ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​កម្មករ​រោង​ចក្រ​ W&D Cambodia​ ​រាប់​រយ​នាក់​តវ៉ា​មុខ​ផ្ទះ​លោក​ហ៊ុន សែន​ ​ដើម្បី​សុំ​កិច្ច​អន្តរាគមន៍


ក្រុមកម្មករ​កម្មការិនី​រាប់រយ​នាក់ ​មក​ពី​រោងចក្រ W&D Cambodia Co., LTD បាន​ប្រមូល​ផ្ដុំ​គ្នា​តវ៉ា​​មុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យ​​រោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ​២០១៩។ (កាន់ ​វិច្ឆិកា/VOA)

ក្រោយ​កម្មករ-កម្មការិនី​ជាច្រើន​រយ​នាក់ ​បាន​តវ៉ា​ទៅ​ស្ថាប័ន​ពាក់​ព័ន្ធ​ផ្សេងៗ​អស់​រយៈពេល​ជិត​៣​ខែ​កន្លង​ទៅ ដើម្បី​ឲ្យ​មាន​ការ​ដោះស្រាយ​លើ​វិវាទ​ការងារ​របស់​ពួកគេ នៅ​ថ្ងៃ​ចន្ទ​នេះ​ កម្មករ​រោងចក្រ​កាត់ដេរ​ប្រមាណ​ជា​៥០០​នាក់​ បាន​ទៅ​តវ៉ា​នៅ​ខាង​មុខ​ផ្ទះ​លោក​នាយក​រដ្ឋ​មន្ត្រី​ ហ៊ុន សែន។

នៅ​ព្រឹក​ថ្ងៃ​ចន្ទ​នេះ ​កម្មករ​កម្មការិនី​ប្រមាណ​ជា​៥០០​នាក់ ​មក​ពី​រោងចក្រ​ ​ W&D Cambodia Co.,​ LTD​ ​បាន​ប្រមូល​ផ្ដុំ​គ្នា​តវ៉ា​នៅមុខ​គេហដ្ឋាន​របស់​លោក​នាយក​រដ្ឋ​មន្ត្រី​ ​ហ៊ុន សែន​ ​ដើម្បី​ទាមទារ​ឲ្យរោង​ចក្រ​ ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ។

នេះ​ជា​លើក​ដំបូង​ដែល​ក្រុម​កម្មករ​កម្មការិនីរាប់​រយ​នាក់​ ​ភាគ​ច្រើន​ជា​ស្ត្រី​ ​អាចប្រមូល​ផ្ដុំ​គ្នានៅ​ខាង​មុខ​គេហដ្ឋាន​របស់​លោក​នាយក​រដ្ឋមន្ត្រី​ ​ដើម្បី​សុំ​ឲ្យ​លោក​អន្តរាគមន៍​បញ្ចប់​វិវាទ​ការងារ​របស់​ពួកគេ​ដែល​បាន​អូស​បន្លាយ​ពេល​ជាច្រើន​ខែ​មក​ហើយ។​ ​ការ តវ៉ា​របស់​ពួកគេ ​ក៏​មាន​ការ​ឃ្លាំមើល​ពី​ក្រុម​កង​សន្តិសុខ​ខណ្ឌ​ និង​សមត្ថកិច្ច​ចម្រុះ​ប្រមាណ​ជា​១០០​នាក់​ផង​ដែរ។

អ្នកស្រី ​ណយ ធារ៉ា ​កម្មការិនី​រោង​ចក្រ​ W&D មួយ​រូបដែល​អះអាង​ថា​ត្រូវ​បាន​រោង​ចក្រ​បញ្ឈប់ ប្រាប់​ VOA ​ថា ​អ្នកស្រី​ និង​កម្មករ​កម្មការិនី​ផ្សេង​ទៀត​មក​តវ៉ា​នៅ​មុខ​គេហដ្ឋាន​លោក​នាយក​រដ្ឋមន្ត្រី​ ដើម្បី​ទាម​ទារ​ឲ្យ​រោងចក្រ​ទទួល​យក​កម្មករ​ចំនួន​១២០០​នាក់​ចូល​ធ្វើការ​វិញ ​បន្ទាប់​ពី​រោង​ចក្រ​បញ្ឈប់​ពួក​គេ​ដោយ​មិន​មាន​មូលហេតុ។​ អ្នកស្រី​បន្ត​ថា​អ្នកស្រី​នឹង​បន្ត​តវ៉ា​រហូត​មាន​ដំណោះ​ស្រាយ។​

