បន្ទាប់ពីជួបជុំពិភាក្សាគ្នាយ៉ាងស្វិតស្វាញចំនួន៦លើក តាំងពីចុងខែសីហាមក ភាគីពាក់ព័ន្ធនានាបានសម្រេចដំឡើងប្រាក់ខែគោលដល់កម្មករកម្មការនីរោងចក្រនៅកម្ពុជាចំនួនដល់ចំនួន១៩០ដុល្លារក្នុងមួយខែ។ រដ្ឋាភិបាលនិងតំណាងក្រុមថៅកែរោងចក្រអះអាងថា កម្មកររោងចក្រអាចនឹងទទួលប្រាក់ខែច្រើនជាងប្រាក់ខែគោលរបស់ពួកគេ ពោលគឺរហូតដល់២០៧ដុល្លារឬ២៦០ដុល្លារដោយបូកផ្សំជាមួយប្រាក់អត្ថប្រយោជន៍ផ្សេងៗ។ ប៉ុន្តែតំណាងសហជីពមិនទាន់ពេញចិត្តនឹងការដំឡើងប្រាក់ខែនេះទេ។
សម្រាប់ឆ្នាំ២០២០ខាងមុខនេះ កម្មករដែលកំពុងបម្រើការក្នុងវិស័យវាយនភណ្ឌដែលរួមមានផ្នែក កាត់ដេរសម្លៀកបំពាក់ និងស្បែកជើងនឹងទទួលបានប្រាក់ខែគោលចំនួន១៩០ដុល្លារអាមេរិកក្នុងមួយខែ។ ពោលគឺច្រើនជាងប្រាក់ខែគោលក្នុងឆ្នាំ២០១៩ ចំនួនប្រាំបីដុល្លារ។
យោងតាមសេចក្តីប្រកាសព័ត៌មានរបស់ក្រសួងការងារនិងបណ្តុះបណ្តាលវិជ្ជាជីវៈក្រុមប្រឹក្សាជាតិប្រាក់ឈ្នួលអប្បបរមា តំណាងសហជីពកម្មករ តំណាងភាគីនិយោជក និងក្រសួងការងារនិងបណ្តុះបណ្តាលវិជ្ជាជីវៈ បានបោះឆ្នោតកំណត់ប្រាក់ឈ្នួលអប្បបរមាខាងលើសម្រាប់កម្មករកម្មការនីនៅព្រឹកថ្ងៃសុក្រនេះ ក្រោយពីភាគីទាំងបួនបានចរចាគ្នាយ៉ាងស្វិតស្វាញចាប់តាំងពីខែសីហាមក។
សេចក្តីប្រកាសព័ត៌មានដដែលគូសបញ្ជាក់ថា ក្នុងប្រាក់ឈ្នួលទាបបំផុតសម្រាប់ក្រុមកម្មករកម្មការនីចំនួន១៩០ដុល្លារនេះ មានបីដុល្លារគឺជាជំនួយពីខាងភាគីរដ្ឋាភិបាល។
សេចក្តីប្រកាសព័ត៌មានដដែលបន្តថា ដោយបូកផ្សំជាមួយប្រាក់អត្ថប្រយោជន៍ផ្សេងៗដូចជា
ប្រាក់ថ្លៃបាយ ប្រាក់សោហ៊ុយថ្លៃធ្វើដំណើរ ប្រាក់ស្នាក់នៅនិងប្រាក់រង្វាន់ការងារ កម្មករកម្មការនីម្នាក់ៗអាចទទួលបានប្រាក់ខែជាមធ្យមទាបបំផុតពី២០៧ដុល្លារដល់២១៨ដុល្លារក្នុងមួយខែនៅឆ្នាំក្រោយ។
ប៉ុន្តែ លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា ហៅកាត់ថា GMAC បានអះអាងប្រាប់ VOA នៅថ្ងៃនេះដែរថា កម្មករកម្មការនី រោងចក្រនៅកម្ពុជាអាចនឹងទទួលប្រាក់ខែទាបបំផុតជាមធ្យមក្នុងរង្វង់២៦០ដុល្លារអាមេរិក ក្នុងមួយខែ ប្រសិនបើបូករួមនឹងប្រាក់អត្ថប្រយោជន៍ផ្សេងៗនិងប្រាក់បន្ថែមម៉ោងការងារ។
ទោះយ៉ាងណាលោក អាត ធន់ ប្រធានសហភាពការងារកម្ពុជា មិនពេញចិត្តចំពោះតួលេខនេះឡើយ។
«មូលហេតុដែលយើងអត់ពេញចិត្តនៅលទ្ធផលនេះដោយសារតែស្ថានភាពសេដ្ឋកិច្ចក៏ដូចជាស្ថានភាពនៅក្នុងសង្គមនៅមានសក្តានុពលច្រើនដែលអាចតំឡើងប្រាក់ឈ្នួលហ្នឹងបានច្រើនជាងនេះ»។
លោកហេង សួ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានប្រាប់VOAនៅព្រឹកថ្ងៃសុក្រនេះ ថាតួលេខដែលត្រូវបានកំណត់នេះគឺភាគីពាក់ព័ន្ធវាយតម្លៃផ្អែកលើស្ថានភាពសេដ្ឋកិច្ចជាក់ស្តែងរួចហើយ។
«ហើយមុននឹងឈានទៅដល់នេះគឺភាគីពាក់ព័ន្ធទាំងសងខាង គឺភាគីកម្មករនិយោជិតនិងភាគីនិយោជកគឺបានពិនិត្យយ៉ាងល្អិតល្អន់ទៅលើលក្ខណៈវិនិច្ឆ័យដែលរួមមានការប្រកួតប្រជែង ការបម្រែបម្រួលនៃតម្លៃទំនិញហើយនិងផលិតភាពផងដែរ»។
វិស័យកាត់ដេរសម្លៀកបំពាក់និងស្បែកជើងគឺជាក្បាលរថភ្លើងនៃការនាំចេញធំបំផុតលំដាប់ទី១របស់កម្ពុជា។ កាលពីឆ្នាំ២០១៨ ការនាំចេញសម្លៀកបំពាក់និងស្បែកជើងរបស់កម្ពុជាមានទំហំ១០ ពាន់លានដុល្លារអាមេរិក។ វិស័យនេះបានស្រូបយកកម្លាំងពលកម្មប្រមាណជាង៧០ម៉ឺននាក់ ដែលភាគច្រើនគឺជាប្រជាពលរដ្ឋមកពីបណ្តាខេត្តនិងជនបទ។
ទីផ្សារសំខាន់របស់វិស័យវាយនភណ្ឌនេះគឺនាំចេញសម្រាប់សហភាពអឺរ៉ុប ដែលជាទីផ្សារធំទី១ និងសម្រាប់អាមេរិក ដែលជាទីផ្សារធំលំដាប់ទី២។ ក៏ប៉ុន្តែក្នុងពេលថ្មីៗនេះវិស័យនេះកំពុងរងការគំរាមពីការកាត់ផ្តាច់ពន្ធអនុគ្រោះពីអឺរ៉ុបនិងពីសហរដ្ឋអាមេរិក ដែលអាចធ្វើឲ្យវិស័យនេះខាតបង់ផលប្រយោជន៍ពីការអនុគ្រោះពន្ធយ៉ាងតិច៧០០លានដុល្លារអាមេរិកក្នុងមួយឆ្នាំ។
ការគំរាមពីការកាត់ផ្តាច់ពន្ធអនុគ្រោះគឺដោយសារស្ថានភាពនយោបាយនិងសិទ្ធិមនុស្សនៅកម្ពុជា៕