អ្នកវិភាគនយោបាយសង្គម លោក គឹម សុខ និងកូនស្រីរបស់លោកម្នាក់ទៀតអាយុ៦ឆ្នាំបានភៀសខ្លួនដល់ទីមានសុវត្ថិភាពហើយកាលពីថ្ងៃទី៣០ ខែសីហាកន្លងទៅ។ នេះបើតាមប្រភពនៅក្នុងបណ្តាញសង្គមហ្វេសប៊ុកដែលគួរឲ្យទុកចិត្តតែមិនទាន់មានការបញ្ជាក់ពីលោក គឹម សុខ ផ្ទាល់។
ការភៀសខ្លួនរបស់អ្នកវិភាគសង្គមរូបនេះធ្វើឡើងក្រោយពេលលោក ហ៊ុន សែន បានគំរាមចាប់ខ្លួនលោកឡើងវិញ ប្រសិនបើអ្នកវិភាគរូបនេះ នៅតែហ៊ាននិយាយរិះគន់របបក្រុងភ្នំពេញតទៅទៀតនោះ។
លោក គឹម សុខ ត្រូវបានតុលាការនៃរបបលោក ហ៊ុន សែន ដោះលែងឲ្យមានសេរីភាពកាលពីថ្ងៃទី១៧ ខែសីហា ក្រោយពីលោកជាប់ពន្ធនាគារអស់រយៈពេល១៨ខែ គ្រប់អាជ្ញាយុកាលដោយសារ លោក ហ៊ុន សែន ប្តឹងរូបលោកថា បានចោទគណបក្សប្រជាជនកម្ពុជាជាអ្នកនៅពីក្រោយឃាតកម្មបាញ់សម្លាប់លោកបណ្ឌិត កែម ឡី។
ប៉ុន្តែលោក គឹម សុខ នៅជាប់ក្នុងសំណុំរឿងមួយទៀតពីការចោទថា រដ្ឋាភិបាលលោក ហ៊ុន សែនបង្កើតប្រព័ន្ធសម្លាប់មនុស្ស តែរកឃាតកមិនឃើញ។
លោក ហ៊ុន សែន កាលពីថ្ងៃទី២៩ខែសីហា អះអាងថា លោក គឹម សុខ នៅមិនទាន់បង់ប្រាក់សំណងចំនួន៨០០លានរៀល ឬស្មើនឹងប្រមាណ២០ម៉ឺនដុល្លារអាមេរិកឲ្យគណបក្សកាន់អំណាចនៅឡើយទេ ក្រោយពេលចេញពីពន្ធនាគារក្នុងសំណុំរឿងទីមួយនោះ។
ជាការឆ្លើយតបលោក គឹម សុខ បានសរសេរនៅលើគណនីហ្វេសប៊ុករបស់លោកថា លោកគ្មានលុយសងលោក ហ៊ុន សែន នោះទេ គឺមានតែបេះដូងស្នេហាជាតិមួយប៉ុណ្ណោះ ហើយបើលោកហ៊ុន សែនចង់បានបេះដូងរបស់លោកទៀតនោះ គឺមានតែបញ្ជាឲ្យសភាឯកបក្សថ្មីរបស់លោកធ្វើច្បាប់ថ្មីមួយដើម្បីវះកាត់យកបេះដូងរបស់លោកទៅ៕