កាលពីពេលថ្មីៗនេះ មានការផ្សព្វផ្សាយពាណិជ្ជកម្មល្បែងអនឡាញមួយឈ្មោះថាDIG88 រហូតដល់មានការរិះគន់យ៉ាងសន្ធឹកសន្ធាប់ទៅលើតារាកំប្លែងល្បីឈ្មោះម្នាក់ ឈ្មោះនាយ គ្រឿន ដែលបានចូលរួមផ្សព្វផ្សាយក្នុងវីដេអូបទចម្រៀងមួយ។ ក្រោយមានប្រតិកម្មពីមហាជនដែលប្រើប្រាស់បណ្តាញសង្គមហ្វេសប៊ុក នាយគ្រឿន កាលពីថ្ងៃចន្ទ បានប្រកាសជាសាធារណៈថា លោកឈប់ផ្សាយពាណិជ្ជកម្មឲ្យក្រុមហ៊ុនល្បែង និងស្រាទៀតហើយ ចាប់ពីពេលនេះ។
មន្រ្តីជាន់ខ្ពស់ម្នាក់ដែលជាអ្នកនាំពាក្យក្រសួងសេដ្ឋកិច្ចនិងហិរញ្ញវត្ថុ ប្រាប់វីអូអេនៅថ្ងៃអង្គារនេះថា រដ្ឋាភិបាលកម្ពុជាមិនបានផ្តល់អាជ្ញាបណ្ណដល់ក្រុមហ៊ុនលែ្បងស៊ីសងអនឡាញឱ្យប្រកបអាជីវកម្ម ឬរកស៊ីនៅកម្ពុជានោះទេ ចាប់តាំងពីពាក់កណ្តាលឆ្នាំ ២០១៩មក គឺនៅគ្រាដែលរដ្ឋាភិបាលបានប្រកាសបិទល្បែងអនឡាញ ដែលគេតែងហៅថាអនឡាញហ្គេម។
អ្នកនាំពាក្យក្រសួងសេដ្ឋកិច្ច លោក មាស សុខសេនសាន ថ្លែងថា រដ្ឋាភិបាលបានបញ្ចប់ល្បែងអនឡាញ តាំងពីខែសីហា ឆ្នាំ ២០១៩ មកម្ល៉េះ។ លោកបន្ថែមថា រដ្ឋាភិបាលក៏មិនបានអនុញ្ញាតឱ្យមានការផ្សព្វផ្សាយពាណិជ្ជកម្មល្បែងស៊ីសងតាមបណ្តាញសង្គមឡើយ។
លោកបញ្ជាក់ជាអក្សរប្រាប់វីអូអេតាមប្រព័ន្ធទំនាក់ទំនងតេឡេក្រាមថា៖ «ពាក់ព័ន្ធនឹងល្បែងអនឡាញ រាជរដ្ឋាភិបាលបានសម្រេចបញ្ឈប់ការផ្តល់គោលការណ៍អនុញ្ញាតល្បែងអនឡាញតាំងពីថ្ងៃទី ១៨ ខែសីហា ឆ្នាំ ២០១៩ រហូតមកដល់ពេលនេះពុំមានការអនុញ្ញាតលើការផ្តល់អាជ្ញាបណ្ណលែ្បងអនឡាញនោះទេ»។
ល្បែងអនឡាញរបស់ DIG88.COM ដែលមានល្បែងស៊ីសង ដូចជាកាស៊ីណូ មាន់ជល់ បាញ់ត្រី និងល្បែងមួយចំនួនទៀត ត្រូវបានផ្សព្វផ្សាយជាបន្តបន្ទាប់តាមរយៈបណ្តាញសង្គមហ្វេសប៊ុក តេឡេក្រាម YouTube និងគេហទំព័រ ដើម្បីឱ្យប្រជាពលរដ្ឋចុះឈ្មោះលេងល្បែងអនឡាញទាំងនោះ។
អ្នកនាំពាក្យក្រសួងសេដ្ឋកិច្ច លោក មាស សុខសេនសាន បញ្ជាក់ប្រាប់វីអូអេថា៖ «ក្រុមហ៊ុនខាងលើនេះ [DIG88.COM] ពុំមានអាជ្ញាបណ្ណទេ»។
អ្នកនាំពាក្យរូបនេះមិនបានបញ្ជាក់អំពីចំណាត់ការ ឬវិធានការបែបណាទៅលើក្រុមហ៊ុនល្បែងអនឡាញនេះឡើយ ក្រោយក្រុមហ៊ុនមួយនេះបានផ្សព្វផ្សាយល្បែងជាសាធារណៈ ខណៈរដ្ឋាភិបាលមិនបានផ្តល់អាជ្ញាបណ្ណសម្រាប់ដំណើរការអាជីវកម្មមួយនេះឡើយ។ ប៉ុន្តែមន្រ្តីជាន់ខ្ពស់រូបនោះថាក្រសួងសេដ្ឋកិច្ច«នឹងបន្តលុបបំបាត់»។
