លោក Robert Trump ដែលជាប្អូនប្រុសបង្កើតរបស់ប្រធានាធិបតីសហរដ្ឋអាមេរិកលោក Donald Trump បានស្លាប់កាលពីយប់ថ្ងៃសៅរ៍ម្សិលមិញ ក្នុងអាយុ ៧១ ឆ្នាំ ក្រោយពីចូលសម្រាកព្យាបាលនៅមន្ទីរពេទ្យក្នុងទីក្រុង New York។ នេះបើយោងតាមសេចក្ដីប្រកាសរបស់លោកប្រធានាធិបតី Trump។
ទីភ្នាក់ងារព័ត៌មាន AP បានរាយការណ៍ថា លោកប្រធានាធិបតី Trump បានទៅសួរសុខទុក្ខប្អូនប្រុសរបស់លោកនៅមន្ទីរពេទ្យមួយកន្លែងនៅក្នុងទីក្រុង New York កាលពីថ្ងៃសុក្រ បន្ទាប់ពីមន្ត្រីសេតវិមានថា ប្អូនប្រុសរបស់លោកឈឺធ្ងន់។
លោក Robert Trump ត្រូវបានគេរាយការណ៍ថា ត្រូវបានបញ្ជូនទៅទទួលការព្យាបាលនៅក្នុងបន្ទប់សង្គ្រោះបន្ទាន់ក្នុងមន្ទីរពេទ្យអស់រយៈពេលជាច្រើនថ្ងៃនៅក្នុងខែសីហានេះ។
លោកប្រធានាធិបតី Donald Trump បញ្ជាក់នៅក្នុងសេចក្ដីប្រកាសមួយដូច្នេះថា៖ «ខ្ញុំសូមប្រកាសដោយក្រៀមក្រំយ៉ាងខ្លាំងថា ប្អូនប្រុសដ៏អស្ចារ្យរបស់ខ្ញុំឈ្មោះ Robert បានស្លាប់កាលពីយប់មិញ។ គាត់មិនត្រឹមតែជាប្អូនប្រុសរបស់ខ្ញុំប៉ុណ្ណោះទេ ប៉ុន្តែថែមទាំងជាមិត្តភក្តិដ៏ល្អបំផុតរបស់ខ្ញុំផងដែរ។ ខ្ញុំនឹងនឹកគាត់យ៉ាងខ្លាំង ប៉ុន្តែយើងនឹងជួបគ្នាម្ដងទៀត។ បេះដូងរបស់ខ្ញុំនឹងចងចាំគាត់ជារៀងរហូត។ Robert បងស្រលាញ់ប្អូន។ សូមប្អូនទៅកាន់សុគតិភព»។
លោក Robert Trump បានចាប់ផ្ដើមអាជីពរបស់លោកផ្នែកហិរញ្ញវត្ថុ ប៉ុន្តែក្រោយមកបានប្រឡូកនៅក្នុងអាជីវកម្មរបស់គ្រួសារ ដោយគ្រប់គ្រងភាគហ៊ុនអចលនទ្រព្យក្នុងនាមជានាយកប្រតិបត្តិកំពូលមួយរូបនៃអាជីវកម្មត្រកូល Trump។
លោក Robert Trump កើតក្នុងឆ្នាំ ១៩៤៨។ លោកគឺជាកូនពៅក្នុងចំណោមកូន ៥ នាក់របស់លោក Fred Trump ដែលជាអ្នកវិនិយោគខាងអចលនទ្រព្យក្នុងទីក្រុងញូវយ៉ក៕