ប្រទេសកម្ពុជាបានស្នើសុំឱ្យរដ្ឋាភិបាលឥណ្ឌូណេស៊ីចាប់ខ្លួនឬបណ្ដេញលោក សម រង្ស៊ី ចេញពីប្រទេសតាមអំណាចដីកាស្វែងរកចាប់ខ្លួនរបស់តុលាការកម្ពុជា។
សំណើនេះធ្វើឡើងតាមរយៈស្ថានទូតនៃប្រទេសកម្ពុជាប្រចាំទីក្រុងហ្សាការតានិងក្នុងរយៈពេលតែប៉ុន្មានម៉ោងប៉ុណ្ណោះ បន្ទាប់ពីលោក សម រង្ស៊ី ប្រធានស្តីទីគណបក្សសង្គ្រោះជាតិបានទៅដល់ប្រទេសឥណ្ឌូនេស៊ីនៅថ្ងៃព្រហស្បតិ៍នេះ។ នេះបើតាមសេចក្តីប្រកាសព័ត៌មានដែលបានចេញផ្សាយដោយក្រុមអ្នកនាំពាក្យរាជរដ្ឋាភិបាលកម្ពុជា។
ស្ថានទូតកម្ពុជាបានបន្ថែមថា៖
«យើងសូមស្នើឱ្យអាជ្ញាធរឥណ្ឌូណេស៊ីចាត់វិធានការប្រឆាំងនឹងលោក សម រង្ស៊ី ពីព្រោះគាត់បានរំលោភទិដ្ឋាការទេសចរណ៍ឥណ្ឌូណេស៊ី ដោយចូលរួមក្នុងសកម្មភាពនយោបាយនិងធ្វើឱ្យខូចមុខមាត់ប្រទេសជាមិត្តអាស៊ានដូចគ្នា»។
ស្ថានទូតខ្មែរនៅប្រទេសម៉ាឡេស៊ីពន្យល់ថា គណបក្សសង្គ្រោះជាតិត្រូវបានរំលាយរួចហើយនិងក៏មានដីការបស់តុលាការរាជធានីភ្នំពេញតាមស្វែងរកចាប់ខ្លួនថ្នាក់ដឹកនាំគណបក្សសង្គ្រោះជាតិដែលកំពុងរស់នៅនិរទេសខ្លួនចំនួន៧នាក់ ដែលក្នុងនោះមានលោក សម រង្ស៊ី និងលោកស្រី មូរ សុខហួរ អនុប្រធានគណបក្សផងដែរ ដោយសារតែរងការចោទប្រកាន់ថា ខិតខំព្យាយាមផ្ដួលរំលំរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។
លោក សម រង្ស៊ី ដែលមានសញ្ជាតិបារំាងផងដែរ បានធ្វើដំណើរទៅឥណ្ឌូណេស៊ីពីប្រទេសម៉ាឡេស៊ីបន្ទាប់ពីគម្រោងវិលត្រឡប់ចូលប្រទេសកម្ពុជាវិញចំថ្ងៃបុណ្យឯករាជ្យជាតិនៅថ្ងៃទី៩ខែវិច្ឆិកា បានត្រូវអាជ្ញាធរកម្ពុជារារាំងដោយការប្រើប្រាស់កងកម្លាំងប្រដាប់អាវុធបិទច្រកព្រំដែននិងប្រើច្រកការទូតមិនឱ្យរដ្ឋាភិបាលថៃអនុញ្ញាតឱ្យឆ្លងកាត់ទឹកដីរបស់ខ្លួន។
រដ្ឋាភិបាលម៉ាឡេស៊ីនិងឥណ្ឌូណេស៊ីមិនបានចាប់ខ្លួនមន្ត្រីគណបក្សសង្គ្រោះជាតិណាម្នាក់តាមការស្នើសុំរបស់រដ្ឋាភិបាលកម្ពុជាទេ។
លោក តឹកគូ ហ្វៃហ្សាស៊ីយ៉ាស់ (Teuku Faizasyah) អ្នកនាំពាក្យក្រសួងការបរទេសឥណ្ឌូណេស៊ីបានប្រាប់ដល់បណ្ដាញសារព័ត៌មានថាប្រសិនបើជនណាម្នាក់មិនប្រព្រឹត្តខុសទិដ្ឋាការទេសចរណ៍ ដើម្បីធ្វើសកម្មភាពនយោបាយនៅឥណ្ឌូណេស៊ីទេគឺ «ជននោះមិនត្រូវបានហាមឃាត់មិនឱ្យចូលក្នុងប្រទេសឥណ្ឌូនេស៊ីដើម្បីសម្រាកលំហែឡើយ»។