អ្នកស្រី ណយ ធារ៉ា កម្មការិនី​រោង​ចក្រ W&D ប្រាប់ VOA ខណៈ​កំពុង​ឈរ​តវ៉ា​ជាមួយកម្មករ​កម្មការិនី​រាប់រយ​នាក់ផ្សេងទៀត​ ​នៅខាងមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យរោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ២០១៩។ (កាន់ វិច្ឆិកា/VOA)
អ្នកស្រី ណយ ធារ៉ា កម្មការិនី​រោង​ចក្រ W&D ប្រាប់ VOA ខណៈ​កំពុង​ឈរ​តវ៉ា​ជាមួយកម្មករ​កម្មការិនី​រាប់រយ​នាក់ផ្សេងទៀត​ ​នៅខាងមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យរោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ២០១៩។ (កាន់ វិច្ឆិកា/VOA)

​ដោយ​ឈរ​កាន់​បដា​សុំ​អន្តរាគមន៍​ពី​លោក​នាយក​រដ្ឋមន្ត្រី​ ហ៊ុន សែន​ ​អ្នកស្រី ​ណយ ធារ៉ា​ ​ថ្លែង​ថា៖​

«ពួក​ខ្ញុំ​ទាមទារ​ហ្នឹង​ទាមទារ​ចូល​ធ្វើការ​វិញ​ទេ មិន​មែន​ដូច​បង​អ្នក​កាសែត​មុន​ហ្នឹង​គាត់​បំផ្លើស​ថា​ពួក​ខ្ញុំ​ហ្នឹង​ទាមទារ​អតីត​ភាព តាម​ពិត​អត់ទេ ពួក​ខ្ញុំ​សុំ​ចូល​ធ្វើ​ការ​វិញ។​ ពួក​ខ្ញុំ​ទាមទារ​ចូល​ធ្វើ​ការ​វិញ។ ពួក​ខ្ញុំ​កូដកម្ម​ហ្នឹង​តាំង​ពី​ថ្ងៃ​២៤ ខែ​១២​ ហើយ​ចាប់​ផ្ដើម​កូដកម្ម​ហ្នឹង​ គាត់​បញ្ឈប់​ហ្នឹង​ថ្ងៃ​៤ ខែ​មួយ បញ្ឈប់​កម្មករ​១២០០​នាក់​ចោល»។

ចំណែក​លោក​ សុខ ជា​ កម្មករ​ម្នាក់​ទៀត​ដែល​បាន​ចូលរួម​តវ៉ា​នៅ​ខាង​មុខ​គេហដ្ឋាន​របស់​លោក​នាយក​រដ្ឋមន្ត្រី ​ហ៊ុន សែន​ ដែរ​នោះ​ ប្រាប់​ថា​ ចាប់​តាំងពី​ខែ​ធ្នូ​រហូត​មក​ដល់​ខែ​មីនា​នេះ​ ក្រុម​កម្មករ​កម្មការិនី​ បាន​ដាក់​ញត្តិ និង​តវ៉ា​នៅ​មុខ​ស្ថាប័ន​ពាក់ព័ន្ធ​ជាច្រើន ដើម្បី​សុំ​ឲ្យ​មាន​ដំណោះ​ស្រាយ​ពី​ការ​បញ្ឈប់​កម្មករ​កម្មការិនី​ទាំង​ជាង​១២០០​នាក់។

លោក​បន្ថែម​ថា ការ​បន្ត​ការ​តវ៉ា​របស់​ពួកគេ​នៅ​ពេល​នេះ គឺ​ជា​ការ​ទាមទារ​ឲ្យ​យក​កម្មករ​កម្មការិនី​ទាំង​ជាង​១២០០នាក់​ចូល​ធ្វើការ​វិញ មិនមែន​ជា​ការ​ទាមទារ​ប្រាក់​អតីត​ភាព​ការងារ​ទៀត​នោះ​ទេ។

លោក សុខ ជា កម្មករ​ប្រាប់ VOA ខណៈ​កំពុង​ឈរ​តវ៉ា​ជាមួយ​កម្មករ​កម្មការិនី​រាប់រយ​នាក់ផ្សេងទៀត​ ​នៅខាងមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យរោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ​២០១៩។ (កាន់ ​វិច្ឆិកា/VOA)
លោក សុខ ជា កម្មករ​ប្រាប់ VOA ខណៈ​កំពុង​ឈរ​តវ៉ា​ជាមួយ​កម្មករ​កម្មការិនី​រាប់រយ​នាក់ផ្សេងទៀត​ ​នៅខាងមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យរោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ​២០១៩។ (កាន់ ​វិច្ឆិកា/VOA)

