ការបូមប្រេងរបស់ក្រុមហ៊ុន KrisEnergy នៅអណ្ដូងក្នុងប្លុក A នៃដែនសមុទ្រកម្ពុជាត្រូវផ្អាកជាបណ្ដោះអាសន្ន ក្រោយពេលក្រុមហ៊ុនមេ បានប្រកាសក្ស័យធន។ នេះបើយោងតាមមន្ត្រីជាន់ខ្ពស់ក្រសួងរ៉ែ និងថាមពល។
ក្នុងការផ្តល់សេចក្តីអធិប្បាយលើប្រព័ន្ធសង្គមហ្វេសប៊ុកកាលពីថ្ងៃពុធ លោក ម៉េង ស័ក្តធារ៉ា រដ្ឋលេខាធិការក្រសួងរ៉ែ និងថាមពល បានបង្ហាញពីប្រវត្តិនៃការកើតឡើងនៃវិបត្តិហិរញ្ញវត្ថុរបស់ក្រុមហ៊ុន KrisEnergy ដែលកើតមានចាប់តាំងពីឆ្នាំ២០១៨ គឺនៅពេលក្រុមហ៊ុនចាប់ផ្តើមលក់សិទ្ធិសម្បទានប្លុកប្រេងកាត ដែលមាននៅប្រទេសផ្សេងៗមួយចំនួន ដើម្បីដោះស្រាយវិបត្តិហិរញ្ញវត្ថុរបស់ខ្លួន។ ក៏ប៉ុន្តែវិបត្តិកាន់តែធ្ងន់ធ្ងរឡើងរហូតដល់អំឡុងពេលឆ្នាំ២០១៩។
លោក ម៉េង ស័ក្តធារ៉ា បន្តថា ដោយប្រឈមនឹងការទារបំណុលពីម្ចាស់បំណុល ក្រុមហ៊ុន ក៏បានដាក់បណ្តឹងសុំការការពារពីតុលាការនៅសិង្ហបុរី ដើម្បីបញ្ចៀសការប្រកាសក្ស័យធន និងរំលាយក្រុមហ៊ុនលើកដំបូងនៅដើមឆ្នាំ២០១៩។
ក្នុងការស្នើសុំការការពារពីតុលាការនោះ លោក ម៉េង ស័ក្តធារ៉ា ពន្យល់ថា ក្រុមហ៊ុនបានយកការរំពឹងទុករបស់ខ្លួនលើផលរបស់គម្រោងផលិតកម្មប្រេងនៅប្លុក A របស់កម្ពុជាដែលជាការសាកល្បងបឋម ទៅធ្វើជាអំណះអំណាងពីលទ្ធភាពអាចកែវិបត្តិហិរញ្ញវត្ថុរបស់ខ្លួនឡើងវិញ និងបង្កើតជំនឿចិត្តដល់ម្ចាស់បំណុលធំៗ ដើម្បីឲ្យផ្តល់ឱកាសបន្ថែមក្នុងការពិនិត្យលទ្ធភាពប្រែក្លាយបំណុលឲ្យទៅជាការដាក់ទុនចូលក្នុងភាគហ៊ុនរបស់ក្រុមហ៊ុនវិញ។
បើតាមការអធិប្បាយរបស់លោក ម៉េង ស័ក្តិធារ៉ា អ្វីៗមិនបានទៅតាមការរំពឹងទុករបស់ក្រុមហ៊ុន KrisEnergy ដែលមានក្រុមហ៊ុនបុត្រសម្ព័ន្ធរបស់ខ្លួននៅកម្ពុជាឈ្មោះ KrisEnergy Cambodia ដោយបរិមាណផលិតកម្មប្រេងនៅអណ្ដូងក្នុងប្លុក A មិនដល់កម្រិតដែលរំពឹងទុក ហើយនៅទីបំផុតទៅការណ៍នេះ បានបង្ខំឱ្យក្រុមហ៊ុន«អស់ជម្រើស» ដាក់ពាក្យទៅតុលាការសុំលក់ទ្រព្យសម្បត្តិដើម្បីសងបំណុលតែម្ដង។
លោកបន្ថែមថា៖ «នៅក្នុងដំណាក់កាលរង់ចាំការចាត់ចែងរបស់តុលាការ និងការចរចារវាងភាគីម្ចាស់បំណុលដែលទទួលបានសិទ្ធិបន្តជាមួយរដ្ឋាភិបាលកម្ពុជា ប្រតិបត្តិការប្រេងកាតនៅប្លុក A នៅកម្ពុជា នឹងត្រូវជួបបញ្ហាប្រឈម ដោយសារក្រុមហ៊ុនបុត្រសម្ព័ន្ធ KrisEnergy Cambodia បានបាត់បង់ការផ្តល់ទុនហិរញ្ញវត្ថុសម្រាប់ប្រតិបត្តិការរបស់ខ្លួន។ ប្រតិបត្តិការប្រេងកាតធំៗ និងគម្រោងអភិវឌ្ឍជាជំហានបន្ត ដែលបានគ្រោងទុកនឹងត្រូវផ្អាកជាបណ្តោះអាសន្ន រង់ចាំដំណោះស្រាយឯកភាពគ្នាណាមួយរវាងរដ្ឋាភិបាល និងម្ចាស់បំណុលដែលទទួលបានសិទ្ធិបន្តពីតុលាការ»។
