ពួកអ្នកស៊ើបអង្កេតរបស់ប្រទេសឥណ្ឌូនេស៊ីនិយាយថា ពួកគេមិនបានរកឃើញភ័ស្តុតាងនៃភេរវកម្មនៅក្នុងការធ្លាក់យន្តហោះមួយគ្រឿងរបស់ក្រុមហ៊ុន AirAsia កាលពីខែមុនទេ។
លោក Andreas Hananto ប្រធានក្រុមស៊ើបអង្កេតដែលមានសមាជិក១០នាក់នៃគណៈកម្មាធិការជាតិផ្នែកសុវត្ថិភាពខាងការដឹកជញ្ជូន បាននិយាយប្រាប់ទីភ្នាក់ងារព័ត៌មាន Reuters កាលពីថ្ងៃច័ន្ទថា «គ្មានការគំរាមកំហែង» ណាមួយត្រូវបានរកឃើញនៅក្នុងប្រដាប់ថតសំទ្បេងនៅក្នុងបន្ទប់អ្នកបើកយន្តហោះនោះដែលបានបាត់ពីកញ្ចក់រ៉ាដាកាលពីថ្ងៃទី២៨ខែធ្នូនោះទេ។
លោក Hananto ក៏បាននិយាយដែរថា ការថតទិន្នន័យសំទ្បេងនៃការហោះហើរនោះបានបង្ហាញថា មិនទំនងជាមានការផ្ទុះនៅមុនពេលយន្តហោះនោះធ្លាក់ទេ។
ប្រអប់ខ្មៅទាំងពីរនៃយន្តហោះក្រុមហ៊ុន AirAsia ជើងហោះ QZ8501 ត្រូវបានរកឃើញពីកម្ទិចយន្តហោះនោះនៅក្នុងសមុទ្រ Java។
មនុស្សទាំងអស់១៦២នាក់ដែលជិះក្នុងយន្តហោះនោះបានបាត់បង់ជីវិតនៅក្នុងការធ្លាក់យន្តហោះនោះ៕