ផ្នែកផ្សាយជាភាសាភូមានៃវីអូអេបានរាយការណ៍ថា រយៈពេលឃោសនាបោះឆ្នោតជាផ្លូវការនៃការបោះឆ្នោតជាតិនៅក្នុងប្រទេសភូមា បានចាប់ផ្តើមហើយពីរខែនៅមុនការបោះឆ្នោតក្នុងខែវិច្ឆិកានេះ។
បណ្តាបេក្ខជននៃគណបក្សធំៗទាំងពីរគឺគណបក្ស USDP គ្រប់គ្រងប្រទេសនិងគណបក្ស NLD បានចាប់ផ្តើមយុទ្ធនាការឃោសនាបោះឆ្នោតនៅក្នុងក្រុងធំៗដូចជាក្រុង Rangoon និងក្រុង Mandalay ជាដើម។ នៅពេលជាមួយគ្នានេះ គណបក្សតូចៗខ្លះដូចជាគណបក្សដែលផ្អែកលើពួកជនអំបូរភាគតិចមិនអាចចាប់ផ្តើមយុទ្ធនាការឃោសនារបស់ពួកគេបានទេដោយសារមានទឹកជំនន់នៅក្នុងតំបន់នោះ។ ពួកបេក្ខជនខ្លះបានប្រើប្រាស់បណ្តាញសង្គមដូចជាហ្វេសប៊ុក ជាដើមដើម្បីធ្វើយុទ្ធនាការឃោសនារបស់ពួកគេ។
លោកស្រីអង់សានស៊ូជី (Aung San Suu Kyi) បានហៅការបោះឆ្នោតនេះថាជា«ពេលដែលមានការផ្លាស់ប្តូរសំខាន់មួយសម្រាប់ប្រទេសយើង»ហើយលោកស្រីបានមានប្រសាសន៍ប្រាប់ប្រជារាស្ត្រភូមាថា «នេះជាឱកាសមួយដែលយើងមិនត្រូវធ្វើឱ្យរបូតបានទេ»។ នេះបើតាមសុន្ទរកថារបស់លោកស្រី ដែលបានត្រូវផ្សព្វផ្សាយតាមហ្វេសប៊ុក របស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ៕