ជារៀងរាល់ឆ្នាំ ប្រទេសចិននិងស.រ.អា.ធ្វើកិច្ចចរចាកម្រិតខ្ពស់ដ៏ទូលំទូលាយដែលមានគោលដៅដោះស្រាយបញ្ហាជាច្រើនចាប់តាំងពីភាពតានតឹងក្នុងសមុទ្រចិនខាងត្បូងឬនៅលើឧបទ្វីបកូរ៉េ រហូតដល់ឧបសគ្គនៃការបណ្តាក់ទុន។
ពួកមន្ត្រីស.រ.អា.បាននិយាយថា កិច្ចចរចាទាំងនេះប្រៀបដូចជាប្រដាប់ធ្វើឱ្យមានស្ថិរភាពមួយដែលជាទ្រនាប់នៃទំនាក់ទំនងធំទូលាយជាងមុនហើយក៏ជារបៀបទប់ទល់កុំឱ្យមានការរខិតទៅរកភាពសៅហ្មងជាមួយគ្នាផងដែរ។
ក៏ប៉ុន្តែទោះជាយ៉ាងណាក៏ដោយ ក៏ក្រុមការពារសិទ្ធិមនុស្សនិងពួកសកម្មជនបាននិយាយបង្ហាញហេតុផលថា មានប្រធានបទមួយដែលអាចនាំឱ្យមានការផ្តោតការយកចិត្តទុកដាក់ច្រើនជាងមុននៅក្នុងការប្រជុំប្រចាំឆ្នាំ នោះគឺបញ្ហាសិទ្ធិមនុស្ស។
នៅមុនការប្រជុំនៅឆ្នាំនេះចាប់ផ្តើមធ្វើ អង្គការអ្នកកាសែតគ្មានព្រំដែននិងក្រុមការពារសិទ្ធិមនុស្ស៩ក្រុមទៀតបានបញ្ជូនលិខិតរួមគ្នាមួយច្បាប់ជូនទៅលោករដ្ឋមន្ត្រីការបរទេសស.រ.អា. John Kerry និងលោក Jack Lew រដ្ឋមន្ត្រីក្រសួងហិរញ្ញវត្ថុស.រ.អា. ដោយបានអំពាវនាវឱ្យមានវិធានការអំពីបញ្ហានេះ។
លិខិតនេះបានកត់សម្គាល់អំពីកិច្ចខិតខំប្រឹងប្រែងដែលស.រ.អា.ដែលបានធ្វើរួចហើយដើម្បីដោះស្រាយអ្វីដែលសំបុត្រនេះហៅថា«ការចុះថមថយខាងសិទ្ធិមនុស្ស»និងខាងវិធាននៃច្បាប់ដែលមានប្រមូលជាឯកសារចាប់តាំងពីលោក Xi Jinping បានក្លាយជាប្រធានាធិបតីនៃប្រទេសចិន។ ការណ៍នេះមានរួមបញ្ចូលការកោះហៅប្រទេសចិនឱ្យឆ្លើយនៅក្នុងការប្រជុំនៃក្រុមប្រឹក្សាសិទ្ធិមនុស្សរបស់អ.ស.ប.ក្នុងខែមីនាអំពីប្រវត្តិសិទ្ធិមនុស្សរបស់ខ្លួន។
ក្រុមទាំងនេះបានសុំថា នៅក្នុងការប្រជុំទាំងនេះ ពួកមន្ត្រីស.រ.អា.មិនគួរនិយាយតែអំពីករណីពិសេសនៃកង្វល់ទេ ក៏ប៉ុន្តែគួរជួបជាមួយពួកអ្នកការពារសិទ្ធិមនុស្សនិងពួកអ្នកតំណាងនៃសង្គមស៊ីវិលនៅក្នុងការប្រជុំទាំងនោះផងដែរ ដូចដែលលោកប្រធានាធិបតី បារ៉ាក់ អូបាម៉ា បានធ្វើកាលពីពេលថ្មីៗនេះនៅក្នុងប្រទេសវៀតណាម៕