សកម្មជនអ៊ីរ៉ង់ដែលកំពុងជាប់ពន្ធនាគារអ្នកស្រី Narges Mohammadi បានទទួលពានរង្វាន់ណូបែលសន្តិភាពនៅថ្ងៃសុក្រនេះ ក្នុងការប្រយុទ្ធប្រឆាំងនឹងអំពើជិះជាន់លើស្ត្រីក្នុងប្រទេសអ៊ីរ៉ង់។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ប្រធានគណៈកម្មាធិការពានរង្វាន់ណូបែលសន្តិភាពនៃប្រទេសន័រវែស អ្នកស្រី Berit Reiss-Andersen បានប្រកាសពីការទទួលបានពានរង្វាន់នេះ ក្នុងទីក្រុងអូស្លូ ប្រទេសន័រវែសថា៖ «នេះជារង្វាន់ទី ១ និងសំខាន់បំផុតក្នុងការទទួលស្គាល់នូវការងារដែលមានសារៈសំខាន់ខ្លាំងនៃចលនាមួយក្នុងប្រទេសអ៊ីរ៉ង់ ដែលដឹកនាំដោយអ្នកស្រី Nargis Mohammadi»។
ក្រុមអាជ្ញាធរអ៊ីរ៉ង់បានចាប់អ្នកស្រី Mohammadi កាលពីខែវិច្ឆិកាកន្លងទៅ បន្ទាប់ពីអ្នកស្រីចូលរួមនៅក្នុងពិធីរំលឹកខួបជនរងគ្រាះម្នាក់ នៃអំពើហិង្សាដែលបានកើតឡើងក្នុងឆ្នាំ ២០១៩។ អ្នកស្រី Reiss-Andersen បាននិយាយថា អ្នកស្រី Mohammadi ត្រូវបានជាប់ពន្ធនាគារចំនួន ១៣ដង និងត្រូវបានកាត់ទោសចំនួន ៥ដង។ អ្នកស្រីមានទោសសរុបជាប់ក្នុងពន្ធនាគារចំនួន ៣១ឆ្នាំ។
អ្នកស្រី Mohammadi ជាស្ត្រីទី ១៩ ដែលទទួលបានជ័យលាភីរង្វាន់ណូបែលសន្តិភាព និងជាស្ត្រីជនជាតិអ៊ីរ៉ង់ទី ២ បន្ទាប់ពីសកម្មជនសិទ្ធិមនុស្សអ្នកស្រី Shirin Ebadi ដែលបានទទួលរង្វាន់នេះ កាលពីឆ្នាំ ២០០៣។
អ្នកស្រី Mohammadi ត្រូវបានចាប់ដាក់ពន្ធនាគារ ក្នុងការចូលរួមធ្វើបាតុកម្មប្រឆាំងតវ៉ានៅទូទាំងប្រទេសកាលពីពេលថ្មីៗនេះក្នុងប្រទេសអ៊ីរ៉ង់ ជុំវិញការស្លាប់របស់នាង Mahsa Amini វ័យ២២ឆ្នាំ ដែលបានស្លាប់ ក្រោយពីត្រូវបានចាប់ឃុំដោយក្រុមប៉ូលិសសីលធម៌អ៊ីរ៉ង់មក៕