លោកនាយករដ្ឋមន្រ្តី ហ៊ុន សែន បានថ្លែងនៅព្រឹកថ្ងៃចន្ទនេះថា អតីតមន្ត្រីពីគណបក្សសង្រ្គោះជាតិ ដែលត្រូវបានរំលាយ នឹងមិនមានឱកាសទទួលបានតំណែង និងសំណងមកវិញនោះទេ។
លោកនាយករដ្ឋមន្ត្រី ហ៊ុន សែន មានប្រសាសន៍ដូច្នេះបន្ទាប់ពីលោកបានចេញបញ្ជាឲ្យក្រុមមន្ត្រីយុត្តិធម៌ ដោះលែងសកម្មជនគណបក្សសង្គ្រោះជាតិជាង ៧០ នាក់ដែលលោកអះអាងថា បានចាញ់បោកលោក សម រង្ស៊ី អតីតមេដឹកនាំគណបក្សជំទាស់ ដែលបានអំពាវនាវឲ្យសាធារណជន នគរបាល និងកងទ័ពងើបបះបោរនិងផ្តួលរំលំរដ្ឋាភិបាលរបស់នៅថ្ងៃទី៩ ខែវិច្ឆិកា ឆ្នាំ២០១៩។
«យើងស្តាប់ការនិយាយអ្នកខ្លះនៅតែបន្តចិញ្ចឹមចិត្តថា អញនឹងបានធ្វើមេឃុំ អញនឹងបានធ្វើចៅសង្កាត់ អញនឹងបានធ្វើជំទប់ អញនឹងបានធ្វើនេះ រួចហើយគេសងប្រាក់ខែ ត្រឡប់មកវិញ ជិតបាន ហើយៗ នែអាជិតបានហ្នឹង អត់ទេ»។
លោកបានបន្ថែមថា៖
«សុំខិតខំធ្វើស្រែចំការទៅ កុំបង្ខំ មកគេហៅថា រត់បុកជញ្ជាំងនោះ។ កុំដាក់គោលដៅធំពេកៗ»។
តុលាការនៅប្រទេសកម្ពុជាបានចាប់ផ្ដើមដោះលែងសកម្មជន និងអតីតមន្ត្រីគណបក្សប្រឆាំងជាបន្តបន្ទាប់តាំងពីយប់ថ្ងៃព្រហស្បតិ៍ ក្រោយការប្រកាសរបស់លោកនាយករដ្ឋមន្រ្តីហ៊ុន សែន។ បញ្ជារបស់លោក ហ៊ុនសែនឲ្យដោះលែងសកម្មជន និងអតីតមន្ត្រីគណបក្សប្រឆាំងកើតឡើង បន្ទាប់ពីសហគមអឺរ៉ុបចេញរបាយការណ៍ របស់សហគមន៍អឺរ៉ុបស្តីពីស្ថានភាពកម្ពុជា ក្រោមប្រព័ន្ធឋានៈអនុគ្រោះ EBA។
ថ្លែងនៅក្នុងពិធីចែកសញ្ញាប័ត្រមួយនៅក្រុងភ្នំពេញ លោកនាយករដ្ឋមន្រ្តីហ៊ុន សែនបានថ្លែងដោយមិនបញ្ចេញឈ្មោះឲ្យចំថា ដំណើរការក្តីរបស់លោក កឹម សុខានឹងមានវែងឆ្ងាយបន្តទៀត។
«រួចហើយការបន្ថយលក្ខខណ្ឌទៅលើមនុស្សម្នាក់ នឹងបិទផ្លូវគេហៅថា ការស៊ើបសួរក៏ជានីតិវិធីរបស់តុលាការ ក៏ថា អឺមានសេរីភាពអញ្ចេះ មានសេរីភាពអញ្ចុះ ធ្វើអញ្ចេះ ធ្វើអញ្ចុះ អឺប៉ាន់ស្មានខ្លួនឯងទៅ»។
លោកបានបន្ថែមថា៖
