ប្រធានាធិបតីស៊ូដង់ Omar al-Bashir កាលពីថ្ងៃចន្ទ បានធ្វើដំណើរតាមយន្តហោះវិលត្រឡប់ពីប្រទេសអាហ្វ្រិកខាងត្បូងទៅប្រទេសរបស់លោកវិញ ដោយបំពានលើបញ្ជាមួយរបស់តុលាការក្រុង Pretoria ដែលឱ្យលោកឋិតនៅក្នុងប្រទេសនេះរហូតដល់តុលាការនេះសម្រេចថា តើលោកគួរត្រូវចាប់ខ្លួនឬទេ ពីបទចោទប្រកាន់ថាបានប្រព្រឹត្តឧក្រិដ្ឋកម្មសង្គ្រាមនិងការសម្លាប់ប្រល័យពូជសាសន៍។
លោក Bashir ដែលស្លៀកពាក់អាវផាយព៌ណសតាមប្រពៃណីរបស់លោកបានគ្រវីឈើច្រត់របស់លោកទៅលើនៅពេលលោកបានទៅដល់ក្រុងខាទុម (Khartoum) ហើយបានស្រែកថា«ព្រះអាទិទេពមានមហិទ្ធិឬទ្ធិ!»
លោក Bashir បានឋិតនៅក្នុងក្រុងចូហានណេសប៊ឺក (Johannesburg) ដើម្បីចូលរូមក្នុងសន្និសីទកំពូលរបស់សហភាពអាហ្វ្រិក ក៏ប៉ុន្តែតុលាការឧក្រិដ្ឋកម្មអន្តរជាតិដែលហៅកាត់ថា ICC បានស្វះស្វែងឱ្យមានការចាប់ខ្លួនលោកនៅពេលលោកឋិតនៅក្នុងក្រុងនោះ។ តុលាការនោះបានចោទប្រកាន់លោកពីបទប្រព្រឹត្តការសម្លាប់ប្រល័យពូជសាសន៍ ឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងនឹងមនុស្សជាតិ ដោយសារលោកបានបញ្ជូនកងទ័ពនិងបានគាំទ្រពួកជីវពលអារ៉ាប់ដើម្បីបង្ក្រាបការបះបោរប្រដាប់អាវុធមួយនៅក្នុងជម្លោះក្នុងតំបន់ដាហ្វ័រ (Darfur) កាលពីឆ្នាំ២០០៣ ក៏ប៉ុន្តែលោក Bashir បានជំទាស់យូរមកហើយប្រឆាំងនឹងយុត្តាធិការតុលាការនោះ។
រដ្ឋអាជ្ញា ICC ម្នាក់បាននិយាយថា លោក«មានការស្រងាកចិត្ត»ដោយសារការគ្មានជោគជ័យរបស់អាហ្វ្រិកខាងត្បូងក្នុងការចាប់ខ្លួនលោក Bashir។
នៅមុនពេលលោក Bashir ចាកចេញពីប្រទេសអាហ្វ្រិកខាងត្បូង សហរដ្ឋអាមេរិកនិងអង្គការសហប្រជាជាតិបានអំពាវនាវឱ្យមានការចាប់ខ្លួនលោក។
លោកអគ្គលេខាធិការអ.ស.ប.បានគីមូន បានមានប្រសាសន៍ថា៖ «គេត្រូវតែគោរពអំណាចរបស់តុលាការ ICC ហើយត្រូវតែអនុវត្តសេចក្តីសម្រេចចិត្តរបស់តុលាការនេះ»៕