ប្រធានាធិបតីនៃប្រទេសម៉ិកស៊ិកបាននិយាយនៅថ្ងៃសុក្រនេះថា ការរង្គើផែនដីដែលបានធ្វើឱ្យផ្ទះរលំនៅក្នុងរដ្ឋ Chiapas នាផ្នែកខាងត្បូងប្រទេសកាលពីយប់ថ្ងៃព្រហស្បតិ៍និងបានធ្វើឱ្យមនុស្ស៥នាក់ស្លាប់ ដែលនេះជាការរង្គើផែនដីខ្លាំងបំផុតដែលបានកើតមានឡើងក្នុងប្រទេសនេះក្នុងរយៈពេល១០០ឆ្នាំ។
លោកបានថ្លែងថា វាខ្លាំងជាងការរង្គើផែនដីមួយកាលពីឆ្នាំ១៩៨៥ដែលបានបណ្តាលឱ្យមនុស្សរាប់ពាន់នាក់បាត់បង់ជីវិត។
លោក Enrique Pena Nieto បានមានប្រសាសន៍ថា ការរញ្ជួផែនដីនេះមានកម្លាំង៨,២រិចទ័រ ដោយខ្ពស់បន្តិចជាងកម្លាំង៨,១ដែលបានត្រូវកំណត់ដោយមន្ទីរ ភូគម្ភសាស្ត្រស.រ.អា. (U.S. Geological Survey)។
លោកប្រធានាធិបតីនៃប្រទេសម៉ិកស៊ិក បាននិយាយថា «វាជាការរង្គើផែនដីខ្លាំងមួយ។ វាមានកម្លាំងខ្លាំងជាងការរង្គើផែនដីមួយដែលប្រជារាស្ត្រម៉ិកស៊ិក បានជួបប្រទះកាលពីឆ្នាំ១៩៨៥។"
បើតាមមជ្ឈមណ្ឌលដែលប្រាប់ឲ្យដឹងអំពីមហារលកស៊ូណាមី ក្នុងមហាសមុទ្រ ប៉ាស៊ីហ្វិក បានឲ្យដឹងថា ការរង្គើផែនដីនេះបានបណ្តាលឱ្យមានរលកស៊ូណាមី មួយមានរលកសមុទ្រកម្ពស់១ម៉ែត្រ។ គ្មានការអះអាងជាបន្ទាន់អំពីការខូចខាតបណ្តាលមកពីរលក់យក្សនេះទេ។
លោក Rodrigo Soberanes ដែលរស់នៅជិតតំបន់ San Cristobal de las Casas ក្នុងរដ្ឋ Chiapas បាននិយាយប្រាប់ទីភ្នាក់ងារព័ត៌មាន Associated Press ថាផ្ទះលោករង្គើដូចស្ករកៅស៊ូ។
លោក Manuel Velasco អភិបាលរដ្ឋ Chiapas បាននិយាយនៅក្នុងសេចក្តីសម្ភាសន៍មួយតាមទូរទស្សន៍ថា «ផ្ទះ សាលារៀននិងមន្ទីរពេទ្យមានផលប៉ះពាល់«ដោយសារការរង្គើផែនដីនេះ។
ពួកអ្នកស្រុកក្នុងក្រុង Mexico City និងក្រុង Guatemala City បានដឹងអំពីការរង្គើផែនដីនេះ។ ក្រុមប្រជារាស្ត្រក្នុងរដ្ឋធានីនៃប្រទេសម៉ិកស៊ិក បានរត់ចេញពីផ្ទះទៅកាន់ថ្នល់ ហើយជាច្រើននាក់ឋិតក្នុងសម្លៀកបំពាក់រាត្រី ដោយភ័យខ្លាចថាអាគាររលំ៕