ស្ថានទូតកម្ពុជាផ្តល់អំណះអំណាងថា វត្តមានរបស់លោក សម រង្ស៊ី គឺដើម្បីសកម្មភាពនយោបាយ៖
«ប្រសិនបើលោក សម រង្ស៊ី មកឥណ្ឌូណេស៊ីដើម្បីសម្រាកលំហែគឺយើងមិនជំទាស់ទេ។ ប៉ុន្តែគាត់មកទីនេះដើម្បី ចូលរួមសកម្មភាពនយោបាយនិងរិះគន់រដ្ឋាភិបាលរបស់យើង។ គាត់នឹងធ្វើការងារដែលរំលោភទិដ្ឋាការ។ យើងថ្កោលទោសយ៉ាងខ្លាំងចំពោះសកម្មភាពរបស់លោកនៅក្នុងទីក្រុងហ្សាការតា»។
នៅទីក្រុងហ្សាការតា លោក សម រង្ស៊ី បានជួបជាមួយនឹងអ្នកតំណាងរាស្ត្រនិងសកម្មជនសិទ្ធិមនុស្សឥណ្ឌូនេស៊ី។
ស្ថានទូតកម្ពុជាធ្លាប់បានព្យាយាមដោយមិនបានជោគជ័យម្ដងហើយកាលពីសប្ដាហ៍មុនដោយព្យាយាមរារាំងសន្និសីទសារព័ត៌មានរបស់លោកស្រី មូរ សុខហួរ និងសុំឱ្យអាជ្ញាធរបណ្ដេញចេញ។
ស្ថានភាពសិទ្ធិមនុស្សនិងលទ្ធិប្រជាធិបតេយ្យកម្ពុជាបានធ្លាក់ចុះយ៉ាងខ្លាំងក្នុងរយៈពេលជាង២ឆ្នាំមកនេះ ដោយសារតែរដ្ឋាភិបាលកម្ពុជាបានរំលាយគណបក្សសង្គ្រោះជាតិ ធ្វើទុក្ខបុកម្នេញអង្គការសង្គមស៊ីវិលនិងបណ្ដាញព័ត៌មានឯករាជ្យ។
កាលពីថ្ងៃអង្គារសហភាពអឺរ៉ុបបានបញ្ជូនរបាយការណ៍បឋមមួយទៅរដ្ឋាភិបាលកម្ពុជាដោយទុកពេលឱ្យមួយខែដើម្បីកែលម្អស្ថានការណ៍ឡើងវិញជាថ្នូរនឹងការរក្សាឋានៈអនុគ្រោះពន្ធ «គ្រប់មុខទំនិញលើកលែងសព្វាវុធ» (EBA)។ សហភាពអឺរ៉ុបនៅតែសម្ដែងក្ដីបារម្ភយ៉ាងខ្លាំងពីស្ថានភាពសិទ្ធិមនុស្សនិងពលកម្មដែលមិនបានប្រសើរឡើងក្នុងរយៈពេល៩ខែនៃការតាមដានរបស់ខ្លួន។
លោក ហ្សង់ បាបទីស ឡឺម៉ូញ៉េ (Jean-Baptiste Lemoyne) រដ្ឋលេខាធិការនៃក្រសួងការបរទេសនិងអឺរ៉ុបរបស់ប្រទេសបារាំងបញ្ជាក់ប្រាប់ព្រឹទ្ធសភាកាលពីថ្ងៃពុធថា ប្រសិនបើមិនមានការរីកចម្រើនទេគឺប្រទេសបារំាងនិងសហភាពអឺរ៉ុបនឹងត្រូវតែដកហូតឋានៈអនុគ្រោះពន្ធនេះ។
អត្ថាធិប្បាយរបស់លោកគឺជាការឆ្លើយតបនឹងសំណួររបស់លោក អង់ដ្រេ កាតូឡាំង (Andre Gattolin) សមាជិកព្រឹទ្ធសភាដែលតែងតែយកចិត្តទុកដាក់ពីស្ថានភាពសិទ្ធិមនុស្សនិងលទ្ធិប្រជាធិបតេយ្យនៅកម្ពុជា។ លោក អង់ដ្រេ កាតូឡាំង ក៏ជាអនុប្រធានគណៈកម្មាធិការទទួលបន្ទុកកិច្ចការអឺរ៉ុបនៃព្រឹទ្ធសភាបារាំងផងដែរ៕