កម្មករ​ផ្នែក​អ៊ុត​ក្នុង​រោងចក្រ ​W&D រូប​នេះបញ្ជាក់​ថា៖​

«សូម​ឲ្យ​ក្រុម​ហ៊ុន​ហ្នឹង​មាន​ជំហរ​ក្នុង​ការ​ដោះ​ស្រាយ​ជូន​កម្មករ​ ហើយ​យក​កម្មករ​ចូល​ធ្វើការ​វិញ។ តែ​បើ​សិន​ជា​អ្នក​ឯង​ខ្លាំង អ្នក​ឯង​គិត​ថា​អញ​មិន​យក​ពួក​អ្ហែង​ទេ អញ្ចឹង​សូមឲ្យគិត​៥​ចំណុច​ឲ្យ​ពួក​ខ្ញុំ​មក ពួក​ខ្ញុំ​នឹង​ដើរ​ចេញ។ ខ្ញុំ​មិន​ឈរ​រ៉ាំរ៉ៃ​នៅ​មុខ​រោង​ចក្រ​៣​ខែ​ហ្នឹង​ទេ។ ​៥​ចំណុច​ហ្នឹង ​យើង​មាន​ក្នុង​ច្បាប់​ការ​ងារ ​ដូច​ថា​ប្រាក់​ជូន​ដំណឹង ​ប្រាក់​បណ្ដេញ​ចេញ ជំងឺ​ចិត្ត ​ប្រាក់ខែ​ចុង​ក្រោយ​និង​ប្រាក់​ដំណាច់​ឆ្នាំ»។

វិវាទ​រវាង​ក្រុម​កម្មករ​ និង​ថៅកែរោងចក្រ​ W&D ​ដែល​មាន​ទីតាំង​ស្ថិត​ក្នុង​ខណ្ឌ​មានជ័យ​ បាន​ផ្ទុះ​ឡើង​តាំង​ពី​ចុង​ឆ្នាំ​២០១៨​ បន្ទាប់​ពី​ក្រុម​កម្មករ​ជិត២​ពាន់​នាក់ បាន​ទាម​ទារ​ឲ្យ​ថៅកែ​រោងចក្រ​នេះបើក​ប្រាក់​អតីត​ភាព​ដល់​ពួកគេ​នៅ​មុន​ឆ្នាំ​២០១៩​នេះ។​

VOA​ បាន​ទាក់ទង​ទៅ​អ្នកស្រី មាស សារ៉េត តំណាង​រោងចក្រ​ W&D ​ដែល​មាន​លេខ​ទំនាក់​ទំនង​ក្នុង​គេហទំព័រ​របស់​សមាគម​រោងចក្រ​កាត់ដេរ​កម្ពុជា ហៅ​កាត់​ថា GMAC ​ប៉ុន្តែ​អ្នកស្រី​ សារ៉េត ​បដិសេធ​មិន​ធ្វើ​អត្ថាធិប្បាយ។

លោក ​ហែម ហឿន​ អគ្គ​លេខាធិការ​រង​គណៈ​កម្មការ​ដោះស្រាយ​កូដកម្ម​បាតុកម្ម​គ្រប់​មុខ​សញ្ញា​នៃ​ក្រសួង​ការងារ ប្រាប់​អ្នក​សារ​ព័ត៌មាន​នៅ​កន្លែង​តវ៉ា​នោះ​ថា ករណី​វិវាទ​ការងារ​នៅ​រោងចក្រ ​W&D បាន​ដល់​ដៃ​តុលាការ​ហើយ។​ លោកថា ក្រសួង​ការងារ​មិន​មាន​សិទ្ធិ​អ្វី​ក្រៅ​តែ​ពីជួយ​សម្រប​សម្រួល​នោះ​ទេ។​

