ពួកអាជ្ញាធរឥណ្ឌូនេស៊ី បានបញ្ជាក់ថា យន្តហោះស្វែងរកមួយគ្រឿងរបស់ប្រទេសអូស្រ្តាលី បានឃើញកម្ទេចបាក់បែកនៅក្នុងផ្ទៃទឹកទល់មុខកោះ Borneo ដែលស្ថិតនៅចម្ងាយ១.១០០គីឡូម៉ែត្រពីទីតាំងដែលគេដឹងចុងក្រោយនៃជើងហោះហើរលេខ៨៥០១របស់ក្រុមអាកាសចរណ៍ Air Asia ក៏ប៉ុន្តែ គ្មានការបញ្ជាក់ថា កម្ទេចបាក់បែកនោះ បានពាក់ព័ន្ធទៅនឹងយន្តហោះបាត់ដែលបានដឹកមនុស្ស១៦២នាក់នោះទេ។
លោក Jusuf Kalla អនុប្រធានាធិបតីនៃប្រទេសឥណ្ឌូនេស៊ី និយាយថា នាវាចំនួន៣០គ្រឿងនិងយន្តហោះចំនួន១៥គ្រឿង ទាំងយន្តហោះនិងឧទ្ធម្ភាគចក្រ បានចូលរួមនៅក្នុងការរុករកយន្តហោះធុន Airbus លេខA320 ដែលបានបាត់។ ក៏ប៉ុន្តែ លោក កំពុងព្យាយាមបន្ថយក្តីរំពឹងថាយន្តហោះនោះនឹងត្រូវរកឃើញនៅពេលឆាប់ៗនេះ។ យន្តហោះបាត់នោះត្រូវនាយកទីភ្នាក់ងាររុករកនិយាយថា ទំនងជាស្ថិតនៅបាតសមុទ្រ ។
«តាមការពិត យើង សង្ឃឹមនឹងរកឃើញឲ្យបានឆាប់រហ័សទៅតាមលទ្ធភាពដែលអាចធ្វើទៅបាន។យើង មិនមានទិសដៅជាក់លាក់ ក៏ប៉ុន្តែ នឹងធ្វើឲ្យបានឆាប់រហ័សទៅតាមលទ្ធភាពដែលអាចធ្វើបាន»។
លោកអនុប្រធានាធិបតី បានកត់សម្គាល់ថា ជើងហោះហើរម៉ាឡេស៊ីលេខ៣៧០ ដែលបានបាត់កាលពីខែមិនានៅក្នុងទឹកជ្រៅទល់មុខឆ្នេរសមុទ្រអូស្រ្តាលី នៅមិនទាន់រកឃើញនៅឡើយហើយយន្តហោះផ្សេងទៀតដែលបានបាត់ក្នុងប៉ុន្មានឆ្នាំថ្មីៗនេះ បានចំណាយពេលរាប់សិបខែឬយូរជាងនោះទម្រាំរកឃើញ។
សហរដ្ឋអាមេរិក ចិននិងប្រទេសឥណ្ឌា ស្ថិតនៅក្នុងចំណោមប្រទេសដែលផ្តល់ធនធានរបស់ខ្លួនសម្រាប់កិច្ចប្រតិបត្តិការនៅក្នុងអ្វីដែលជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក។ យន្តហោះមកពីប្រទេសអូស្រ្តាលី ឥណ្ឌូណេស៊ី ម៉ាឡេស៊ីនិងប្រទេសសឹង្ហបូរី បានចូលរួមរួចទៅហើយនៅក្នុងការរុករកនៅតំបន់ទឹករាក់ៗ។
ក្នុងរដ្ឋធានីហ្សាកាតា ក្រសួងដឹកជញ្ជូន ប្រាប់ឲ្យដឹងថា រដ្ឋាភិបាល នឹងពិនិត្យមើលឡើងវិញនូវកិច្ចប្រតិបត្តិការនៃសាខារបស់ក្រុមហ៊ុនអាកាសចរណ៍Air Asia ក្នុងប្រទេសឥណ្ឌូណេស៊ី។
លោកTony Fernandes នាយកប្រតិបត្តិរបស់ក្រុមហ៊ុនធំនោះ បានពន្យល់ពួកអ្នកយកព័ត៌មានថា ក្រុមហ៊ុនអាកាសចរណ៍ Air Asia មិនដែលបានបាត់បង់ជីវិតមនុស្សទេ ទើបតែបាត់ជើងហោះហើរលេខ៨៥០១កាលពីថ្ងៃអាទិត្យប៉ុណ្ណោះ។
«យើង បានដឹកជញ្ជូនមនុស្ស២២០លាននាក់រហូតមកទល់ពេលនេះ។ជាការពិត មានប្រតិកម្មខ្លះ។ ក៏ប៉ុន្តែ យើង មានទំនុកចិត្តសមត្ថភាពរបស់យើងនៅក្នុងការដឹកជញ្ជូនមនុស្ស។ ហើយយើង នឹងបន្តនៅតែខ្លាំង»។
យន្តហោះឥណ្ឌូណេស៊ី AirAsia លេខ៨៥០១ដែលមានមនុស្ស១៦២នាក់នៅលើនោះ បានចាកចេញពីទីក្រុង Surabaya ទៅកាន់ចំណតអាកាសយាន Changi នៃប្រទេសសឹង្ហបូរីកាលពីថ្ងៃអាទិត្យដែលការហោះហើរមានរយៈពេលប្រហែល២ម៉ោង។ក៏ប៉ុន្តែ យន្តហោះនោះ បានបាត់នៅពេលដែលបើកប្រហែលពាក់កណ្តាលផ្លូវឆ្ពោះទៅកាន់ទីដៅរបស់ខ្លួន។
អ្នកបើកបរយន្តហោះម្នាក់ បានសុំពួកអ្នកត្រួតត្រាចរាចរណ៍អាកាសចរណ៍ដើម្បីអនុញ្ញាតឲ្យយន្តហោះហោះឡើងកម្ពស់ប្រហែល១.៨០០ម៉ែត្រថែមទៀតទៅជិតកម្ពស់១ម៉ឺន១ពាន់៦រយម៉ែត្រដើម្បីបញ្ចៀសព្យុះ។ក៏ប៉ុន្តែ ការសុំអនុញ្ញាតនោះ ត្រូវបានបដិសេធ ពីព្រោះតែយន្តហោះមួយទៀត កំពុងហោះហើរក្នុងតំបន់នោះ។
អ្នកត្រួតត្រានៅដី មិនបានទទួលការហៅទូរស័ព្ទពេលគ្រាអាសន្នណាមួយមកពីក្រុមអ្នកបើកបរហើយការទាក់ទងតាមប្រព័ន្ធរ៉ាដា បានបាត់ប្រហែល៦នាទីបន្ទាប់ពីការបញ្ជូនសញ្ញាតាមវិទ្យុចុងក្រោយមកពីយន្តហោះធុន Airbus។
លោកកាពីតែនដែលបញ្ជាយន្តហោះនោះ មានបទពិសោធន៍យ៉ាងខ្លាំងដោយបានធ្វើការហោះហើរជាង២ម៉ឺនម៉ោងហើយ៦ពាន់ម៉ោងនៃរយៈពេលទាំងនោះបើកបរឲ្យក្រុមហ៊ុនអាកាសចរណ៍ឥណ្ឌូណេស៊ី Air Asia នៅក្នុងបន្ទប់បើកបរយន្តហោះធុន Airbus A320៕
ប្រែសម្រួលដោយ ជឹង ប៉ូជីន
