដដែលជាដដែលនូវ «ចម្លើយតែមួយ» ដោយលោកបានប្រើសិទ្ធិមិនធ្វើសក្ខីកម្មប្រឆាំងនឹងខ្លួនលោក។
អ្នកស្រី James បាននិយាយថា ការស៊ើបអង្កេតរបស់អ្នកស្រីបានរកឃើញភ័ស្តុតាងច្រើនគួរសមដែលថា ក្រុមហ៊ុនអចលនទ្រព្យ Trump Organization របស់លោក Trump បានបំប៉ោងតម្លៃអចលនទ្រព្យនានា។
លោក Trump បានបញ្ជាក់ថា លោកគ្មានជម្រើសអ្វីផ្សេងក្រៅពីការបដិសេធមិនឆ្លើយសំណួរអំពីអាជីវកម្មរបស់លោកនោះទេ «ដោយសារតែរដ្ឋបាលបច្ចុប្បន្ន [របស់លោកប្រធានាធិបតី Joe Biden] និងរដ្ឋអាជ្ញាជាច្រើននៅក្នុងសហរដ្ឋអាមេរិកបានបាត់បង់ព្រំដែនសុភាវធម៌បែបសីលធម៌និងក្រមសីលធម៌ទាំងអស់»៕
លោក Trump បដិសេធមិនផ្ដល់សក្ខីកម្មនៅក្នុងការស៊ើបអង្កេតលើប្រតិបត្តិការអាជីវកម្មរបស់លោក
អតីតប្រធានាធិបតីសហរដ្ឋអាមេរិកលោក Donald Trump លើកដៃ ខណៈលោកចាកចេញពីអគារ Trump Tower ដើម្បីធ្វើដំណើរទៅការិយាល័យអគ្គរដ្ឋអាជ្ញារដ្ឋ New York ក្នុងទីក្រុង New York សហរដ្ឋអាមេរិក កាលពីថ្ងៃទី១០ ខែសីហា ឆ្នាំ២០២២។
វ៉ាស៊ីនតោន —