ភ្ជាប់​ទៅ​គេហទំព័រ​ទាក់ទង

លោក Admiral Sun ប្តេជ្ញាថា ប្រទេសចិនមិនផ្តាច់ខ្លួនឡើយ


លោក Admiral Sun ស្តាប់បទបង្ហាញក្នុងជំនួបញាុំអាហារនាការសម្ភោធវិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រលើកទី ១៥

មន្រ្តីយោ​ធា​ជាន់​ខ្ពស់​ម្នាក់​របស់​ចិន ​បាន​ច្រាន​ចោល​នៅ​ថ្ងៃ​អាទិត្យ​នេះ​នូវ​ការ​ពោល​អះអាង​របស់​លោករដ្ឋ​មន្រ្តី​ការ​ពារ​ប្រទេស​សហរដ្ឋ​អាមេរិកដែល​បាន​ធ្វើ​ឡើង​កាល​ពី​មួយ​ថ្ងៃ​មុនថា ​រដ្ឋាភិបាល​ទីក្រុង​ប៉េកាំង​កំពុង​កសាង​មហា​កំពែង​មួយ​ទៀ​ត​ដើម្បី​ផ្តាច់​ខ្លួនពី​ពិភពលោក ​ប្រសិនបើ​ខ្លួន​បន្ត​សកម្មភាពយោ​ធា​នៅ​ក្នុង​ប្រ​ជុំ​កោះ​មាន​ជម្លោះ​ក្នុង​សមុទ្រ​ចិន​ខាង​ត្បូង។

ឧត្តមនាវី Sun Jianguo នៃ​កងទ័ព​រំដោះ​ប្រជា​ជន​ចិន ​បាន​និយាយ​ស៊ក​សម្តី​ថា «យើងមិន​បាន​ធ្វើឲ្យ​ខ្លួនយើងឯកោ​កាល​ពី​អតីត​កាល យើង​មិន​ធ្វើ​ឲ្យ​ខ្លួន​យើង​ឯកោ​នៅ​ពេលឥឡូវនេះ ហើយ​យើង​នឹងមិន​ធ្វើ​ឲ្យ​ខ្លួន​យើង​ឯកោ​នៅ​ពេល​អនាគត​ទេ‍»។

លោក Sun ដែល​ជានាយក​អគ្គ​សេនា​ធិការ​រង​នៃ​កងទ័ព​រំដោះ​ប្រជា​ជន​ចិន បាន​ដាក់​ការស្តី​បន្ទោស​ទៅ​លើ​សហរដ្ឋ​អាមេរិកចំពោះ​ការតានតឹងផ្លូវ​នាវា​ចរណ៍​នៅ​ក្នុង​តំបន់។លោក ​បាន​រិះគន់​ថា កិច្ច​ប្រតិបត្តិការ​នៃ​ការ​ធ្វើ​នាវាចរណ៍​ដោយ​សេរី​របស់​យោ​ធា​សហរដ្ឋ​អាមេរិក​និង​ការ​គាំទ្រ​របស់រដ្ឋាភិបាល​ទីក្រុង​វ៉ាស៊ីន​តោន​ដល់​ប្រទេស​នានា​នៅ​ក្នុង​តំបន់ ​បាន​ធ្វើ​ឲ្យ​មានជម្លោះ​ទឹក​ដី​ជាមួយ​រដ្ឋាភិបាល​ទីក្រុង​ប៉េកាំង។

លោក Sunនិយាយបន្ត​ទៀត​ថា ប្រទេស​នានា​ដែល​មាន​គំនិត​សម័យ​សង្គ្រាម​ត្រជាក់មិន​ត្រូវ​ពាក់​ព័ន្ធដោយ​ផ្ទាល់​នៅ​ក្នុង​ជម្លោះហើយ​មិន​ត្រូវ​អនុញ្ញាតឲ្យចូល​រួម​នៅ​ក្នុង​ការ​បំផ្លិច​បំផ្លាញ​ដើម្បី​ប្រយោជន៍​ផ្ទាល់​ខ្លួន​ឡើយ។ «​គ្មាន​នរណា​ម្នាក់ ​មាន​សិទ្ធិ​ចោទ​ប្រកាន់​ចិន​នោះទេ»។

នៅឯវេទិកា​ដដែល​នោះ​នៅ​ក្នុង​ប្រទេស​សឹង្ហបូរី​កាល​ពី​ថ្ងៃ​សៅរ៍ លោករដ្ឋ​មន្រ្តី​ការ​ពារ​ប្រទេស​សហរដ្ឋអាមេរិកAsh Carter បាន​ប្រាប់អស់​លោករដ្ឋ​មន្រ្តី​ការ​ពារ​ប្រទេស ​ពួក​អ្នក​វិភាគ​និង​អ្នកស្រាវ​ជ្រាវ​ថា ​មានការ​ព្រួយ​កង្វល់​កាន់​តែ​ខ្លាំងឡើង​អំពី​សកម្ម​ភាព​របស់​ចិន​នៅ​ក្នុង​ផ្ទៃ​ទឹក​យុទ្ធសាស្រ្ត​និង​ទី​កន្លែង​ផ្សេង​ទៀត។

លោករដ្ឋ​មន្រ្តីការ​បរទេស​សហរដ្ឋ​អាមេរិក John Kerry ​ដែល​ថ្លែង​ទៅ​កាន់​ពួក​អ្នក​យក​ព័ត៌មាននៅ​ក្នុង​ប្រទេស​ម៉ុងហ្គោលី​នៅ​ថ្ងៃ​អាទិត្យ​ថា ​រដ្ឋាភិបាល​ទីក្រុង​វ៉ាស៊ីនតោន ​នឹង​ពិចារណា​ការ​បង្កើតតំបន់​ការពារដែន​អាកាស​លើ​សមុទ្រ​ចិន​ខាង​ត្បូង​ជាសកម្ម​ភាព​បង្កហេតុ​និង​ធ្វើ​ឲ្យ​មាន​អស្ថេរភាព៕

XS
SM
MD
LG