ក្រុមសហជីពចំនួនប្រមាណ១៩ បានសម្តែងការខកចិត្តជាខ្លាំងនឹងការដំឡើងប្រាក់ឈ្នួលកម្មករចំនួនត្រឹមតែ២ដុល្លារ និងស្នើឲ្យមានកិច្ចអន្តរាគមន៍ពីបណ្តាក្រុមហ៊ុនអន្តរជាតិអ្នកបញ្ជាទិញធំៗដើម្បីប្រាក់ឈ្នួលបន្ថែមទៀតដល់កម្មកររាប់ម៉ឺននាក់ដែលកំពុងបម្រើការងារក្នុងឧស្សាហកម្មកាត់ដេរឲ្យបាន ២១៤ ដុល្លារក្នុងឆ្នាំ២០២២ខាងមុខ។
កាលពីថ្ងៃអាទិត្យ ទី៣ ខែតុលា ម្សិលមិញនេះ សហជីពតំណាងឲ្យអ្នកការពារសិទ្ធិ និងផលប្រយោជន៍កម្មករប្រមាណជិត២០ស្ថាប័ន រួមមាន សហព័ន្ធសហជីពកម្ពុជា CATU សហព័ន្ធសហជីពប្រជាធិបតេយ្យកម្មករកាត់ដេរកម្មករកម្ពុជា ហៅកាត់ថា CCAWDU បានផ្ញើសេចក្តីថ្លែងការណ៍មួយ ស្នើសុំឲ្យក្រុមហ៊ុនបញ្ជាទិញល្បីៗអន្តរជាតិជាច្រើនទៀតរួមមាន Puma Adidas H&M Nike និង Walmart ទាមទារប្រាក់ឈ្នួលចំនួន២១៤ដុល្លារសហរដ្ឋអាមេរិកសម្រាប់កម្មករក្នុងឧស្សាហកម្មកាត់ដេរនៅឆ្នាំ២០២២។
សេចក្តីថ្លែងការណ៍រួមរបស់សហជីពសំខាន់ៗ ក្នុងនោះ គឺសហព័ន្ធសហជីពកម្ពុជា CATU សហព័ន្ធសហជីពប្រជាធិបតេយ្យកម្មករកាត់ដេរកម្មករកម្ពុជា ហៅកាត់ថា CCAWDU បានសរសេរនៅក្នុងន័យដើមថា៖
«យើងខ្ញុំទាំងអស់គ្នាជាតំណាងចលនាសហជីពឯករាជ្យនៅក្នុងប្រទេសកម្ពុជា និងកម្មករនិយោជិតរាប់ម៉ឺននាក់ដែលជាសមាជិកមកពីវិស័យនានា មានការខកចិត្តជាខ្លាំងតាមរយៈសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈចុះនៅថ្ងៃទី២៨ ខែកញ្ញា ឆ្នាំ២០២១ សម្រេចដំឡើងបន្ថែមទឹកប្រាក់ចំនួន២ ដុល្លារ លើប្រាក់ឈ្នួល ១៩២ ដុល្លារ ដែលជាប្រាក់ឈ្នួលអប្បរមាសម្រាប់កម្មករនិយោជិតវិស័យវាយនភណ្ឌ កាត់ដេរ ស្បែកជើង និងផលិតផលធ្វើដំណើរ និងកាបូបសម្រាប់ឆ្នាំ២០២២»។
សេចក្តីថ្លែងការណ៍បានបន្ថែមថា៖ «យើងខ្ញុំទាំងអស់គ្នាជាតំណាងចលនាសហជីពឯករាជ្យ នៅតែរក្សាជំហរទាមទារតួលេខ២១៤ដុល្លារទៅកាន់និយោជក និងក្រុមហ៊ុនអ្នកបញ្ជាទិញនៅក្រៅប្រទេស និងអំពាវនាវឲ្យបងប្អូនកម្មករទាំងអស់ចូលរួមនៅក្នុងយុទ្ធនាការយុទ្ធនាការនេះនៅតាមបណ្តារោងចក្រនានា ដោយការលើកសារ លើកបដា នៅតាមកន្លែងការងាររៀងៗខ្លួនរហូតទទួលបានជោគជ័យ»។
