អ្នកស៊ើបអង្កេតរុស្ស៊ីបាននិយាយកាលពីថ្ងៃអាទិត្យថា ការធ្វើតេស្តហ្សេននិងកោសលវិច័យបានបង្ហាញថា លោក Yevgeny Prigozhin ដែលជាមេដឹកនាំក្រុមទាហានស៊ីឈ្នួល Wagner របស់រុស្ស៊ីនៅក្នុងប្រទេសអ៊ុយក្រែន គឺស្ថិតក្នុងចំណោមមនុស្ស ១០ នាក់ដែលបានស្លាប់នៅក្នុងការធ្លាក់យន្តហោះកាលពីសប្ដាហ៍មុននៅក្នុងប្រទេសរុស្ស៊ី។
ទីភ្នាក់ងារអាកាសចរណ៍រុស្ស៊ីបានបញ្ជាក់ថា ការធ្វើតេស្តពិតជាបានបញ្ជាក់ថា បញ្ជីឈ្មោះដែលផ្សព្វផ្សាយពីមុនអំពីអ្នកដែលជិះនៅលើយន្តហោះនោះគឺពិតជាត្រឹមត្រូវ និងថា លោក Prigozhin និងអនុសេនីយ៍ទោជាន់ខ្ពស់ពីរនាក់របស់លោក គឺលោក Dmitry Utkin និងលោក Valery Chekalov ដែលជាអ្នករៀបចំផែនការភស្តុភាររបស់ក្រុមទាហាន Wagner គឺស្ថិតក្នុងចំណោមជនរងគ្រោះទាំង ១០ នាក់នោះ។
កន្លងមកគេឃើញមានចម្ងល់ខ្លះ ជាពិសេសពាក់ព័ន្ធនឹងបណ្ដាញ Telegram ដែលមានទំនោរទៅរកក្រុមទាហាន Wagner អំពីថា តើលោក Prigozhin ដែលគេដឹងថា មានការប្រយ័ត្នប្រយែងក្រែងមានការប៉ុនប៉ងសម្លាប់ណាមួយលើរូបលោក ពិតជាបានជិះនៅលើយន្តហោះដែលធ្លាក់នោះ ឬក៏អត់។
មនុស្សលើកសាកសពចេញពីបំណែកយន្តហោះឯកជនដែលធ្លាក់នៅក្បែរភូមិ Kuzhenkino ក្នុងតំបន់ Tver ប្រទេសរុស្ស៊ី កាលពីថ្ងៃទី២៤ ខែសីហា ឆ្នាំ២០២៣។
យន្តហោះឯកជនដែលជនរងគ្រោះទាំងនោះជិះពីទីក្រុងមូស្គូទៅកាន់ទីក្រុង St. Petersburg នេះបានធ្លាក់លើទីវាលមួយកន្លែងកាលពីថ្ងៃពុធសប្ដាហ៍មុននៅក្នុងតំបន់ Tyer នៅភាគពាយ័ព្យទីក្រុងមូស្គូ ដោយរូបភាពវីដេអូបានបង្ហាញថា មានភ្លើងឆេះខ្លាំងក្លានៅបំណែកបាក់បែករបស់យន្តហោះ។
អាជ្ញាធរមិនទាន់បានបញ្ជាក់នៅឡើយទេថា តើការធ្លាក់នេះបណ្ដាលមកពីមូលហេតុអ្វី។ រដ្ឋាភិបាលរុស្ស៊ីបានលើកឡើងថា វាគឺជា «ការកុហកទាំងស្រុង» ដែលថា ប្រធានាធិបតីរុស្ស៊ីលោក Vladimir Putin បានបញ្ជាឱ្យមានការសម្លាប់លោក Prigozhin ដើម្បីជាការដាក់ទោសចំពោះករណីដែលលោក Prigozhn ដឹកនាំការបះបោរពីថ្ងៃទី ២៣ ដល់ថ្ងៃទី ២៤ ខែមិថុនាកន្លងទៅនេះ និងដឹកនាំប្រតិបត្តិការធ្វើដំណើររយៈពេលខ្លីរបស់ក្រុមទាហាន Wagner ចេញពីអ៊ុយក្រែនឆ្ពោះទៅកាន់ទីក្រុងមូស្គូ មុនពេលលោក Prigozhin បញ្ជាឱ្យបញ្ឈប់ប្រតិបត្តិការនោះ។
អ្នកនយោបាយនិងអ្នកវិភាគបស្ចិមប្រទេសនានាបានបញ្ជាក់ដោយមិនបានបង្ហាញភ័ស្តុតាងថា លោក Putin ដែលបានហៅការបះបោររយៈពេលខ្លីរបស់លោក Prigozhin នោះថា ជា«ការលួចចាក់ពីក្រោយខ្នង» បានរៀបចំផែនការសម្ងាត់ដើម្បីសម្លាប់លោក Prigozhin។
មុនពេលធ្វើការបះបោរនេះ លោក Prigozhin បានរិះគន់កាន់តែខ្លាំងឡើងដោយបើកចំហលើអ្វីដែលលោកអះអាងថា ជាការខ្វះខាតការគាំទ្រពីថ្នាក់ដឹកនាំយោធារុស្ស៊ីសម្រាប់យុទ្ធជនក្រុមទាហាន Wagner និងការខ្វះខាតការផ្គត់ផ្គង់សព្វាវុធ។ ក្រុមទាហាន Wagner បានទទួលថវិកាឧបត្ថម្ភពីរដ្ឋាភិបាលរុស្ស៊ី៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AP។