ក្រោយពីមានវត្តមានជិតបីទសវត្សរ៍នៅទីក្រុងហុងកុង វិទ្យុអាស៊ីសេរី RFA បានបិទ ការិយាល័យនៅទីក្រុងហុងកុង ហើយលែងមានបុគ្គលិកធ្វើការពេញម៉ោងនៅទីនោះទៀតហើយ ដោយសារសេរីភាពសារព័ត៌មានបានចុះថយនៅទីនោះ។ នេះបើតាមសេចក្តីថ្លែងការណ៍របស់បណ្តាញសារព័ត៌មាននេះកាលពីថ្ងៃសុក្រ ទី ២៩ ខែមីនាកន្លងទៅ។
ប្រធានវិទ្យុអាស៊ីសេរីលោកស្រី Bay Fang បាននិយាយនៅក្នុងសេចក្តីថ្លែងការណ៍នេះថា៖ «ការព្រួយបារម្ភអំពីសុវត្ថិភាពរបស់ក្រុមបុគ្គលិកនិងអ្នកកាសែតរបស់ RFA នៅហុងកុង បាននាំឱ្យយើងរៀបចំកិច្ចប្រតិបត្តិការរបស់យើងជាថ្មីនៅទីនោះ។ ទោះជា RFA នឹងនៅតែរក្សាការចុះឈ្មោះជាបណ្តាញព័ត៌មានផ្លូវការដដែល នៅពេលនេះយើងលែងមានបុគ្គលិកធ្វើការពេញម៉ោងនៅទីក្រុងហុងកុងទៀតហើយ ហើយយើងបានបិទការិយាល័យរបស់យើងនៅទីនោះហើយ»។
សេចក្តីប្រកាសនេះកើតឡើងមិនដល់មួយអាទិត្យ ក្រោយអាជ្ញាធរហុងកុងបានចាប់ផ្តើមប្រើមាត្រា ២៣ ដែលជាច្បាប់សន្តិសុខជាតិថ្មីដែលក្រុមអ្នកតាមឃ្លាំមើលបណ្តាញព័ត៌មានព្រមានថានឹងកាត់បន្ថយសេរីភាពសារព័ត៌មានថែមទៀតក្នុងទីក្រុងនេះ។
ច្បាប់ថ្មីនេះជាការពង្រីកច្បាប់សន្តិសុខជាតិដ៏ចម្រូងចម្រាស់ ដែលរដ្ឋាភិបាលក្រុងប៉េកាំងបានដាក់ឱ្យប្រើកាលពីឆ្នាំ ២០២០ ដែលចាត់ទុកការទាមទារបំបែករដ្ឋវិទ្ធង្សនា ភេរវកម្ម និងការឃុបឃិតជាមួយកងកម្លាំងបរទេសថាជាបទព្រហ្មទណ្ឌ។ មាត្រា ២៣ពង្រីកបន្ថែមលើច្បាប់នោះដើម្បីរួមបញ្ចូលចារកម្ម ការជ្រៀតជ្រែកពីខាងក្រៅនិងការលួចការសម្ងាត់រដ្ឋឱ្យទៅជាបទព្រហ្មទណ្ឌ។
ក្រុមការពារសេរីភាពសារព័ត៌មាននានារួមមានអង្គការអ្នកកាសែតគ្មានព្រំដែន RSF ផងដែរ បានសម្តែងនូវការព្រួយបារម្ភអំពីច្បាប់ថ្មីនេះ។
លោក Cédric Alviani ជានាយកការិយាល័យរបស់ RSF ប្រចាំតំបន់អាស៊ី-ប៉ាស៊ីហ្វិក។ លោកបាននិយាយនៅក្នុងសេចក្តីថ្លែងការណ៍មួយ មុនការចាប់ផ្តើមប្រើច្បាប់នេះថា៖ «ដោយបញ្ចូលមាត្រាស្តីពីសន្តិសុខជាតិរបស់រដ្ឋាភិបាលក្រុងប៉េកាំងទៅក្នុងច្បាប់ក្រុងហុងកុង រដ្ឋាភិបាលសង្ឃឹមថានឹងធ្វើឱ្យមានឡើងវិញនូវការគិតស្មានថាដែនដីនេះ គ្រប់គ្រងដោយនីតិរដ្ឋ នៅពេលដែលខ្លួនបន្តយុទ្ធនាការខ្លួនប្រឆាំងនឹងសំឡេងឯករាជ្យ»។
លោក Alviani បានបន្តថា៖ «យើងអំពាវនាវឱ្យក្រុមប្រទេសប្រជាធិបតេយ្យបង្កើនការដាក់សម្ពាធលើអាជ្ញាធរចិន ដើម្បីធ្វើឱ្យមានសេរីភាពសារព័ត៌មានពេញលេញឡើងវិញនៅក្នុងដែនដីនោះ»។
រូបភាពដកស្រង់ពីគេហទំព័ររបស់បណ្តាញផ្សព្វផ្សាយព័ត៌មានអាស៊ីសេរីកាលពីថ្ងៃទី២៩ ខែមីនា ឆ្នាំ២០២៤។