«ក៏ប៉ុន្តែត្រូវចាំណា ដំណើរការក្តីមួយនេះគឺមិនមែនត្រូវធ្វើមួយថ្ងៃ ពីរថ្ងៃ ឬមួយខែ ឬពីរខែទេ។ វាត្រូវប្រើរយៈពេលវែង រួចហើយមានអ្នកខ្លះនិយាយថា តិចទៀតលើកលែងទោសហើយ ព្រះមហាក្សត្រលើកលែងទោស។ បើមិនទាន់កាត់ទោសផង ព្រះមហាក្សត្រមានទោសណាដើម្បីលែង អាហ្នឹងនិយាយឲ្យច្បាស់»។
លោក អំ សំអាត មន្រ្តីជាន់ខ្ពស់អង្គការសិទ្ធិ មនុស្សលីកាដូ បានមានប្រសាសន៍ថា ការលើកឡើងរបស់លោកនាយករដ្ឋមន្រ្តីមិនមែនជាអ្វីមួយដែលគួរឲ្យភ្ញាក់ផ្អើលនោះទេ ពីព្រោះប្រសិនបើឲ្យអតីតសមាជិកក្រុមប្រឹក្សានៃអតីតគណបក្សសង្រ្គោះជាតិចូលកាន់តំណែងវិញ វាហាក់ដូចជា គណបក្សសង្រ្គោះជាតិរស់ឡើងវិញ។
លោក អំ សំអាត បាន បន្ថែមថាលោកគិតថា មូលហេតុនៅពីក្រោយ ការរំលាយគណបក្សសង្រ្គោះជាតិ គឺដោយសារតែគណបក្សកាន់អំណាចមិនចង់ឲ្យគណបក្សសង្រ្គោះជាតិរស់ឡើងវិញហើយ គណបក្ស កាន់ អំណាចអាចដកហូតតំណែងសមាជិកក្រុមប្រឹក្សាឃុំសង្កាត់ របស់គណបក្ស សង្គ្រោះ ជាតិ។
«កាលណា គណបក្សសង្រ្គោះជាតិដំណើរការឡើងវិញ អញ្ចឹងអ្វីៗ ក្រុមប្រឹក្សាឃុំសង្កាត់ទាំងអស់ហ្នឹងអាចទទួលបានវិញ។ ប៉ុន្តែខ្ញុំគិតថា ចំណុចនេះ ប្រហែលជាគណបក្សកាន់អំណាចហ្នឹង គឺមិនអាចនឹងឲ្យគណបក្សសង្រ្គោះជាតិហ្នឹងរស់ឡើងវិញទេ»។
លោក អំ សំអាត ក៏បានបន្ថែមថាការចាប់ខ្លួនសកម្មជនអតីតគណបក្សសង្រ្គោះជាតិ និងលោក កឹម សុខា ជា «ទិដ្ឋភាពនយោបាយ ច្រើនជាងការអនុវត្តច្បាប់»។
គណបក្សសង្គ្រោះជាតិត្រូវបានតុលាការរំលាយចោលកាលពីខែវិច្ឆិកា ឆ្នាំ២០១៧ បន្ទាប់ពីអាជ្ញាធរបានចាប់ខ្លួនលោក កឹម សុខា ប្រធានគណបក្សសង្រ្គោះជាតិនាពេលនោះ ដែលត្រូវបានតុលាការចោទប្រកាន់ពីបទក្បត់ជាតិ។
លោកនាយករដ្ឋមន្រ្តី ហ៊ុន សែន ក៏បាននិយាយផងដែរថា ការបោះឆ្នោតជ្រើសរើសក្រុមប្រឹក្សាឃុំសង្កាត់នៅអាណត្តិបន្ទាប់នឹងត្រូវធ្វើឡើងនៅអំឡុងខែឧសភា ឆ្នាំ ២០២២៕