ប្រធានាធិបតីបេឡារុសលោក Alexander Lukashenko បាននិយាយនៅថ្ងៃព្រហស្បតិ៍នេះថា មេដឹកនាំក្រុមទាហានស៊ីឈ្នួលរុស្ស៊ីលោក Yevgeny Prigozhin មិនស្ថិតនៅក្នុងប្រទេសបេឡារុសទៀតទេ ហើយថាលោកបានត្រឡប់ទៅប្រទេសរុស្ស៊ីវិញហើយ។
លោក Prigozhin បានទៅប្រទេសបេឡារុសដោយសារតែវាជាផ្នែកមួយនៃកិច្ចព្រមព្រៀងមួយដើម្បីបញ្ចប់ការបះបោរប្រដាប់អាវុធដែលធ្វើឡើងដោយក្រុមទាហានស៊ីឈ្នួលរបស់លោកកាលពីខែមុន។
លោកប្រធានាធិបតី Lukashenko បានជួយធ្វើឱ្យសម្រេចបានកិច្ចព្រមព្រៀងនេះ ដែលក្នុងនោះរួមមានទាំងការធានាសន្ដិសុខសម្រាប់លោក Prigozhin និងក្រុមទាហានរបស់លោកផងដែរ។
លោក Lukashenko បានថ្លែងប្រាប់ក្រុមអ្នកសារព័ត៌មាននៅថ្ងៃព្រហស្បតិ៍នេះថា ការណ៍ដែលលោកអនុញ្ញាតឱ្យយុទ្ធជន Wagner មួយចំនួនឈរជើងនៅក្នុងប្រទេសបេឡារុសគឺនៅដដែល។
លោក Lukashenko បានថ្លែងយ៉ាងដូច្នេះថា៖ «ឥឡូវនេះ គេនៅមិនទាន់សម្រេចអំពីការបញ្ជូនពួកគេនិងការរៀបចំថ្មីនៅឡើយទេ»។
លោកបានថ្លែងទៀតថា៖ «ខ្ញុំពិតជាមិនមានការព្រួយបារម្ភទេអំពីការណ៍ដែលយើងនឹងទទួលយកយុទ្ធជនមួយចំនួន»។
លោក Prigozhin និងយុទ្ធជនរបស់លោកបានធ្វើការបះបោរប្រដាប់អាវុធកាលពីថ្ងៃទី ២៣ ខែមិថុនា ដើម្បីប្រឆាំងនឹងមេដឹកនាំយោធារបស់រុស្ស៊ី។
ពួកគេដណ្ដើមយកបានទីបញ្ជាការយោធានៅក្រុង Roston-on-Don ដែលស្ថិតនៅប៉ែកខាងត្បូងប្រទេសរុស្ស៊ី មុនពេលដែលពួកគេបានធ្វើដំណើរឆ្ពោះទៅកាន់ទីក្រុងមូស្គូ។
ព័ត៌មានមួយចំនួននៅក្នុងសេចក្ដីរាយការណ៍នេះត្រូវបានដកស្រង់ពីទីភ្នាក់ងារសារព័ត៌មាន The Associated Press ទីភ្នាក់ងារសារព័ត៌មាន Agence France-Presse និងទីភ្នាក់ងារសារព័ត៌មាន Reuters។
