កាលពីថ្ងៃសៅរ៍ ក្រុមចម្រុះមួយដឹកនាំដោយប្រទេសអារ៉ាប៊ីសាអូឌីត បានបើកការវាយប្រហារតាមអាកាសថ្មីៗប្រឆាំងនឹងពួកបះបោរ Shi'ite Houthis នៅក្នុងក្រុងកំពង់ផែ Aden នាប៉ែកខាងត្បូងនៃប្រទេសយេម៉ែនបណ្តាលឱ្យមនុស្សយ៉ាងតិចណាស់២២នាក់ស្លាប់។
ក្រុមចម្រុះរបស់រដ្ឋាភិបាលក្រុងរីយ៉ាដ (Riyadh) បានទម្លាក់គ្រាប់បែកពីអាកាសក្នុងថ្ងៃទី១៧បន្តបន្ទាប់គ្នានៅពេលដែលការប្រយុទ្ធគ្នាកំពុងគំរាមកំហែងធ្វើប្រទេសយេម៉ែនឱ្យក្លាយទៅជារដ្ឋបរាជ័យមួយ។ ក្រុមប្រដាប់អាវុធក្នុងមូលដ្ឋានបានទប់ទល់នឹងការរុលទៅមុខទៅទិសខាងត្បូងរបស់ពួកឧទ្ទាម Houthis គាំទ្រដោយប្រទេសអ៊ីរ៉ង់ ក៏ប៉ុន្តែពួកបះបោរបានវាយយកបាននិងបានត្រួតត្រាអាគារសំខាន់ៗរបស់រដ្ឋាភិបាល។
នៅពេលជាមួយគ្នានេះ ពួកកុលសម្ព័ន្ធនិងកងនាវាចម្បាំងដែលគេជឿថាមកពីក្រុមចម្រុះប្រុងប្រៀបវាយយកក្រុង Ataq នាប៉ែកខាងកើតប្រទេសដែលនៅទីនោះពួក Houthis និងពួកទាហានស្មោះត្រង់ជាមួយអតីតប្រធានាធិបតី Ali Abdullah Saleh បានប្រមូលផ្តុំគ្នា។
កាលពីថ្ងៃសៅរ៍ អង្គការកាកបាទក្រហមបានប្រគល់ជំនួយខាងវេជ្ជសាស្ត្រជិត៣៦តោន គ្រឿងឧបករណ៍ធ្វើទឹកឱ្យស្អាតនិងម៉ាស៊ីនភ្លើងឱ្យដល់រដ្ឋធានីសាណាអា (Sana'a) នៃប្រទេសយេម៉ែន ដែលជាថ្ងៃទីពីរនៃការប្រគល់ជំនួយបែបនេះដោយជោគជ័យ៕