​លោក​បញ្ជាក់​ថា៖

«ក្រសួង​មាន​គឺតែ​សម្រប​សម្រួល​ មិនមែន​ដូច​គាត់​ថា​មិញ ក្រសួង​មាន​សិទ្ធិ ម៉េច​មិន​ហៅ​រោងចក្រ​មក​អញ្ចេះ​មក​អញ្ចុះ។ មាន​មាត្រា​ណាមួយ​ដែល​ក្រសួង​ត្រូវ​ចាប់​រោងចក្រ? មាន​មាត្រា​ណាមួយ​ដែល​ក្រសួង​ត្រូវចាប់​កម្មករ? ច្បាប់​ស្ដីពី​ការងារ​ វា​អត់​មាន។​ មាន​តែ​តុលាការ​មួយ​គត់​ដែល​និយាយ​ថា អ្នក​នេះ​ខុស​ច្បាប់ អ្នក​នោះ​ខុស​ច្បាប់»។

លោក ហែម ហឿន អគ្គ​លេខា​ធិការ​រង​គណៈ​កម្មការ​ដោះស្រាយ​កូដកម្ម​បាតុកម្ម​គ្រប់​មុខសញ្ញានៃ​ក្រសួង​ការងារ ប្រាប់​អ្នកសារ​ព័ត៌មានខណៈ​កម្មករ​កម្មការិនី​រាប់រយ​នាក់​មក​ពី​រោងចក្រ W&D Cambodia Co., LTD តវ៉ានៅខាងមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ថ្ងៃទី១៨ ខែមីនា ឆ្នាំ២០១៩។ (កាន់ វិច្ឆិកា/VOA)
លោក ហែម ហឿន អគ្គ​លេខា​ធិការ​រង​គណៈ​កម្មការ​ដោះស្រាយ​កូដកម្ម​បាតុកម្ម​គ្រប់​មុខសញ្ញានៃ​ក្រសួង​ការងារ ប្រាប់​អ្នកសារ​ព័ត៌មានខណៈ​កម្មករ​កម្មការិនី​រាប់រយ​នាក់​មក​ពី​រោងចក្រ W&D Cambodia Co., LTD តវ៉ានៅខាងមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ថ្ងៃទី១៨ ខែមីនា ឆ្នាំ២០១៩។ (កាន់ វិច្ឆិកា/VOA)

ខណៈ​ក្រុម​កម្មករ​កម្មការិនី​កំពុង​តវ៉ា​នៅ​ខាង​មុខ​គេហដ្ឋាន​របស់​លោក​នាយក​រដ្ឋមន្ត្រី ​លើ​សួន​ច្បារ​ចន្លោះ​រូប​សំណាក​ព្រះ​មហា​វីរក្សត្រ និងវិមាន​ឯករាជ្យ លោក ហ៊ុន សែន ក៏​បាន​ថ្លែង​ក្នុង​ពិធី​ចែក​សញ្ញាប័ត្រ​ដល់​និស្សិត​ក្នុង​វិទ្យាស្ថាន​ជាតិ​អប់រំ​ដែល​មាន​ទីតាំង​ក្បែរ​នោះ​ដែរ​ថា​រដ្ឋមន្ត្រី​ក្រសួង​ការងារ​ លោក​ អ៊ិត សំហេង​ ប្រាប់​លោក​ថា កម្មករ​រោងចក្រ​ W&D មក​តវ៉ា​ព្រឹក​នេះ​ មាន​ចំនួន​ប្រមាណ​ជា​១០០​នាក់​ ដោយ​ទាមទារ​ប្រាក់​អតីត​ភាព​ការងារ។

លោក​ ហ៊ុន សែន ក៏​បាន​ស្នើ​ទៅ​លោក​ អាត់ ធន់ ​ប្រធាន​សហភាព​ការងារ​កម្ពុជា ឲ្យ​ប្រាប់​ទៅ​ក្រុម​កម្មករ​ទាំង​នោះ ​ឈប់​ទាមទារ​ប្រាក់​អតីត​ភាព​បែប​នេះ​តទៅ​ទៀត ដោយ​លោក​ថា ការ​ទាមទារ​ប្រាក់​អតីត​ភាព​បែប​នេះ​គឺជា​ការ​ទាមទារ​ «ខុស​ច្បាប់» និង​ថា ករណី​នេះ​អាច​ធ្វើ​ឲ្យ​ថៅកែរត់​ចោល​រោង​ចក្រ។​