បើតាមសេចក្តីប្រកាសរបស់ក្រុមហ៊ុន KrisEnergy ចេញផ្សាយកាលពីថ្ងៃទី៤ ខែមិថុនា ឆ្នាំ២០២១ ក្រុមហ៊ុនដែលមានមូលដ្ឋាននៅប្រទេសសិង្ហបុរីមួយនេះ លើកឡើងថា «ក្រុមហ៊ុនសូមប្រកាសថា ក្រុមហ៊ុនមិនមានលទ្ធភាពសងបំណុលខ្លួន ដោយផ្អែកលើបំណុលដែលអាចកើនឡើង និងកំពុងមានជាក់ស្តែង ហើយនឹងបន្តទៅរកការទូទាត់បំណុល»។
ក្រុមហ៊ុនបន្ថែមថា ការធ្លាក់ចុះនៃការរកឃើញប្រេងនិងលំហូរសាច់ប្រាក់ពីការអភិវឌ្ឍក្នុងប្លុក A ឬគេហៅថា ប្លុកអប្សរាក្នុងប្រទេសកម្ពុជា ក៏ជាមូលហេតុមួយដែរ ដែលនាំឲ្យក្រុមហ៊ុនឈានដល់ការបិទបញ្ចប់អាជីវកម្ម។
វីអូអេព្យាយាមសុំការអធិប្បាយពីលោក ម៉េង ស័ក្តធារ៉ា តែមិនទាន់អាចទាក់ទងលោកបាននៅឡើយនៅថ្ងៃព្រហស្បតិ៍នេះ។ ចំណែកលោក ជៀប សួរ អគ្គនាយកនៃអគ្គនាយកដ្ឋានប្រេងកាត និងជាអ្នកនាំពាក្យក្រសួងរ៉ែ និងថាមពល ក៏មិនលើកទូរស័ព្ទ។
បើតាមសេចក្តីពន្យល់របស់លោក ម៉េង ស័ក្តធារ៉ា នៅលើប្រព័ន្ធសង្គមហ្វេសប៊ុក ក្រុមហ៊ុន KrisEnergy មានធុរកិច្ចខាងអាជីវកម្មប្រេងកាតនៅប្រទេសមួយចំនួនដូចជា បង់ក្លាដេស ឥណ្ឌូនេស៊ី ថៃ វៀតណាម និងថ្មីៗនេះ នៅកម្ពុជា។
អ្នកស្រី Tanya Pang អនុប្រធានផ្នែកទំនាក់ទំនងសាជីវកម្មរបស់ក្រុមហ៊ុន KrisEnergy បដិសេធធ្វើអត្ថាធិប្បាយ ដោយប្រាប់អ្នកសារព័ត៌មានឱ្យយោងសេចក្ដីប្រកាសពីមុនៗរបស់ក្រុមហ៊ុនវិញ។
បើតាមសេចក្តីរាយការណ៍របស់សារព័ត៌មានអនឡាញ NIKKEI Asia ក្រុមហ៊ុន KrisEnergy Ltd បានស្ថិតក្រោមការត្រួតពិនិត្យរបស់តុលាការពីសំណាក់ម្ចាស់បំណុល ចាប់តាំងពីឆ្នាំ២០១៩ ខណៈក្រុមហ៊ុន បានព្យាយាមរៀបចំបំណុលរបស់ខ្លួនដែលមានជាង៥០០លានដុល្លារសហរដ្ឋអាមេរិក។
គួររំឭកថា កិច្ចព្រមព្រៀងរវាងរដ្ឋាភិបាលកម្ពុជា និងក្រុមហ៊ុន KrisEnergy ក្នុងការធ្វើអាជីវកម្មប្រេងនៅកម្ពុជា កើតមានឡើងបន្ទាប់ពីក្រុមហ៊ុន Chevron Overseas Petroleum (Cambodia) Ltd ដែលបានធ្វើការរុករកប្រេងនៅក្នុងប្រទេសកម្ពុជាអស់រយៈពេល១២ឆ្នាំមកហើយ បានសម្រេចដកការបណ្តាក់ទុននៅកម្ពុជា កាលពីឆ្នាំ២០១៤ ហើយបានលក់ភាគហ៊ុនរបស់ខ្លួនទាំងមូល សរុបចំនួន៣០ភាគរយទៅឲ្យក្រុមហ៊ុនដៃគូ គឺ KrisEnergy Ltd របស់ប្រទេសសិង្ហបុរី។
កាលពីខែសីហា ឆ្នាំ២០១៧ ក្នុងពេលចុះហត្ថលេខាជាមួយក្រុមហ៊ុន KrisEnergy Group លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានឲ្យដឹងថា ប្រេងក្នុងប្លុក 1A និង ប្លុក 1B ត្រូវបានប៉ាន់ស្មានថា អាចមានលើសពី៣០លានបារ៉ែល។ លោកថា ការអភិវឌ្ឍអណ្តូងប្រេងជំហានដំបូងនេះ នឹងរួមចំណែកដល់ការសិក្សាស្វែងរកថែមទៀតលើប្លុកប្រេងដែលនៅទំនេរ និងមិនទាន់មានក្រុមហ៊ុនវិនិយោគ៕