អ្នកនាំពាក្យរូបនេះឱ្យដឹងទៀតថា អនុលោមតាមច្បាប់ស្តីពីការគ្រប់គ្រងល្បែងពាណិជ្ជកម្ម វិស័យល្បែងពាណិជ្ជកម្ម មិនស្ថិតក្រោមការគ្រប់គ្រងរបស់ក្រសួងសេដ្ឋកិច្ច និងហិរញ្ញវត្ថុនោះទេ គឺស្ថិតក្រោមការគ្រប់គ្រងរបស់គណៈកម្មការគ្រប់គ្រងល្បែងពាណិជ្ជកម្មកម្ពុជាដែលមានរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុជាប្រធាន។
លោក មាស សុខសេនសាន បញ្ជាក់ថា គណៈកម្មការគ្រប់គ្រងល្បែងពាណិជ្ជកម្មកម្ពុជាបានចេញសេចក្តីជូនដំណឹងនិងសេចក្តីណែនាំ ព្រមទាំងកំពុងរៀបចំកម្មវិធីអប់រំណែនាំដល់ប្រជាពលរដ្ឋឱ្យយល់ដឹងពីផលប៉ះពាល់នៃការលេងល្បែងដែលរួមមានការផ្ញើសារអប់រំតាមប្រព័ន្ធទូរស័ព្ទចល័ត (TRC) និងបណ្តាញទំនាក់ទំនងសង្គម ការផលិតវីដេអូអប់រំ និងការចងបដាអប់រំនៅតាមទីសាធារណៈជាដើម។
វីអូអេមិនទាន់អាចសុំការបញ្ជាក់បន្ថែមពីលោក រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជាបាននៅឡើយទេ។
វីអូអេក៏មិនទាន់អាចសុំការអត្ថាធិប្បាយពីអ្នកនាំពាក្យក្រសួងមហាផ្ទៃ លោក ទូច សុខៈ និងលោក ខៀវ សុភ័គ រដ្ឋលេខាធិការក្រសួងមហាផ្ទៃបានដែរ។
វីអូអេក៏មិនទាន់អាចសុំការបញ្ជាក់ពីក្រុមហ៊ុនល្បែងអនឡាញ DIG88.COM តាមរយៈលេខទូរស័ព្ទដែលក្រុមហ៊ុនផ្សព្វផ្សាយបានដែរ។
អ្នកតាមដានមួយចំនួនបង្ហាញការងឿងឆ្ងល់ថា ហេតុអ្វីបានក្រុមហ៊ុនល្បែងស៊ីសងអនឡាញត្រូវបានផ្សព្វផ្សាយតាមបណ្តាញសង្គមយ៉ាងទូលាយបែបនេះ?
បុរសម្នាក់កំពុងចូលមើលវេបសាយហ្គេមអនឡាញ DIG88 ក្នុងរាជធានីភ្នំពេញ នាថ្ងៃទី១៣ ខែកុម្ភៈ ឆ្នាំ២០២៤។ (ស៊ឹម ចាន់សំណាង/វីអូអេ)
លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវបានចោទសួរអំពីការបណ្តែតបណ្តោយឱ្យមានការផ្សព្វផ្សាយល្បែងស៊ីសងតាមប្រព័ន្ធអនឡាញយ៉ាងសន្ធឹកសន្ធាប់នាពេលបច្ចុប្បន្ននេះ។ លោកថា ល្បែងស៊ីសងបានជះផលអវិជ្ជមានខ្លាំងទៅដល់ពលរដ្ឋ។
លោកប្រាប់វីអូអេថា៖ «យើងក៏ឆ្ងល់ដែរថារដ្ឋាភិបាលហាក់បីដូចជាមិនអើពើចំពោះបញ្ហាទាំងអស់ហ្នឹងហើយ ហាក់បីដូចជាបើកដៃឱ្យការផ្សព្វផ្សាយមានភាពផុសផុល រហូតទៅដល់មានបញ្ហា ហាក់បីធ្វើជាមិនដឹងអីអ៊ីចឹង»។
ក្រៅពីក្រុមហ៊ុនល្បែងអនឡាញ DIG88.COM នេះ គេក៏ឃើញក្រុមហ៊ុនល្បែងអនឡាញជាច្រើនទៀតបានផ្សព្វផ្សាយអូសទាញឱ្យពលរដ្ឋចូលទៅលេងល្បែងស៊ីសងទាំងនោះ។ មិនតែប៉ុណ្ណោះ ក្រុមហ៊ុនល្បែងស៊ីសងមួយចំនួនទៀតបានផ្ញើសារ(Message) តាមរយៈប្រព័ន្ធលេខទូរស័ព្ទដៃ ទៅកាន់ពលរដ្ឋ ដោយដាក់តំណភ្ជាប់ចូលទៅលេងល្បែងស៊ីសងទាំងនោះ តាមប្រព័ន្ធតេឡេក្រាម និងគេហទំព័រ។
