សកម្មជន និងពលរដ្ឋរាប់រយនាក់នៅក្នុងទីក្រុងហុងកុងបានប្រារព្ធខួបមួយឆ្នាំនៃចលនាប្រឆាំងរដ្ឋាភិបាលនៅក្នុងទីក្រុងនេះ ដោយបានធ្វើការតវ៉ានៅតាមផ្សារទំនើប ៧ កន្លែង នៅទូទាំងទីក្រុងនៅថ្ងៃអង្គារនេះ។
ក្រុមបាតុករបានស្រែកបន្ទោរពាក្យស្លោកប្រជាធិបតេយ្យនានា និងបានលើកបដាដែលមានសរសេរអក្សរថា «ឯករាជ្យហុងកុង» និង «ដោះលែងហុងកុង បដិវត្តន៍បច្ចុប្បន្ន»។ ក្រុមអ្នកតវ៉ាក៏បានច្រៀងបទ «ភាពរុងរឿងដល់ហុងកុង» ដែលជាភ្លេងជាតិមិនផ្លូវការនៃចលនាតវ៉ានេះ។
បុរសអាយុ ៥៣ ឆ្នាំម្នាក់ ដែលចូលរួមនៅក្នុងការតវ៉ានេះ បាននិយាយថា៖ «ខ្ញុំមក ដោយសារតែមានការឈឺចាប់។ យុវជនបានរួមចំណែកច្រើនណាស់ក្នុងចលនានេះ។ ពួកគេធ្វើដូច្នេះមិនមែនសម្រាប់ខ្លួនពួកគេទេ ប៉ុន្តែសម្រាប់ទីក្រុងហុងកុង និងសម្រាប់យុត្តិធម៌»។
ដោយសារតែសំណើច្បាប់សន្តិសុខជាតិថ្មីរបស់ចិនសម្រាប់ទីក្រុងហុងកុង មនុស្សជាច្រើនបាននិយាយថា ពួកគេនឹងមិនបញ្ឈប់ការតវ៉ានោះទេ ប៉ុន្តែនឹងធ្វើឡើងដោយប្រយ័ត្នប្រយែង។ សំណើច្បាប់សន្តិសុខថ្មីនេះត្រូវគេរំពឹងថានឹងអនុម័តនៅពេលប៉ុន្មានខែខាងមុខ៕