ប្រធានសហភាពការងារកម្ពុជា លោក អាត់ ធន់ ប្រាប់វីអូអេនៅថ្ងៃចន្ទនេះថា ការដំឡើងប្រាក់ឈ្នួលត្រឹម២ ដុល្លារ មិនអាចឆ្លើយតបនឹងតម្រូវការជីវភាពប្រចាំថ្ងៃសម្រាប់កម្មករបានទេ។
លោកថ្លែងថា៖ «ជាទស្សនៈរបស់ខាងសហជីព គឺយល់ឃើញថា ការដំឡើងប្រាក់ឈ្នួល២ ដុល្លារ គឺវាពិតជាទាបពេក ដែលមិនអាចដោះស្រាយជីវភាពបានទេ។ ហើយអ្វីដែលយើងចង់បាន គឺវាតិចបំផុតក៏ ២០៤ ដុល្លារ ប៉ុន្តែខាងយើងខាងគោលជំហរយើងមិនមានធ្វើយុទ្ធនាកាណ៍បន្តទៀតនៅពេលនេះទេ»។
ក្នុងការបោះឆ្នោតកំណត់ប្រាក់ឈ្នួលអប្បបរមាថ្មីដល់កម្មករសម្រាប់ឆ្នាំ២០២២ កាលពីថ្ងៃអង្គារសប្តាហ៍មុន ភាគីសហជីពខិតខំព្យាយាមទាមទារឲ្យបានតិចណាស់២០៤ដុល្លារដល់កម្មករសម្រាប់ឆ្នាំ២០២២។ ប៉ុន្តែសំណើសហជីពទទួលបានការគាំទ្រតែ៦សំឡេង លើ៥១សំឡេង។ រីឯសំណើកំណត់ប្រាក់ឈ្នួលត្រឹម១៨៨ ដុល្លារដែលស្នើដោយភាគីនិយោជក មិនទទួលបានសំឡេងគាំទ្រទេ។
អ្នកនាំពាក្យក្រសួងការងារលោក ហេង សួរ ប្រាប់វីអូអេតាមប្រព័ន្ធទំនាក់ទំនងតេឡេក្រាមនៅថ្ងៃចន្ទនេះថា លោកមិនមានក្តីព្រួយបារម្ភចំពោះថា ថ្ងៃអនាគតថានឹងអាចមានការតវ៉ារហូតដល់មានការធ្វើកូដកម្មនៅក្នុងការទាមទារដំឡើងប្រាក់ឈ្នួលនោះទេ ដោយថា កម្មករនិយោជិតមានការយល់ដឹង និងត្រៀមក្នុងការអនុវត្តន៍តាមយុន្តការដែលក្រសួងធ្លាប់បានអនុវត្តច្រើនដងកន្លងមកហើយ ។
លោកលើកឡើងក្នុងន័យដើមថា៖ «មិនមានការព្រួយបារម្ភទេ ដោយសារតំណាងរបស់បងប្អូនកម្មករដែលចូលរួមចរចា គឺដឹង យល់ និងត្រៀមអនុវត្តអ្វីដែលជាយន្តការយើងអនុវត្តច្រើនឆ្នាំហើយ»។ លោកបានបន្ថែមថា «ច្បាប់យន្តការ និងគោលការណ៍ប្រជាធិបតេយ្យ គឺបានបញ្ជាក់គ្រប់គ្រាន់ហើយ»។
កម្មការិនីផ្នែកដេរនៅរោងចក្រ T&K អ្នកស្រី ភឿន ស្រីមុំ និយាយថា អ្នកស្រីដែលធ្លាប់ចូលរួមក្នុងការធ្វើយុទ្ធនាការតាមប្រព័ន្ធអនឡាញទាមទារឲ្យមានការដំឡើងប្រាក់ឈ្នួលឲ្យបាន២១៤ ដុល្លារកាលពីមុនពេលមិនទាន់មានការបោះឆ្នោតសម្រេចមកម្ល៉េះ។