ក្រុមហ៊ុនទាំងនោះមានឈ្មោះដូចជាកាស៊ីណូកីឡា 5T5T និងកាស៊ីណូអនឡាញ PK777 ដែលមានល្បែងដូចជាបាការ៉ាត់ ម៉ាស៊ីនស្លុត ជល់មាន់ បាល់ទាត់ និងល្បែងជាច្រើនទៀត។
បើតាមលោក សេក សុជាតិ កាលដែលក្រុមហ៊ុនល្បែងស៊ីសងផ្ញើសារតាមរយៈទូរស័ព្ទដៃ គឺ«រំលោភឯកជនភាពរបស់ប្រជាពលរដ្ឋ»។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាដែលរិះគន់ការផ្សព្វផ្សាយល្បែងនៅលើបណ្តាញសង្គម យល់ឃើញថាការផ្សព្វផ្សាយទាក់ទងនឹងល្បែងស៊ីសងទាំង Online និង offline គឺគគ្រឹកគគ្រេង ដែលមិនបានគោរពទៅតាមក្រមសីលធម៌ក្នុងប្រទេសកម្ពុជានោះទេ។ លោកក៏ទាមទារឱ្យរដ្ឋាភិបាល និងអាជ្ញាធរពាក់ព័ន្ធចាត់វិធានការជាបន្ទាន់លើក្រុមហ៊ុនល្បែងស៊ីសងអនឡាញទាំងនោះ។
លោកថ្លែងថា៖ «ទាល់តែទាំងភាគីក្រុមហ៊ុន ទាំងតារាខ្លួនឯង និងអាជ្ញាធររដ្ឋហ្នឹងយកចិត្តទុកដាក់ពិនិត្យមើលឡើងវិញអំពីផលប៉ះពាល់នៃការផ្សព្វផ្សាយពាណិជ្ជកម្មល្បែងស៊ីសង ជាពិសេសគឺ Game Online ហ្នឹង ព្រោះក្នុងសង្គមមួយជាពិសេសនៅក្នុងសង្គមខ្មែរវាមិនអាចរីកចម្រើនរុងរឿងទៅបានទេ បើសិនបើប្រជាពលរដ្ឋវក់វីនឹងល្បែងស៊ីសង»។
ក្រៅពីល្បែងអនឡាញនេះ ក៏មានការរិះគន់ទៅលើល្បែងមួយទៀត គឺឡូតូដែលអាជីវកម្មមួយនេះកំពុងរីកដុះដាលនៅតាមទីសាធារណៈ ជាពិសេសកន្លែងលេងកីឡា។
ទាក់ទងនឹងល្បែងឡូតូនេះ អភិបាលខេត្តកំពង់ស្ពឺ លោក វី សំណាង ប្រាប់វីអូអេនៅថ្ងៃអង្គារនេះថា លោកមិនអនុញ្ញាតឱ្យបើកអាជីវកម្មឆ្នោតឡូតូ និងល្បែងផ្សងសំណាងនៅក្នុងភូមិសាស្ត្រខេត្តកំពង់ស្ពឺទៀតនោះទេ ព្រោះដើម្បីចូលរួមការពារសនិ្តសុខសណ្តាប់ធ្នាប់សាធារណៈ និងសុខសុវត្ថិភាពជូនប្រជាពលរដ្ឋ។ លោកក៏ព្រមានចាត់វិធាន និងបង្រ្កាបល្បែងស៊ីសងគ្រប់ប្រភេទក្នុងខេត្តផងដែរ។
លោកថ្លែងថា៖ «យើងអនុវត្តតាមការណែនាំដ៏ខ្ពង់ខ្ពស់របស់សម្តេច គឺយើងមិនអនុញ្ញាតឱ្យមានការបើកនូវល្បែងឡូតូឬក៏ល្បែងស្អីផ្សេងៗ យើងដឹងហើយថាល្បែងវាឱ្យផលត្រឡប់មកវិញ គឺជាបញ្ហាសង្គម ដែលកើតចេញពីការចាញ់ល្បែង។ បើឈ្នះវាមិនអីទេ តែពេលចាញ់ក្មួយដឹងហើយ នៅពេលយករបស់របរក្នុងគ្រួសារអស់ បែរទៅយករបស់អ្នកដទៃក្រៅពីរបស់គ្រួសារ វាអាចទៅជាលួចឆក់ប្លន់អ៊ីចឹង»។
អភិបាលខេត្តរូបនេះក៏អំពាវនាវទៅកាន់ប្រជាពលរដ្ឋឱ្យចៀសឆ្ងាយពីល្បែងស៊ីសង៕