លោក​បញ្ជាក់​ថា៖​

«អា​នេះ!​ តាម​ដឹង​ថា​ជា​សហជីព​ជា​សមាជិក​របស់​លោក​ អាត់ ធន់។​ ខ្ញុំ​សុំ​ស្នើ​ឲ្យ​មាន​ការ​យោគ​យល់​អំពី​បញ្ហា​នេះ ហើយ​បន្ត​ទទួល​យក​ទៅ​តាម​ច្បាប់​ដែល​បាន​កំណត់។​ យើង​កំពុង​ទាមទារ​ខុស​ច្បាប់។ គឺ​មិន​អាច​ដោះស្រាយ​ជូន​បាន​ទេ ព្រោះ​បើ​សិន​ជា​ដោះស្រាយ​បាន គេ​ដោះ​ស្រាយ​ហើយ គេ​មិន​ចាំ​បាច់​ឲ្យ​យើង​ធ្វើ​បាតុកម្ម​ទេ ប៉ុន្តែ​ដោយ​សារ​តែ​រឿង​យើង​គិត​គូរ​សព្វ​គ្រប់​ហើយ​ថា​បើ​សិន​ជា​ចេញ​មួយ​ព្រឹប ​វា​ប្រមាណ​ជា​២ពាន់​លាន​ដុល្លារ​នោះ»។

លោក​ អាត់ ធន់​ ប្រធាន​សហភាព​ការងារ​កម្ពុជា​ប្រាប់ ​VOA នា​រសៀល​ថ្ងៃ​ចន្ទ​នេះ​ថា ការ​ថ្លែង​របស់​លោក​នាយក​រដ្ឋមន្ត្រី គឺ​ជា​ការ​ភាន់​ច្រឡំ​ដ៏​ធំ​មួយ​ដែល​លោក​ថា កើត​ឡើង​ដោយ​សារ​ការ​ផ្ដល់​ព័ត៌មាន​ពី​មន្ត្រី​ថ្នាក់​ក្រោម​របស់​លោក ហ៊ុន សែន។

លោក​បន្ថែម​ថា សហជីព​របស់​លោក​មិន​បាន​ដឹកនាំ​ឲ្យ​កម្មករ​ទៅ​តវ៉ា​នោះ​ទេ ហើយ​ថា កម្មករ​ទាំង​នោះ​តវ៉ា​ទាមទារ​ឲ្យ​មាន​ការ​ទទួល​យក​ពួកគេ​ចូល​ធ្វើការ​វិញ មិនមែន​ទាមទារ​អតីត​ភាព​ការងារ​ដូច​ការ​ថ្លែង​របស់​លោក​នាយក​រដ្ឋមន្ត្រី​ឡើយ។

លោក​បញ្ជាក់​ថា៖​

«កម្មករ​នៅ​កូដកម្ម​ជាង​១ពាន់​នាក់ ហើយ​គេ​រាយការណ៍​តែ​មួយ​រយនាក់​ទេ ហើយ​កម្មករ​លែង​ទាមទារ​អតីត​ភាព​ការងារ​សរុប​ទៀត​ហើយ ហើយ​ឥលូវ​នៅតែ​ថា​កម្មករ​នៅ​ទាមទារ​អតីត​ភាព​ការងារ​សរុប។ អញ្ចឹង​ខ្ញុំ​គិត​ថា រឿង​នេះ​ជា​ការ​ភាន់​ច្រឡំ​ដ៏​ធំ​មួយ​ដែល​ខាង​ក្រសួង​ការងារត្រូវ​ត្រួត​ពិនិត្យ​ឡើង​វិញ​ចំពោះ​មន្ត្រី​របស់​ខ្លួន»។

​ក្រុម​កម្មករ​កម្មការិនី​ ដែល​តវ៉ា​នៅ​មុខ​គេហដ្ឋាន​របស់​លោក​នាយក​រដ្ឋមន្ត្រី​នៅ​ថ្ងៃ​ចន្ទ​នេះអះអាង​ថា ការតវ៉ា​របស់​ពួកគេ​ គឺ​ទទួល​បាន​ជំនួយ​ផ្លូវ​ច្បាប់​ពី​សហជីព​ស៊ីខៅឌូ​អំពី​ការ​បញ្ឈប់​កម្មករ ប៉ុន្តែ​មិន​មាន​តំណាង​ណាមួយ​ក្នុង​ការ​ដឹកនាំ​តវ៉ា​នោះ​ទេ។

