សមាគមថៅកែរោងចក្រកាត់ដេរកម្ពុជា ហៅកាត់ថា GMAC បានអំពាវនាវឲ្យសហភាពអឺរ៉ុប ពិចារណាជាថ្មីម្តងទៀត ចំពោះការព្យួរការអនុគ្រោះពន្ធសម្រាប់នាំទំនិញពីកម្ពុជាទៅកាន់ទ្វីបអឺរ៉ុប ដោយព្រមានថា ការព្យួរការអនុគ្រោះពន្ធលើទំនិញសព្វសារពើលើកលែងតែអាវុធ (EBA) នឹងធ្វើឲ្យកម្មកររោងចក្ររាប់សែននាក់បាត់បង់ការងារ និងក្រុមគ្រួសាររបស់ពួកគេប្រមាណបីលាននាក់ត្រូវរងផលប៉ះពាល់។
ការអំពាវនាវរបស់ក្រុមថៅកែរោងចក្រ ធ្វើឡើងចំពេលដែលសហភាពអឺរ៉ុបត្រូវបញ្ចប់ការពិនិត្យលទ្ធភាពព្យួរEBA ដល់កម្ពុជានៅថ្ងៃចន្ទ័ទី១២ខែសីហា ក្រោយពីធ្វើការសិក្សាលើលទ្ធភាពព្យួរការអនុគ្រោះពន្ធនាំទំនិញពីកម្ពុជាចូលសហភាពអឺរ៉ុបនេះអស់រយៈពេលប្រាំមួយខែ។
នៅក្នុងសេចក្តីប្រកាសព័ត៌មានរបស់ខ្លួនកាលពីថ្ងៃចន្ទ GMAC លើកឡើងថា «GMAC សុំធ្វើការអំពាវនាវម្តងទៀតដល់សមាជិកសភានិងមន្ត្រីសហភាពអឺរ៉ុបនិងភាគីពាក់ព័ន្ធ ទាំងអស់នៅក្នុងសហភាពអឺរ៉ុបថា ការព្យួរផលប្រយោជន៍ EBA សម្រាប់វិស័យ (កាត់ដេរ) របស់យើង នឹងបង្កឲ្យបាត់បង់ការងារកម្មករទ្រង់ទ្រាយធំ ក្នុងវិស័យកាត់ដេរសម្លៀកបំពាក់ វិស័យដេរស្បែកជើង និងប៉ះពាល់ដល់កម្លាំងពលកម្ម។ ហើយការព្យួរEBA នេះនឹងមិនបម្រើដល់គោលបំណងនៃកម្មវិធីលុបបំបាត់ភាពក្រីក្រ និងការអភិវឌ្ឍប្រកបដោយចីរភាពនោះទេ»។
សមាគមក្រុមថៅកែរោងចក្រក៏បានគូសបញ្ជាក់ថា កម្មករចំនួន៧៥ម៉ឺននាក់អាចនឹងជួបវិបត្តិអត់ការងារធ្វើ។ ហើយក្រុមគ្រួសាររបស់ពួកគេចំនួន៣លាននាក់ នឹងទទួលរងផលប៉ះពាល់ ប្រសិនបើសហភាពអឺរ៉ុបសម្រេចព្យួរការអនុគ្រោះពន្ធនាំទំនិញពីកម្ពុជានោះ។
ក្នុងសេចក្តីប្រកាសព័ត៌មានដដែល GMAC បានបន្ថែមថា វាជាលទ្ធផល «គួរឲ្យទុក្ខព្រួយ និងសោកស្តាយ» សម្រាប់ខ្លួន និងក្រុមកម្មកររោងចក្រដែលបានធ្វើកិច្ចការជាច្រើនដើម្បីជំរុញតួនាទីរបស់អង្គការពលកម្មអន្តរជាតិក្នុងការឃ្លាំមើលការអនុវត្តការងារបានត្រឹមត្រូវ នៅក្នុងប្រទេសកម្ពុជា។
វិស័យវាយនភ័ណ្ឌដែលរួមមានរោងចក្រសម្លៀកបំពាក់និងរោងចក្រផលិតស្បែកជើងជាដើម គឺជាឧស្សាហកម្មនាំចេញឈានមុខគេនៅកម្ពុជា។ កាលពីឆ្នាំ២០១៨កន្លងទៅការនាំចេញផ្នែកវាយនភ័ណ្ឌរបស់កម្ពុជា មានទំហំសរុប១០ពាន់លានដុល្លារអាមេរិក។ ហើយវិស័យនេះស្រូបយកកម្លាំងពលកម្មយ៉ាងតិចចំនួន៨០ម៉ឺននាក់។ពួកគេភាគច្រើនគឺជាស្ត្រីមកពីជនបទ។
