សមាជិកសភាគាំទ្រលទ្ធិប្រជាធិបតេយ្យក្នុងទីក្រុងហុងកុង បានលើកឆ័ត្រពណ៌លឿង ជានិមិត្តរូបនៃចលនាកាន់កាប់ (Occupy) ដែនដីនោះ ហើយបានដើរចេញពីសម័យប្រជុំរបស់សភាកាលពីថ្ងៃពុធនៅពេលដែលលោកស្រី Carrie Lam ប្រធានរដ្ឋបាលទីក្រុងហុងកុងបាននិយាយថា រដ្ឋាភិបាលបានប្រកាន់ខ្ជាប់ទៅនឹងសំណើដើម្បីពិនិត្យមើលបេ្ខជនជាមុនសម្រាប់ការបោះឆ្នោតក្រុងហុងកុងនៅឆ្នាំ២០១៧។
ការដើចេញកាលពីថ្ងៃពុធ បានផ្តល់សញ្ញាគាំទ្រការតវ៉ាប្រឆាំងដែលបានធ្វើឲ្យជាប់គាំងទីក្រុងចាប់តាំងពីចុងឆ្នាំមុនមក ក្រោយពីផែនការនោះត្រូវបានស្នើឡើង។ ផែនការនោះ គឺតម្រូវឲ្យអ្នកក្លាយជាបេក្ខជនមានការពិនិត្យជាមុនដោយគណៈកម្មាធិការមួយដែលពួកប្រឆាំងនិយាយថា មានការលម្អៀងទៅរដ្ឋាភិបាលទីក្រុងប៉េកាំង។
លោក Alan Leong សមាជិកសភាគាំទ្រលទ្ធិប្រជាធិបតេយ្យរបស់គណបក្ស Civic បាននិយាយទៅកាន់ពួកអ្នកយកព័ត៌មានបន្ទាប់ពីការតវ៉ាប្រឆាំងនោះ។លោកនិយាយថា៖ «យើងចង់ឃើញរដ្ឋាភិបាលទីក្រុងហុងកុងបង្ហាញផែនការតឹងរ៉ឹងមួយដល់សេចក្តីព្រាងច្បាប់ហើយនឹងអនុញ្ញាតឲ្យយើងបោះឆ្នោតវ៉េតូ។ ការធ្វើដូច្នេះ រដ្ឋាភិបាលកណ្តាលក្នុងទីក្រុងប៉េកាំងអាចមានពេលវេលាច្រើនថែមទៀត ប្រសិនបើខ្លូននឹងចាប់ផ្តើមឡើងវិញនូវកំណែទម្រង់ខាងនយោបាយដែលមាន៥ជំហាននោះ»។
លោកស្រីប្រធានរដ្ឋបាល Lam បាននិយាយថា ការតាក់តែងរដ្ឋធម្មនុញ្ញ ត្រូវតែធ្វើឡើងផ្អែកលើផែនការដែលគាំទ្រដោយរដ្ឋាភិបាលទីក្រុងប៉េកាំង។ ក៏ប៉ុន្តែ លោកស្រីរក្សាសេចក្តីសង្ឃឹមថា នឹងបញ្ចុះបញ្ចូលពួកប្រឆាំងឲ្យគាំទ្រកំណែទម្រង់នេះ។
លោកស្រីនិយាយថា៖ «ថ្វីបើគម្រោងច្បាប់ត្រូវបានដាក់ចេញដោយគណៈកម្មាធិការអចិន្រ្តៃយ៍សមាជរបស់ប្រជាជននោះក៏ដោយ យើងជឿជាក់យ៉ាងពិតប្រាកដថា យើងនៅតែមានឱកាសធ្វើការរៀបចំការបោះឆ្នោតដែលមានភាពសេរី បើកចំហរ តម្លាភាពនិងមានការប្រកួតប្រជែងខ្លាំង»។
ពលរដ្ឋទីក្រុងហុងកុងម្នាក់អាយុ៧០ឆ្នាំ ដែលបានផ្តល់តែនាមត្រកូលថាលោកឈ្មោះ Wong គឺជាមនុស្សម្នាក់ក្នុងចំណោមមនុស្សប្រហែល១០០នាក់ដែលកំពុងកាន់កាប់ចិញ្ចើមផ្លូវសម្រាប់មនុស្សដើរនៅជិតទីស្នាក់ការរដ្ឋាភិបាលរបស់ទីក្រុងហុងកុង។ លោកប្រាប់ VOA ថា លោកបានស្ថិតនៅទីនេះដើម្បីជំរុញឲ្យសមាជិកសភាបដិសេធផែនការបោះឆ្នោតរបស់រដ្ឋាភិបាលទីក្រុងប៉េកាំង។
លោកនិយាយថា៖ «ខ្ញុំបានប្រាប់ពលរដ្ឋថា ផែនការកំណែទម្រង់នយោបាយនេះ មិនអាចទទួលយកបានទេ ហើយខ្ញុំប្រាប់ទៅសមាជិកសភាជាទីគោរពរបស់យើងចំនួន៧០នាក់ថា ពួកគេគួរប្រើមនសិការរបស់ខ្លួនហើយបោះឆ្នោតវ៉េតូប្រឆាំងផែនការកំណែទម្រង់នេះ»៕