ក្រុមកម្មករ​កម្មការិនី​រាប់រយ​នាក់ ​មក​ពី​រោងចក្រ W&D Cambodia Co., LTD បាន​ប្រមូល​ផ្ដុំ​គ្នា​តវ៉ាមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យរោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ​២០១៩។ (កាន់ ​វិច្ឆិកា/VOA)
ក្រុមកម្មករ​កម្មការិនី​រាប់រយ​នាក់ ​មក​ពី​រោងចក្រ W&D Cambodia Co., LTD បាន​ប្រមូល​ផ្ដុំ​គ្នា​តវ៉ាមុខ​គេហដ្ឋាន​របស់​លោក​នាយក​រដ្ឋ​មន្ត្រី ហ៊ុន សែន ទាមទារ​ឲ្យរោងចក្រ​ទទួល​យក​កម្មករ​ជាង​១ពាន់​នាក់​ចូល​ធ្វើការ​វិញ នៅ​ថ្ងៃទី​១៨ ខែមីនា ឆ្នាំ​២០១៩។ (កាន់ ​វិច្ឆិកា/VOA)

ក្រុម​កម្មករ​ទាំង​នោះ ​ក៏​បាន​បញ្ជាក់​ថា មូលហេតុ​ដែល​ក្រុមហ៊ុនបញ្ឈប់​កម្មករ​កម្មការិនី​ គឺ​ដោយ​សារ​កម្មករ​ទាមទារ​ប្រាក់​អតីត​ភាព​ការងារ និង​ប្រាក់​អត្ថ​ប្រយោជន៍​ផ្សេងៗ នៅ​មុន​ឆ្នាំ​២០១៩។

ក្រុម​កម្មករ​ទាំង​នោះបន្ត​ថា ក្រោយ​ការ​បញ្ឈប់​កម្មករ ​ក្រសួង​ការងារ​ក៏​បានចេញ​លិខិត​តម្រូវ​ឲ្យ​រោងចក្រ​បង់​ប្រាក់​អតីត​ភាព​ការងារ​ដល់​កម្មកររៀងរាល់​៦​ខែ​ម្ដង ទើប​ពួកគេប្ដូរ​ការ​ទាមទារ​ឲ្យ​រោងចក្រ​ដោះ​ស្រាយ​ការបញ្ឈប់​ពួកគេ​វិញ។

តាម​ប្រកាស​របស់​ក្រសួង​ការងារ​ចុះ​ថ្ងៃ​ទី​២១​ ខែ​កញ្ញា​ ឆ្នាំ​២០១៨ និង​មាន​ហត្ថលេខា​របស់​លោក​ ​អ៊ិត សំហេង​ រដ្ឋ​មន្ត្រី​ក្រសួង​ការងារ​បាន​បញ្ជាក់​ថា ដំណើរការ​នៃ​ការ​ផ្ដល់​ប្រាក់​បំណាច់​អតីត​ភាព​ការងារត្រូវ​ធ្វើ​ឡើង​ពីរ​ដង​ក្នុង​មួយ​ឆ្នាំ។

ការ​ផ្ដល់​ប្រាក់​បំណាច់​អតីតភាព​ការងារ​ពីរ​ដង​ក្នុង​មួយ​ឆ្នាំ​ ត្រូវ​អនុវត្ត​ចាប់​ពី​ឆ្នាំ​២០១៩​តទៅ​ ​ដោយ​និយោជក​ត្រូវ​ផ្ដល់​ឲ្យ​កម្មករ​និយោជិត​ ​ដែល​កំពុង​បម្រើ​ការងារ​នូវ​ប្រាក់​បំណាច់​អតីត​ភាព​ការងារ​ដែល​ស្មើ​នឹង​ប្រាក់​ឈ្នួល​និង​ប្រាក់​បន្ទាប់​បន្សំ​ចំនួន​១៥​ថ្ងៃ​ក្នុងមួយ​ឆ្នាំ។

ប្រាក់​បំណាច់​នេះ​ ត្រូវ​បើក​ជូន​កម្មករ​និយោជិត​ ​ចំនួន​៧,៥​ ​(ប្រាំពីរ​កន្លះ) ​ថ្ងៃ​ ​នៅ​ក្នុង​ខែ​មិថុនា​នៃ​ឆ្នាំ​នីមួយ​ៗ​ និង​ចំនួន​៧,៥​ (ប្រាំពីរ​កន្លះ)​ ​ថ្ងៃ​ នៅ​ក្នុង​ខែ​ធ្នូ​នៃ​ឆ្នាំ​នីមួយៗ៕

XS
SM
MD
LG