មកដល់ពេលនេះ អ្នកស្រីនៅរក្សាគោលជំហរ និងឆន្ទៈក្នុងការបន្តធ្វើការចែករំលែកបន្តជាហូរហែនូវសារបង្ហោះ ក៏ដូចជាបដាផ្សេងៗរហូតដល់ក្រុមហ៊ុនបញ្ជាទិញ និងរដ្ឋាភិបាលឲ្យដំឡើងប្រាក់ឈ្នួលទាបបំផុត២១៤ដុល្លារដល់កម្មករក្នុងឧស្សាហកម្មកាត់ដេរ។
អ្នកស្រីប្រាប់វីអូអេថា៖ «ការចំណាយវាច្រើនជាងចំណូលមកវិញ ព្រោះអ្វីដែលយើងចំណាយឲ្យគ្រួសារផង អីផង ហើយយើងទុកខ្លួនយើងហូបចុកផង ហើយឥវ៉ាន់ឡើងថ្លៃគ្រប់សព្វបែបយ៉ាងហើយ អង្ករ ត្រូវការទិញអង្គរទិញអីហូបទៀត អញ្ចឹងវាមិនស្មើនឹងដំឡើងដែលរដ្ឋាភិបាលឲ្យ២ ដុល្លារថែមនឹងហា៎។ »
វីអូអេមិនទាន់អាចទាក់ទងតំណាងអ្នកបញ្ជាទិញធំៗដូចជា H&M និង Adidas បានទេនៅថ្ងៃចន្ទនេះ។
មន្ត្រីកម្មវិធីការងាររបស់មជ្ឈមណ្ឌលសម្ព័ន្ធភាពការងារនិងសិទ្ធិមនុស្សហៅកាត់ថាសង់ត្រាល់លោក ឃុន ថារ៉ូ និយាយថា ប្រាក់ឈ្នួលចំនួន២១៤ ដុល្លារនៅមិនទាន់ដល់កម្រិតមួយគ្រប់គ្រាន់សម្រាប់កម្មករនិយោជិតរស់នៅបានសមរម្យនៅឡើយទេ ប៉ុន្តែក៏អាចជួយបន្ធូរបន្ថយការចំណាយក្នុងបន្ទុកបានខ្លះៗដែរ។
លោកថ្លែងថា៖ «ចឹងការសិក្សាស្រាវជ្រាវតាមយុទ្ធនាការជាសសកល គឺបង្ហាញយ៉ាងច្បាស់ថា បើសិនជាក្រុមហ៊ុនទាំងអស់ហ្នឹង គាត់ចំណាយតែ០.៥០ សេន នៅក្នុងផលិតផល ឬទំនិញ ខោអាវ សម្លៀកបំពាក់តែមួយ ដែលដេរដោយក្រុមហ៊ុនអ្នកបញ្ជាទិញទាំងអស់នឹង គឺប្រាក់ឈ្នួលនឹងអាចដំឡើងដល់កម្មករនិយោជិតនៅក្នុងកម្រិតប្រាក់ឈ្នួលរស់នៅសមរម្យ»។
វិស័យកាត់ដេរសម្លៀកបំពាក់និងស្បែកជើង គឺជាក្បាលម៉ាស៊ីននៃការនាំចេញធំបំផុតលំដាប់ទីមួយរបស់កម្ពុជា។ វិស័យនេះ បានស្រូបយកកម្លាំងពលកម្មប្រមាណជាង៨០ម៉ឺននាក់ដែលភាគច្រើន គឺជាប្រជាពលរដ្ឋមកពីបណ្តាខេត្ត និងជនបទ។ ឧស្សាហកម្មកាត់ដេររបស់ប្រទេសកម្ពុជា បានទទួលរងផលប៉ះពាល់ពីការឆ្លងរាតត្បាតនៃជំងឺកូវីដ១៩មួយផ្នែក និងមួយផ្នែកទៀតដោយសារការបាត់បង់ ២០%នៃប្រព័ន្ធឋានៈអនុគ្រោះពន្ធ EBA របស់សហភាពអឺរ៉ុប កាលពីខែសីហាឆ្នាំ២០២០ ក្រោយការរកឃើញការរំលោភសិទ្ធិមនុស្សធ្ងន់ធ្ងរក្នុងប្រទេស៕