កាលពីខែកុម្ភៈ ឆ្នាំ២០១៩កន្លងទៅនេះ គណៈកម្មការសហភាពអឺរ៉ុបចាប់ផ្តើមដំណើរការពិនិត្យលើ លទ្ធភាពព្យួរជាបណ្តោះអាសន្ននូវឋានៈអនុគ្រោះពន្ធពាណិជ្ជកម្ម EBA ចំពោះប្រទេសកម្ពុជា ដោយសារតែការធ្លាក់ចុះនៃការគោរពសិទ្ធិមនុស្ស និងការអនុវត្តលទ្ធិប្រជាធិបតេយ្យ។
សហគមន៍អឺរ៉ុបបានផ្តល់ហេតុផលនៃការផ្តើមដំណើរការនេះថា ដោយសារកម្ពុជាមិនទាន់អាចដោះស្រាយបញ្ហាចម្បងៗមួយចំនួន ដូចជាការច្រានចោលសិទ្ធិនយោបាយ ការរឹតបន្តឹងនានាទៅលើសង្គមស៊ីវិល សហជីព ការមិនផ្តល់សេរីភាពសារព័ត៌មាន និងបញ្ហាផ្តល់ដីសម្បទានសេដ្ឋកិច្ច។
ការដកហូតការអនុគ្រោះពន្ធពិតប្រាកដអាចនឹងធ្វើឡើងនៅខែសីហាឆ្នាំ២០២០ ប្រសិនបើមិនមានការធ្វើឲ្យប្រសើរផ្នែកសិទ្ធិមនុស្សនិងលទ្ធិប្រជាធិបតេយ្យនៅកម្ពុជា។
លោក ជិន ម៉ាលីន អ្នកនាំពាក្យក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជា ប្រាប់ VOA ថា រដ្ឋាភិបាលកម្ពុជាបាននិងកំពុងសហការជាមួយសហគមន៍អឺរ៉ុបដើម្បីរក្សា EBA។ លោកបន្តថា សេចក្តីថ្លែងការណ៍របស់ GMAC គឺចង់ឲ្យសហគមន៍អឺរ៉ុបទុក EBA ជាប្រយោជន៍ដល់ប្រជាពលរដ្ឋកម្ពុជា។
«រដ្ឋាភិបាលបានធ្វើកិច្ចការគ្រប់បែបយ៉ាងទាំងអស់ ក្នុងការសហការជាមួយនឹងសហគមន៍អឺរ៉ុប រួមទាំងការជជែកពិភាក្សាពិគ្រោះយោបល់ និងការធ្វើការឆ្លើយតបបញ្ជូនរបាយការណ៍គ្រប់បែបយ៉ាងដើម្បីធ្វើការពន្យល់ បំភ្លឺបកស្រាយជូនសហគមន៍អឺរ៉ុប ក្នុងន័យដើម្បីរក្សា EBA នេះ ដើម្បីជាប្រយោជន៍សម្រាប់ប្រជាជាតិខ្មែរទាំងមូល»។
ចំណែកអ្នកនាំពាក្យស្ថានទូតអាល្លឺម៉ង់ប្រចាំកម្ពុជា ដែលជាប្រទេសសមាជិករបស់សហគមន៍អឺរ៉ុបប្រាប់ VOA តាមរយៈសារអេឡិចត្រូនិចឬអ៊ីមែលថា មន្រ្តីរដ្ឋាភិបាលកម្ពុជា តែងជួបជាប្រចាំជាមួយស្ថានទូតអាល្លឺម៉ង់ដើម្បីជជែកអំពីបញ្ហាផ្សេងៗ ក្នុងនោះក៏មានការជជែកអំពី EBA ផងដែរ។ យ៉ាងណាក្តីមន្រ្តីអ្នកនាំពាក្យស្ថានទូតអាល្លឺម៉ង់ដដែលមិនបានបញ្ចេញអំពីការជជែកលម្អិតនោះទេ ដោយលោកគ្រាន់តែបញ្ជាក់ថា «ដំណើរការ EBA គឺបើកចំហ។ សហគមន៍អឺរ៉ុបមិនទាន់ធ្វើការសម្រេចចិត្តនៅឡើយទេ។ យើងត្រូវកសាងការជឿទុកចិត្តឡើងវិញ និងស្វែងរកដំណោះស្រាយ កាន់តែឆាប់កាន់តែល្អ»៕
