កវីជាតិអាមេរិកាំងលោកស្រី Louise Glück បានទទួលរង្វាន់ណូបែលខាងអក្សរសាស្ត្រ។
បណ្ឌិតសភាស៊ុយអែតបានសរសើរសំឡេងកំណាព្យដ៏ច្បាស់លាស់ជាមួយនឹងសោភ័ណភាពសាមញ្ញ បង្កើតជាលក្ខណ:ទូទៅរបស់មនុស្សលោករបស់លោកស្រី Glück។
លោកស្រី Glück បានបោះពុម្ភផ្សាយកំណាព្យចំនួន ១២ ហើយរង្វាន់កិត្តិយសកាលពីមុនរបស់លោកស្រីមាន Pulitzer និងរង្វាន់ National Book Award។
រង្វាន់ណូបែលខាងអក្សរសាស្ត្រទើបតែបានផ្តល់ឲ្យនៅសប្តាហ៍នេះ។ រង្វាន់នីមួយៗមានទឹកប្រាក់ចំនួន ១ លាន ១ សែនដុល្លារ។ នៅថ្ងៃសុក្រនេះ នឹងមានការប្រកាសរង្វាន់ណូបែលសន្តិភាព។
រង្វាន់ណូបែលខាងគីមីបានត្រូវប្រគល់ជូនអ្នកវិទ្យាសាស្ត្រ ២ នាក់ចំពោះការបង្កើតនូវវិធីកែសម្រួលហ្ស៊ែន។ អ្នកវិទ្យាសាស្ត្រ ៣ រូប បានទទួលរង្វាន់ណូបែលខាងរូបវិទ្យា ចំពោះការរកឃើញរបស់ពួកគេ ទាក់ទិននឹងចក្រវាល។
អ្នកវិទ្យាសាស្ត្រ ៣ នាក់ទៀត បានទទួលរង្វាន់ណូបែលខាងវេជ្ជសាស្ត្ររួមគ្នាចំពោះការរកឃើញវីរុសជំងឺថ្លើមប្រភេទ C៕