វិទ្យុអាស៊ីសេរីដែលបានបើកការិយាល័យរបស់ខ្លួន នៅទីក្រុងហុងកុងកាលពីឆ្នាំ១៩៩៦ បាននិយាយយោងជាពិសេសដល់មាត្រា ២៣ ថាជាហេតុផលមួយនាំឱ្យខ្លួនចាកចេញពីក្រុងនេះ។
លោកស្រី Fang បានថ្លែងនៅក្នុងសេចក្តីថ្លែងការណ៍នេះថា៖ «សកម្មភាពរបស់អាជ្ញាធរហុងកុង ដែលមានរួមការនិយាយថា RFA ជា «កងកម្លាំងបរទេស» នាំឱ្យមានសំណួរអំពីសមត្ថភាពរបស់យើងក្នុងការធ្វើប្រតិបត្តិការដោយសុវត្ថិភាពជាមួយការប្រើមាត្រា ២៣»។
វីអូអេបានទាក់ទងនឹងការិយាល័យសន្តិសុខហុងកុងដើម្បីសុំអត្ថាធិប្បាយ។
ជាច្រើនឆ្នាំមកហើយ ហុងកុងបានទទួលការកោតសរសើរអំពីបរិយាកាសសេរី និង រស់រវើករបស់បណ្តាញព័ត៌មាន ប៉ុន្តែសេរីភាពកាសែតនិងសេរីភាពស៊ីវីលឯទៀតៗ បានចុះថមថយយ៉ាងលឿនក្រោយការដាក់ឱ្យប្រើច្បាប់សន្តិសុខជាតិកាលពីឆ្នាំ ២០២០។
អាជ្ញាធរហុងកុងនិងចិនបានបដិសេធថាច្បាប់នេះមិនបានធ្វើឱ្យខូចខាតដល់បរិយាកាសរបស់បណ្តាញព័ត៌មានហុងកុងទេ តែនិយាយថា ផ្ទុយទៅវិញច្បាប់នេះជួយធ្វើឱ្យក្រុងនេះមានស្ថិរភាព។
ការគំរាមគំហែងដែលប្រឈមដោយបណ្តាញព័ត៌មានឯករាជ្យនៅទីក្រុងហុងកុង មានជាឧទាហរណ៍ជាក់ស្តែង ក្នុងការកាត់ក្តីលោក Jimmy Lai អ្នកបោះពុម្ពផ្សាយលម្អៀងទៅខាងប្រជាធិបតេយ្យ ពាក់ព័ន្ធនឹងសន្តិសុខជាតិដែលកំពុងធ្វើឡើងនៅពេលនេះ។
លោក Jimmy Lai អាយុ៧៦ឆ្នាំ និងជាពលរដ្ឋអង់គ្លេសត្រូវបានចោទប្រកាន់ថា «ឃុបឃិតជាមួយកងកម្លាំងបរទេស» តាមរយៈច្បាប់សន្តិសុខជាតិនិងការនាំបំបះបំបោរ ដែលលោកបានច្រានចោល។ ប្រសិនបើរកឃើញថាមានទោស លោក Lai ប្រឈមនឹងការជាប់ពន្ធនាគារអស់មួយជីវិត។
ក្រុមមន្ត្រីហុងកុងបានបដិសេធការនិយាយថា ការកាត់ក្តីលោក Lai អយុត្តិធម៌ តែក្រុមសេរីភាពសារព័ត៌មាននិងរដ្ឋាភិបាលក្រុមប្រទេសលោកខាងលិចបានថ្កោលទោសការចោទប្រកាន់ទាំងនេះថាទាក់ទិននឹងនយោបាយហើយគ្មានមូលដ្ឋានទេ។
ទោះជាវិទ្យុអាស៊ីសេរីចាកចេញពីហុងកុងក៏ដោយ ក៏វិទ្យុនេះនិយាយថាខ្លួននៅតែបន្តរាយការណ៍អំពីក្រុងនេះតទៅទៀត។
លោកស្រីបានពោលនៅក្នុងសេចក្តីថ្លែងការណ៍នេះថា៖ «ការរៀបចំចាត់ចែងជាថ្មីនេះមានន័យថា RFA នឹងប្រើវីធីផ្សព្វផ្សាយសារព័ត៌មានផ្សេងៗទៀតសម្រាប់បរិយាកាសបណ្តាញព័ត៌មានដែលត្រូវបិទ»។
លោកស្រីបាននិយាយថា៖ «សម្រាប់អ្នកស្តាប់របស់យើងនៅហុងកុងនិងប្រទេសចិន ដីគោក ដែលពឹងពាក់លើការផ្សព្វផ្សាយទាន់ពេលនិងគ្មានការចាប់ពិរុទ្ធ សូមបញ្ជាក់ថា កម្មវិធីនិងការផ្សាយរបស់យើងនឹងមានតទៅទៀតគ្មានការបង្អាក់ឡើយ»៕