តុលាការឧក្រិដ្ឋកម្មអន្តរជាតិហៅកាត់ថា ICC បានកាត់ទោសអតីតអនុប្រធានាធិបតីសាធារណរដ្ឋប្រជាធិបតេយ្យកុងហ្គោ ឈ្មោះ Jean-Pierre Bemba ឱ្យជាប់គុក១៨ឆ្នាំ ដោយសារលោកបានដឹកនាំយុទ្ធនាការមួយនៃការចាប់រំលោភសេពសន្ថវៈ និងការសម្លាប់មនុស្សនៅក្នុងសាធារណរដ្ឋអាហ្វ្រិកកណ្តាលដែលនៅជិតខាងប្រទេសកុងហ្គោ។
លោកស្រី Sylvia Steiner នៃប្រទេសប្រស៊ីល ដែលជាចៅក្រមតុលាការ ICC បានមានប្រសាសន៍ថា លោក Bemba មិនអាចត្រួតត្រាកងទ័ពឯកជនរបស់លោកដែលកាលពីឆ្នាំ២០០២ និងឆ្នាំ២០០៣ បានរំលោភសេពសន្ថវៈ«យ៉ាងសប្បាយប្រកបដោយភាពឃោរឃៅ» ហើយពួកគេបានសម្លាប់មនុស្ស និងបានឆក់ប្លន់បំផ្លិចបំផ្លាញយ៉ាងព្រៃផ្សៃ»។
កាលពីខែមីនា លោក Bemba បានក្លាយទៅជាមនុស្សទីមួយដែលបានត្រូវកាត់ក្តីឱ្យជាប់ទោសដោយតុលាការនេះ ពីបទប្រព្រឹត្តឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងនឹងមនុស្សជាតិ។ នេះជាលើកដំបូងហើយដែលតុលាការ ICC បានចេញផ្សាយការផ្តន្ទាទោសអំពីការរំលោភសេពសន្ថវៈថា ជាឧក្រិដ្ឋកម្មសង្គ្រាមមួយនិងជាឧក្រិដ្ឋកម្មមួយប្រឆាំងនឹងមនុស្សជាតិ។ តុលាការអន្តរជាតិឯទៀតៗដូចជាតុលាការអ.ស.ប.នៅក្នុងប្រទេសរវ៉ាន់ដា (Rwanda) និងអតីតប្រទេសយូហ្គោស្វាវី (Yougoslavia) ក៏ធ្លាប់បានកាត់ទោសដោយបទឧក្រិដ្ឋដូចគ្នានេះដែរ។
លោក Bemba ក៏ជាមនុស្សទីមួយដែលបានត្រូវដាក់ឲ្យទទួលខុសត្រូវដោយផ្ទាល់ដោយសារឧក្រិដ្ឋកម្មរបស់ពួកជននៅក្រោមបង្គាប់របស់លោក។
ចលនារំដោះប្រទេសកុងហ្គោរបស់លោក Bemba ហៅកាត់ថា MLC បានចូលទៅក្នុងសាធារណរដ្ឋអាហ្វ្រិកកណ្តាលដើម្បីជួយកងកម្លាំងរបស់លោក Ange-Felix Patasse ដែលនៅពេលនោះកាន់តំណែងជាប្រធានាធិបតីនៃសាធារណរដ្ឋអាហ្វ្រិកកណ្តាលក្នុងការប្រយុទ្ធប្រឆាំងនឹងចលនាឧទ្ទាមមួយ។
លោកស្រីចៅក្រម Steiner ដែលបានអានសាលក្រមកាលពីខែមីនា បានមានប្រសាសន៍ថា ពួកយុទ្ធជននៃចលនា MLC បានយកជនស៊ីវិលនៅទូទាំងសាធារណរដ្ឋអាហ្វ្រិកកណ្តាលធ្វើជាទីដៅនៃការវាយប្រហារដោយចេតនាហើយថាជនរងគ្រោះមានរួមបញ្ចូលទាំងស្ត្រី កុមារ និងជនចាស់ជរាផងដែរ៕