លោករដ្ឋមន្ត្រីការបរទេសរុស្ស៊ី Sergei Lavrov បាននិយាយនៅថ្ងៃពុធនេះថាកិច្ចចរចាសន្តិភាពដឹកនាំដោយរុស្សីនៅខែក្រោយនៅក្នុងក្រុង Sochi មាន«ការគាំទ្រទូលំទូលាយ»ក្នុងចំណោមប្រជារាស្ត្រស៊ីរីហើយមានន័យ ជាមូលដ្ឋានសម្រាប់ដំណើរការសន្តិភាពមួយចាត់ចែងដោយអ.ស.ប.។
អត្ថាធិប្បាយរបស់លោក Lavrov មានឡើងក្រោយពីពួកឧទ្ទាមស៊ីរី៤០ក្រុមបាននិយាយថា ប្រទេសរុស្សីខិតខំព្យាយាមចៀសពីដំណើរការសន្តិភាពរបស់អ.ស.ប.ហើយថា ពួកគេនឹងមិនចូលរួមក្នុងកិច្ចចរចាសន្តិភាពក្នុងក្រុង Sochi នោះទេ។
ពួកឧទ្ទាមស៊ីរីបាននិយាយថា រុស្ស៊ីចង់ឱ្យពួកគេបោះបង់ចោលការទាមទាររបស់ពួកគេឱ្យប្រធានាធិបតីស៊ីរី Bashar al-Assad ចុះចេញពីតំណែង។
សេចក្តីថ្លែងការណ៍មួយរបស់ពួកឧទ្ទាមបាននិយាយកាលពីថ្ងៃអង្គារថា៖ «យើងច្រានចោលសំណើនេះហើយយើងបញ្ជាក់ថារុស្ស៊ីជាអ្នកឈ្លានពានដែលបានប្រព្រឹត្តឧក្រិដ្ឋកម្មសង្គ្រាមប្រឆាំងនឹងជនជាតិស៊ីរី។ ប្រទេសរុស្ស៊ីមិនបានចាត់វិធានការណាមួយដើម្បីសម្រាលទុក្ខវេទនារបស់ប្រជារាស្ត្រស៊ីរីទេ ហើយរុស្ស៊ីមិនបានដាក់គំនាបសង្កត់លើរបបគ្រប់គ្រងដែលខ្លួនអះអាងថាខ្លួនធានារ៉ាប់រងឱ្យចាត់វិធានការសូម្បីតែបន្តិច ឆ្ពោះទៅកាន់មាគារពិតប្រាកដដើម្បីឱ្យមានដំណោះស្រាយមួយ»។
ពួកឧទ្ទាមនិយាយថា អ្នកសម្របសម្រួលក្នុងកិច្ចចរចាសន្តិភាពត្រូវតែជាអ្នកសម្របសម្រួលអព្យាក្រឹតនិងស្មោះត្រង់។ ពួកគេនិយាយថាប្រទេសរុស្ស៊ីដែលជាសម្ព័ន្ធមិត្តខ្លាំងបំផុតរបស់របបគ្រប់គ្រងស៊ីរីមិនមែនជាអ្នកសម្របសម្រួលអព្យាក្រឹតនិងស្មោះត្រង់ទេ។
រដ្ឋាភិបាលស៊ីរីបាននិយាយថា ខ្លួននឹងចូលរួមក្នុងកិច្ចចរចាសន្តិភាពក្នុងក្រុង Sochi។ ប្រទេសតួកគី ដែលបានគាំទ្រក្រុមប្រឆាំងក៏គ្រោងនឹងចូលរួមក្នុងកិច្ចចរចានេះដែរ ក៏ប៉ុន្តែបាននិយាយថា ក្រុម Kurdes មិនគួរត្រូវបានគេអញ្ជើញឱ្យចូលរួមក្នុងកិច្ចចរចានេះទេ។
គណបក្សសហភាពប្រជាធិបតេយ្យភាសាអង់គ្លេសហៅថា Democratic Union Party របស់ក្រុមជនអំបូរ Kurde ក្នុងប្រទេសស៊ីរីនិយាយថា ពួកគេមានសិទ្ធិចូលរួមក្នុងកិច្ចចរចាសន្តិភាពដែរ៕